Fatohraf-ahient z dvuma pašpartami zdymaje biełarusaŭ i ich mierapryjemstvy ŭ Varšavie
Ivan Miščuk aktyŭna zdymaje padziei ekspataŭ, biznes-forumy, palityčnyja schody. Achvotna robić fotasiesii «ekstremistam», i sam ujechaŭ u Polšču pa humanitarnaj vizie. Voś tolki jość niuans: hety syn adstaŭnika z Kobryna ŭ lutym 2021-ha atrymaŭ biełaruski pašpart prykryćcia na imia Ivana Mišyna.
Kali my aśviatlali pravakacyju z udziełam «startapiera» z Baranavič Alaksieja Burbickaha, našu ŭvahu źviarnuŭ taksama fatohraf.
Hałoŭnaj metaj Burbickaha, nahadajem, było znajomstva z ananimnymi raspracoŭščykami i markietołahami płatformy Svae, raspracavanaj kamandaj Paŭła Libiera.
Burbicki zaprasiŭ ich na prezientacyju svajho nieisnujučaha startapa ŭ Varšavie. Nichto ź cikavych jamu ludziej na sustreču nie pryjšoŭ, u pustoj zale byli tolki sam Burbicki i niejki fatohraf, jaki zapisaŭsia na sustreču jak Yaraslau Zhda.
Čytajcie taksama: Što za 17-hadovy startapier, jaki vyliŭ cebar chłuśni na Libiera na radaść biełaruskim śpiecsłužbam
«Naša Niva» pačała pošuk hetaha fatohrafa, kab daviedacca, chto ž pavinien byŭ adzdymać «ekstremistaŭ».
My pakul nie identyfikavali mienavita Yaraslau Zhda, ale ŭ pracesie pošuku my vyjšli na inšaha, nie mienš cikavaha piersanaža ŭ Varšavie, jaki śpiecyjalizujecca na zdymkach «ekstremistaŭ», biznes-forumaŭ i inšych masavych mierapryjemstvaŭ, na jakija chodziać pieravažna ŭciekačy ź Biełarusi i Ukrainy.
Hetaja znachodka važnaja: jana pralivaje śviatło na toje, jakimi mietadami łukašenkaŭskija śpiecsłužby źbirajuć infarmacyju za miažoj, jak lehalizujuć svaich ahientaŭ i čym cikaviacca.
Raźviedčyk z PTV
Na 38-hadovaha Ivana Miščuka my vyjšli pry kansultatyŭnaj dapamozie «Bajpoła» i z vykarystańniem baz «Biełpoła».
Miščuk naradziŭsia ŭ 1986 u rasijskim Uładzivastoku. Dziacinstva pravioŭ u vajskovym haradku Kobryna, dzie jaho baćka, avijatar Valeryj Miščuk, atrymaŭ kvateru.
Miščuk-starejšy — uradženiec Prymorskaha kraju Rasii. Jašče pry Savieckim Sajuzie jon pa słužbie trapiŭ u Kobryn i zastaŭsia žyć u Biełarusi. U dalejšym atrymaŭ biełaruski pašpart.
U 2007 hodzie jahony syn Ivan skončyŭ kobrynskaje PTV i pajšoŭ pracavać pa rabočaj śpiecyjalnaści na fabryku cacak «Paleśsie». U 2010-m źmianiŭ pracadaŭcu i jašče čatyry hady adpracavaŭ u kampanii pa vyrabie stužak «Fleksapak-Poł», u tym ža 2010-m adkryŭ IP ź vidam dziejnaści «Inšaja dziejnaść, źviazanaja z vyličalnaj technikaj», jakoje adpracavała piać hadoŭ.
Čym Ivan zajmaŭsia dalej — niezrazumieła, pracoŭnych zapisaŭ u dastupnych nam bazach niama. Ale prykładna z 2014 hoda ŭ jaho źjaviłasia chobi — fatahrafija.
Ivan Miščuk nie vielmi časta, ale zdymaŭ viasielli. Za 10 hadoŭ u jahonym partfolia UKantakcie možna naličyć z tuzin adźniatych amatarskich fotasiesij i luboŭnych videahistoryj.
Prykładna ŭ 2015-m Ivan pačaŭ prezientavać siabie jak fatohrafa.
