«Ciapier zbroja vajny — kłavijatura». Brytanija vydatkuje 1 miljard funtaŭ na madernizacyju kibiervojskaŭ

Na vajnie XXI stahodździa kłavijatura kampjutara moža stać paŭnavartasnaj i vielmi niebiaśpiečnaj zbrojaj, papiaredziŭ ministr abarony Vialikabrytanii Džon Chili: ź jaje dapamohaj praciŭnik moža nanieści ekanomicy krainy škodu ničym nie mienšuju (a to i bolš maštabnuju), čym prycelnym udaram artyleryi.

Tolki za apošnija dva hady brytanskim uładam daviałosia raźbiracca prykładna z 90 tys. kibieratak, tak ci inakš źviazanych z zamiežnymi śpiecsłužbami, udakładniŭ ministr — u pieršuju čarhu havorka idzie pra chakieraŭ z Rasii i Kitaja.

U pieršuju čarhu novaje kibierkamandavańnie zojmiecca maštabnaj madernizacyjaj sistem naviadzieńnia i kaardynacyi vajskovych padraździaleńniaŭ z dapamohaj technałohij na asnovie štučnaha intelektu (AI), asnoŭnaja zadača jakich — paskoryć pryniaćcie rašeńniaŭ na poli boju. Tolki na ich raspracoŭku ŭ brytanskim biudžecie praduhledžany 1 młrd funtaŭ (1,3 młrd dalaraŭ) z amal 60 młrd, jakija ŭ biahučym hodzie płanujecca vydatkavać na abaronu ŭ cełym. Nieabchodnaść naśpiełaj madernizacyi stała vidavočnaj u chodzie nazirańnia za rasijskim uvarvańniem va Ukrainu, dzie anałahičnyja AI-technałohii (i adpaviednaje PZ) ciapier aktyŭna vykarystoŭvajuć USU — dla paskareńnia vyjaŭleńnia i paražeńnia rasijskich vajskovych abjektaŭ.

Miarkujecca, što stvarajemaja struktura budzie taksama hrać viadučuju rolu na radyjoelektronnym froncie — ad kaardynacyi namahańniaŭ pa pierachopie kamunikacyj praciŭnika da hłušeńnia bieśpiłotnikaŭ. Pra ŭsie hetyja ambicyjnyja płany Džon Chili raspavioŭ žurnalistam padčas vizitu ŭ Koršem, dzie raźmiaščajecca štab-kvatera brytanskich kibiernietyčnych vojskaŭ.

Mienavita hetamu padraździaleńniu, pavodle słoŭ ministra, pryśviečana asnoŭnaja častka jaho dakłada pa vynikach Stratehičnaha abaronnaha ahladu (SAA), poŭny tekst jakoha pavinien być apublikavany ŭ paniadziełak 2 červienia.

Dakumient, jaki Chili z honaram nazvaŭ «pieršym u svaim rodzie», byŭ zamoŭleny ŭžo ŭradam lejbarystaŭ — nieŭzabavie paśla ich pieramohi na letašnich vybarach.

Vysnovy SAA paŭpłyvajuć na asnoŭnyja pryjarytety dadatkovaha biudžetnaha finansavańnia — bo vydatki na abaronu ŭrad paabiacaŭ davieści da 2,5% VUP užo da krasavika 2027 hoda.

Adnak hienieralny sakratar NATA Mark Rute zaklikaje sajuźnikaŭ davieści vydatki na abaronu chacia b da 3,5% ad VUP. U lutym premjer-ministr Kir Starmier zapeŭniŭ brytancaŭ, što pavialičvać vajskovyja vydatki płanujecca nie za košt skaračeńnia sacyjalnaj dapamohi nasielnictvu, a vyklučna za košt pieraraźmierkavańnia vydatkaŭ, užo zakładzienych u biudžet dla dapamohi zamiežnym krainam.

Ciapier stała zrazumieła, jak mienavita ŭrad choča vydatkavać dadatkovyja asihnavańni. Jany pojduć na stvareńnie novaj ličbavaj sietki ŭkazańnia met, jakaja budzie zabiaśpiečvać vajskoŭcam na ziamli apieratyŭnaje atrymańnie ŭsioj nieabchodnaj im infarmacyi adnačasova — sa spadarožnikaŭ, samalotaŭ i bieśpiłotnikaŭ.

Jak pakazvaje vopyt ukrainskaj vajny, heta istotna paskaraje jak vyjaŭleńnie vajskovych abjektaŭ praciŭnika, tak i apieratyŭnaje reahavańnie na vyjaŭlenuju pahrozu.

U Koršemie, adnak, asnoŭnuju ŭvahu ministr abarony nadaŭ pačaščanym u apošni čas kibieratakam z-za miažy. Pavodle słoŭ ekśpiertaŭ, raście nie tolki častata chakierskich atak, ale i ŭzrovień ich vynachodlivaści.

Naprykład, niadaŭna supracoŭniki kibiernietyčnych vojskaŭ dapamahli vyjavić i zabłakavać škodnasnuju prahramu, adpraŭlenuju brytanskim vajskoŭcam, što niadaŭna viarnulisia z zamiežnaj kamandziroŭki.

Pavodle słovaŭ kamandavańnia, krynica škodnasnaha PZ brytanskim śpiecsłužbam dobra viadomaja, i znachodzicca jana na terytoryi Rasii.

Pradstaŭniki abaronnaha viedamstva taksama paćvierdzili, što brytanskija vajskoŭcy pravodziać i svaje ŭłasnyja nastupalnyja kibierataki. Chili nazvaŭ heta śviedčańniem taho, jak mocna źmianiŭsia ŭ apošni čas sam charaktar vajennych dziejańniaŭ.

«Ciapier zbroja vajny — kłavijatura, i my pavinny prymać heta pad uvahu i niejak reahavać», — reziumavaŭ jon.

• 1
• 0
• 0
• 0
• 0
• 0
• 0
• 0