Vieteranu z Hrodna 97 hadoŭ — u 1945-m achoŭvaŭ most pad Nižnim Noŭharadam, a paśla vajny zmahaŭsia z «banderaŭcami»
«Kali Ivan Alaksandravič Niaŭzoraŭ siońnia raskazvaŭ strašnyja vajennyja epizody ciapierašnim školnikam, ja spačatku padumaŭ, a ci nie rana im takoje čuć… A potym zrazumieŭ — čym raniej, tym lepš», — kaža kiraŭnik Hrodzienskaj vobłaści Juryj Karajeŭ. Ale śviedkam jakich strašnych vajennych epizodaŭ staŭ Niaŭzoraŭ?
Pa stanie na 1 maja 2025 hoda ŭ Biełarusi žyli kala 800 vieteranaŭ Vialikaj Ajčynnaj vajny.
Pra adnaho ź ich na praciahu miesiaca apublikavali vialikija artykuły dziaržaŭnyja haziety «SB» i «Respublika», jaho ŭračysta pavinšavaŭ kiraŭnik Hrodzienskaj vobłaści Juryj Karajeŭ i ŭručyŭ jubilejny miedal.
«Kali Ivan Alaksandravič siońnia raskazvaŭ strašnyja vajennyja epizody ciapierašnim školnikam, ja spačatku padumaŭ, a ci nie rana im takoje čuć… A potym zrazumieŭ — čym raniej, tym lepš», — razvažaŭ Karajeŭ.
Hieroj publikacyj — 97-hadovy vieteran Ivan Niaŭzoraŭ. Jakim byŭ jaho šlach padčas Druhoj suśvietnaj vajny?
Ivan naradziŭsia ŭ 1927 hodzie ŭ vioscy ŭ Archanhielskaj vobłaści Rasii. Jaho pryzvali ŭ armiju ŭ śniežni 1944 hoda, kali front znachodziŭsia na terytoryi Vienhryi i Čechasłavakii.
Da kanca vajny Niaŭzoraŭ u składzie harnizona achoŭvaŭ most praz raku Klaźmu ŭ rajonie Nižniaha Noŭharada (tady horad Horki) — za 2000 kiłamietraŭ ad frontu.
Z žniŭnia 1945 hoda pa studzień 1946 hoda jon prymaŭ udzieł u «likvidacyi bandyckich farmiravańniaŭ u Zachodniaj Ukrainie» — takim eŭfiemizmam nazyvajuć zmahańnie z nacyjanalistyčnym ukrainskim padpollem. Pavodle ciapierašniaha biełaruskaha zakona ŭdzielnikaŭ hetych paślavajennych apieracyj pryraŭnivajuć da vieteranaŭ Vialikaj Ajčynnaj vajny.
Paśla Niaŭzoraŭ pad 30 hadoŭ adsłužyŭ u pahraničnych vojskach — va Ukrainie, u Azierbajdžanie, Hiermanii — i ŭrešcie asieŭ u Hrodnie.
Siarod uznaharod Niaŭzorava — orden Ajčynnaj vajny II stupieni, miedali «Za pieramohu nad Hiermanijaj u Vialikaj Ajčynnaj vajnie 1941—1945 hh.», «Za bajavyja zasłuhi».
Kamientary
"Da kanca vajny Niaŭzoraŭ u składzie harnizona achoŭvaŭ most ... za 2000 kiłamietraŭ ad frontu.
Z žniŭnia 1945 hoda pa studzień 1946 hoda jon prymaŭ udzieł u ... zmahańni z nacyjanalistyčnym ukrainskim padpollem".