Novaja staronka jahonaha žyćcia pačałasia 5 lutaha 2021 hoda, kali, u dadatak da asnoŭnaha pašparta na imia Ivana Valerjeviča Miščuka, viasielny fatohraf atrymaŭ ad śpiecsłužbaŭ dakumient apieratyŭnaha prykryćcia na imia Ivana Valerjeviča Mišyna.
Pašpart apieratyŭnaha prykryćcia moža vydać adna ź biełaruskich śpiecsłužbaŭ dla vykanańnia kankretnaj apieratyŭnaj zadačy. Taki pašpart apieratyŭnaha prykryćcia mieŭ, naprykład, raźviedčyk Alaksiej Łabiejeŭ (jon ža — Alaksiej Hardziejeŭ) — kachanak Anžaliki Mielnikavaj, a taksama muž žurnalistki Volhi Siamaški — supracoŭnik «Varhiejminha» i adnačasova aficer biełaruskaj vyviedki Fiodar Harbačoŭ (jon ža — Viktar Makaviejeŭ).
Čytajcie taksama:
Kachanak Anžaliki Mielnikavaj — ahient biełaruskich śpiecsłužbaŭ z pašpartam prykryćcia
Fiodar Viktaravič i «Viktar Fiodaravič». Supracoŭnik «Varhiejminha» maje pašpart prykryćcia. Jaho žonka Volha Siamaška — viadomaja žurnalistka
Muž Siamaški byŭ nie adzinym, chto atrymaŭ pašpart prykryćcia 13 lutaha 2018 hoda
Nieisnujučaje alter-eha Miščuka, darečy, prapisana ŭ Kobrynie pa adnym adrasie ź jašče adnoj nieisnujučaj asobaj — Siarhiejem Iljičom Čyžom (sapraŭdnaje proźvišča hetaj ptuški — Siarhiej Iljič Syč).
Radyjoamatar Siarhiej Syč atrymaŭ dakumient prykryćcia ŭ adzin dzień z fatohrafam Ivanam Miščukom. Ich zalehiendavanyja asoby «pražyvajuć» u Kobrynie ŭ internacie pa vulicy Nastasiča, 16.
Pieršy zajezd u Polšču
Pra zadačy hetaha fatohrafa možna zrabić niekatoryja vysnovy, analizujučy jahonuju aktyŭnaść. Miščuk pakinuŭ šmat śladoŭ u internecie, i jahonuju trajektoryju možna adsačyć padrabiazna.
Tak, chutka paśla atrymańnia dakumientaŭ prykryćcia Miščuk desantavaŭsia ŭ Polšču i z čystaj staronki pačaŭ vieści svaje sacyjalnyja sietki.
Pačynajučy z kastryčnika 2021, Miščuk sa svajho telehram-akaŭnta @IvanPhoto pačynaje aktyŭničać u publičnych čatach biełaruskaj dyjaspary.
Pieršaje paviedamleńnie, jakoje jon piša 15 kastryčnika 2021: «Dobry viečar))) Ja fatohraf sa šmathadovym dośviedam, šukaju pracu. Sam pryjechaŭ z Bresta. Budu rady znajomstvu z vami!!! Na hety momant ja tut vučusia i mnie vielmi patrebna praca pa fatahrafii».
Druhoje paviedamleńnie, jakoje jon napisaŭ 22 kastryčnika 2021, adrazu celić, kudy treba. Miščuk prapanavaŭ Jaŭhienu Buramu, kiraŭniku Asacyjacyi biełaruskaha biznesu za miažoj, svaje pasłuhi repartažnaha fatohrafa na biznes-forumie ABBA ŭ Varšavie.
U vyniku na forum Miščuk trapiŭ jak fatohraf. Hanararu za zdymku jon nie prasiŭ.
«Ja nie pahłyblaŭsia ŭ padrabiaznaści dyjałohaŭ na scenie, mnie była cikavaja sama zdymka. Placoŭki było try, i tamu ŭ zale ja nie zaŭsiody znachodziŭsia. Ale, pa vysnovach niekatorych ludziej, što byli tam, im była karysnaja taja infarmacyja)», — apisaŭ svaje ŭražańni Miščuk.
Udzieł u forumie staŭ dla Miščuka punktam uvachodu ŭ koły demakratyčnych aktyvistaŭ, dziejačoŭ i palitykaŭ. Jon z mnohimi paznajomiŭsia, prapanoŭvajučy svaje pasłuhi jak repartažnaha i indyvidualnaha fatohrafa.
Fotasiesiju aŭtarstva Miščuka vosieńniu 2022-ha publikavała ŭ svaim instahramie Alina Koŭšyk — tady člen Abjadnanaha pierachodnaha kabinieta, a ciapier kiraŭnica «Biełsata». Joj fotasiesiju fatohraf-sieksot zrabiŭ biaspłatna.
Pra toje, što ŭ 2022-m jaje zdymaŭ ahient, Alina Koŭšyk daviedałasia ad «Našaj Nivy».
Z pradstaŭnicy «Kibierpartyzan» Julijany Šamietaviec za anałahičnyja pasłuhi Miščuk uziaŭ hrošy.
«Adzin raz jaho naniała dla prafiesijnych fotazdymkaŭ asabistych, paśla rekamiendacyi na adnym mierapryjemstvie demsiłaŭ, dzie jon zdymaŭ. Paraiŭ jaho Jarasłaŭ Kot», — skazała «Našaj Nivie» Šamietaviec.
Jarasłaŭ Kot — heta były vykładčyk jurfaka BDU i były daradca Asacyjacyi biełaruskaha biźniesu za miažoj (ABBA), sa zdymak padziej jakoj i pačaŭsia pracoŭny šlach Miščuka-Mišyna.
U nastupnym Miščuk nieadnarazova zdymaŭ mierapryjemstvy, arhanizavanyja ABBA.
Taksama sieksot aktyŭna zdymaŭ — i praciahvaje zdymać — ruskamoŭnyja kvizy ŭ Polščy i mierapryjemstvy ukrainskaj i biełaruskaj dyjaspary. U jahony abjektyŭ nieadnarazova traplali demakratyčnyja aktyvisty, jakija naviedvajuć takija padziei, a taksama ich siabry, jakija jeździać u Biełaruś.
Miščuk-Mišyn — asnoŭny fatohraf varšaŭskich kvizaŭ dla ekspataŭ ź Biełarusi i Ukrainy. U hetym ža žanry pracuje i jahonaja žonka Julija Miščuk, jakaja vystupaje jak fatohraf i madel
Sieksot stanovicca palityčnym uciekačom
Adkrytaja rabota z apazicyjaj, publičnyja paviedamleńni i fotazdymki nie pieraškadžali Miščuku jeździć u Biełaruś. Novy, 2022 hod jon sustrakaŭ u Kobrynie, vyjechaŭšy z Varšavy 20 śniežnia i viarnuŭšysia 9 studzienia.
Na jakoj padstavie Miščuk-Mišyn atrymaŭ svaju pieršuju vizu, my nie viedajem. Ale druhuju vizu sprabavaŭ atrymać, pastupiŭšy ŭ adnu z hetak zvanych palicejalnych škoł u Varšavie (pa-našamu — u chabzu).
Vosieńniu 2022-ha Ivan udakładniaŭ u karystalnikaŭ profilnych mihracyjnych čataŭ pra sposaby zmachlaryć, kab praleźci ŭ Polšču pa skončanaj vizie i nie majučy farmalnych padstaŭ dla znachodžańnia: ni vučoby, ni pracy.
U Polšču jon usio ž trapiŭ.
U śniežni 2022-ha Miščuk pisaŭ u mihranckich čatach, što «tydzień tamu pierajechaŭ u Varšavu».
Paśla druhoha zajezdu jon pavialičyŭ svaju aktyŭnaść u čatach dyjaspary.
Jak hieroj filma Hajdaja, Miščuk-Mišyn byŭ hatovy i na piasočny karjer, i na cemientny zavod. Prahułka siemjami — Ja! Treba pieranieści rečy? — Ja! Prablema z technikaj? — Ja! Treba dadatkovy hulec u kamandu biełarusaŭ na «Mazhabojni»? — Ja!
Druhi raz Miščuk pryjechaŭ u Polšču ŭžo pa humanitarnaj vizie.
«Padkažycie, pry padačy ŭniosku i dakumientaŭ na VNŽ ci treba paznačać strachoŭku? Padajomsia na padstavie humanitarnaj vizy. Reč u tym, što maja žonka nie pracuje ciapier nidzie! Ci nieabchodna samim rabić strachoŭku?» — kansultavaŭsia jon u čatach u vieraśni 2023-ha. Humanitarnaja viza vydavałasia na hod, značyć, za niekalki miesiacaŭ da jaje zakančeńnia Miščuk-Mišyn mieŭ dumać ab praciahu lehalizacyi. Tady data atrymańnia vizy jakraz supadaje z druhim pryjezdam Miščuka ŭ Varšavu.
Što stała padstavaj dla vydačy humanitarnaj vizy, my nie viedajem. Polskija dziaržaŭnyja orhany nie razhałošvajuć takoj infarmacyi.
Ale Miščuk nikoli nie mieŭ «palityčnych» administratyvak ci kryminałak. Niama nijakich śviedčańniaŭ, što jon choć jak udzielničaŭ u padziejach 2020-ha.
Abmiežavańnie dostupu biez abmiežavańnia mahčymaściaŭ
Jak vyśvietliła «Naša Niva», jak i ŭ vypadku z mužam Volhi Siamaški, sieksot Ivan Miščuk pryciahnuŭ uvahu «kontrraźviedčykaŭ» «Bajpoła» jašče prynamsi ŭ druhoj pałovie 2023-ha. Voś tolki, jak i vypadku Fiodara Harbačova-Makaviejeva, daviedałasia pra heta vielmi vuzkaje koła ludziej.
Tady «Bajpoł» u asobie Alaksandra Azarava, jaki taksama trapiŭ na zdymki Miščuka, papiaredziŭ ab najaŭnaści dakumientaŭ prykryćcia ŭ Miščuka-Mišyna «Kibierpartyzanaŭ», Jaŭhiena Buraha, a taksama Ofis Cichanoŭskaj.
«AVVA pačała pravodzić bolš daskanałuju vieryfikacyju [partnioraŭ] paśla pačatku vajny va Ukrainie. Kali ŭ nas źjaviłasia mahčymaść praz našych partnioraŭ praviarać ludziej, u tym liku pa fota, hety čałaviek byŭ pravierany. Było vyjaŭlena i paćvierdžana partniorami, što jon maje dva pašparty. Hetaja infarmacyja adrazu była aficyjna pieradadzienaja nami ŭ adpaviednyja struktury Polščy. Taksama nam viadoma, što hetaja infarmacyja była pieradadzienaja Alaksandram Azaravym u vyhladzie dakładnoj zapiski ŭ Ofis Śviatłany Cichanoŭskaj. Paśla taho, jak nam stała viadoma pra dva pašparty, my nie źviartalisia da pasłuh hetaha čałavieka i bolš ź im nie supracoŭničali», — patłumačyŭ «Našaj Nivie» Jaŭhien Bury.
Bury patłumačyŭ taksama, što ŭsie ŭdzielniki adkrytych mierapryjemstvaŭ AVVA papiaredžvalisia, što na iventach budzie adbyvacca fatahrafavańnie, i davali zhodu na heta. Na niepubličnych mierapryjemstvach ABBA, kaža Bury, Miščuka nie było.
«Ja ź im pracavała adzin raz i paru hadzin. Asabliva ničoha nie pytaŭsia, pra siabie taksama nie raskazvaŭ. Zdymaŭ biaspłatna», — raskazała «Našaj Nivie» Alina Koŭšyk.
«Adzin raz naniała jaho dla asabistych prafiesijnych fotazdymkaŭ, paśla rekamiendacyi na adnym mierapryjemstvy demsiłaŭ, dzie jon zdymaŭ. Paśla zdymak mnie skazali, što jon, mahčyma, maje niejkija suviazi z režymam, tamu my z kaleham praanalizavali hetuju situacyju: što kazaŭ, kudy chadzili zdymacca, jakuju spasyłku na fota skinuŭ — ničoha «takoha» nie znajšli. Bolš raskazvaŭ pra siabie i jak jaho lubiać klijenty», — skazała «Našaj Nivie» pradstaŭnica «Kibierpartyzan» Julijana Šamietaviec.
Takoje «abmiežavanaje vykryćcio» ahienta — ale biez apubličvańnia taho, što ŭ jaho isnuje druhi pašpart, — choć i zakryła fatohrafu darohu ŭ niekatoryja koły, nie mieła realnych praktyčnych nastupstvaŭ. Ivan Miščuk-Mišyn dahetul znachodzicca ŭ Polščy i zdymaje ekspataŭ na paru sa svajoj žonkaj Julijaj, aktyŭna znajomicca ź mihrantami ŭ čatach. Mahčyma, jašče i žyvie ŭ statusie abaronienaha palityčnaha ŭciekača.
Tak, Miščuk fatahrafavaŭ Dzień Voli — 2023 u Varšavie.
«Jon nasamreč šmat nazdymaŭ, a potym razasłaŭ link na zahruzku fota mnohim aktyvistam, jakich viedaŭ asabista, kab jany siarod masiva fota šukali siabie», — skazaŭ «Našaj Nivie» adzin z atrymalnikaŭ takoha lista.
Redakcyja «Našaj Nivy» ŭ pracesie padrychtoŭki materyjału pacikaviłasia ŭ Ivana Miščuka, što jon zdymaje.
«Časta zdymaju na mierapryjemstvach roznaha rodu: iventy zabaŭlalnaha ci biznes-charaktaru. Pracuju pa Varšavie i na vyjezd pa Polščy. U asnoŭnym pracuju z ruskamoŭnymi», — adkazaŭ nam Miščuk.
Paśla hetaha my adpravili jamu pytańni ab abstavinach źjaŭleńnia jahonaha alter-eha: dla vykanańnia jakoha zadańnia jon atrymlivaŭ pašpart prykryćcia, ci paviedamlaŭ polskim śpiecsłužbam ab fakcie svajoj viarboŭki, jakuju infarmacyju paviedamlaŭ u Biełaruś, čym matyvavaŭ patrebu ŭ humanitarnaj polskaj vizie.
Vytrymaŭšy paŭzu, Miščuk adkazaŭ frazaj «U vas pamyłkovaja infarmacyja», paśla čaho pierastaŭ adkazvać na paviedamleńni.
Pašpart prykryćcia, vydadzieny na imia Ivana Mišyna, pry praviercy na sajcie biełaruskaha MUS 24 maja 2025 adlustroŭvaŭsia jak «aktyŭny». Adpaviedna — apieratyŭnaje zadańnie Miščuka praciahvajecca.
Kali vam važna toje, što robić «Naša Niva», padtrymajcie nas praz Patreon, praz Pejpoł, abo pieradaŭšy Redakcyi ich lubym inšym zručnym dla vas sposabam, praz tych redaktaraŭ i žurnalistaŭ «Našaj Nivy», jakich vy viedajecie asabista. A jašče — padkazvajcie nam, na što źviarnuć uvahu, i pieradavajcie infarmacyju znutry Biełarusi praz telehram @nn_editor abo na mejł [email protected]. Abo tym z redaktaraŭ i žurnalistaŭ «NN», jakich viedajecie asabista.
«Naša Niva» — bastyjon biełaruščyny
PADTRYMAĆCiapier čytajuć
Fatohraf-ahient z dvuma pašpartami zdymaje biełarusaŭ i ich mierapryjemstvy ŭ Varšavie10
Kamientary
Karaciej, pytańniaŭ da ŭładalnikaŭ infy ab prysutnaści saksota bolej, čym da samoha saksota. Ź im i tak jasna, što hetamu altruistu za biaspłatnyja fotasiesii płaciła hebnia.
P.s. Arhanizatary, chto jaho najmaŭ - taksama papiaredžvajcie svaich naviednikaŭ, što za aparatam byŭ pacuk. Mo kaho z bekhraŭndam 2020, 2022 vyratujecie ad pajezdki ŭ Biełaruś u łapy režymu.
P.r.s. Tema surjoznaja, ale nie mahu nie zapytacca: finskaha pašparta na imia Vile Chaapasała ŭ hetaha małarosa Miščuka ź Zialonaha Klina vypadkova nie znajšli?) Vielmi padobny.