«Patryjatyčny» fond Mikałaja Karpiankova dla školnikaŭ, padobna, finansujecca «Intehrałam»
Fond «Maładaja hvardyja» pracuje krychu bolš za hod i zajmajecca «patryjatyčnym vychavańniem» školnikaŭ u kłubach na bazie Unutranych vojskaŭ MUS. Vydańnie «Lusterka» pry dapamozie Belpol atrymała dakumient, padpisany kamandujučym unutranymi vojskami Mikałajem Karpiankovym. Jon raskryvaje niekatoryja detali finansavańnia hetaj arhanizacyi.
«Prašu razhledzieć mahčymaść akazańnia dapamohi»
List, jaki akazaŭsia ŭ rasparadžeńni «Lusterka», datavany 12 sakavika 2025 hoda. U im Mikałaj Karpiankoŭ źviartajecca asabista da ministra pramysłovaści Biełarusi Alaksandra Jafimava.
U pačatku jon vykazvaje «vialikuju ŭdziačnaść za padtrymku i praktyčnuju pracu, nakiravanuju na raźvićcio ŭnutranych vojskaŭ i ŭmacavańnie nacyjanalnaj biaśpieki Respubliki Biełaruś». Paśla apisvaje pracu patryjatyčnych kłubaŭ i fondu «Maładaja hvardyja», jaki hetyja kłuby padtrymlivaje:
«Arhanizujucca i pravodziacca mierapryjemstvy patryjatyčnaj nakiravanaści ŭ navučalnych ustanovach krainy i sumiesnyja mierapryjemstvy z kłubami i kadeckimi škołami Rasijskaj Fiederacyi, realizujucca miery pa padtrymcy siemjaŭ vajskoŭcaŭ i vychavancaŭ kłubaŭ, a taksama hramadzian, jakija znachodziacca ŭ ciažkaj žyćciovaj situacyi, u tym liku akazańnie im sacyjalnaj dapamohi».
Taksama fond «supravadžaje» vypusknikoŭ kłubaŭ da pastupleńnia ŭ VNU abo pačatku pracy.
«U suviazi z hetym, pavažany Alaksandr Uładzimiravič, viedajučy vas jak čałavieka dziaržaŭnaha myśleńnia, prašu razhledzieć mahčymaść akazańnia biazvypłatnaj (sponsarskaj) dapamohi fondu «Maładaja hvardyja», — źviartajecca Karpiankoŭ da ministra pramysłovaści.
Aŭtar lista nie nazyvaje dakładnuju sumu, jakuju čakaje atrymać ad pradpryjemstvaŭ, padparadkavanych Minpramu. Ale adznačaje, što srodki patrebnyja «na sistemnaj asnovie ŭ vyhladzie hrašovych srodkaŭ».
Karpiankoŭ prapanuje ministru samomu vyznačyć, jakija pradpryjemstvy buduć płacić. Adnak pytańnie ŭžo «papiarednie ŭzhodnienaje» z dyrektaram AAT «Intehrał» Andrejem Bujnievičam.
«Pastajanny pamočnik u spravie patryjatyčnaha vychavańnia»
Adkazu na hety list u «Lusterka» niama, adnak nie vyklučana, što ministr daŭ zhodu i ŭzhadniŭ sponsarskuju dapamohu «Maładoj hvardyi» ad «Intehrała».
Z 15 sakavika 2025 hoda ŭ sacsietkach fondu stali źjaŭlacca fotaspravazdačy z ekskursijami školnikaŭ u formie na pradpryjemstva (da hetaha momantu prajšło try takija ekskursii).
16 sakavika dyrektar «Intehrała» Andrej Bujnievič i dva jahonyja namieśniki naviedali vajskova-patryjatyčny kłub «Ryś» u vajskovaj čaści 3214. Ciapier ža aŭtary publikacyj u sacsietkach «Maładoj hvardyi» nie skupiacca na epitety: nazyvajuć «Intehrał» «honaram krainy» i «pastajannym pamočnikam dabračynnaha fondu ŭ spravie patryjatyčnaha vychavańnia i navučańnia». A jaho kiraŭnikoŭ — «hanarovymi haściami». Choć da sakavika 2025 hoda ni razu nie zhadvali hetaje pradpryjemstva.
12 krasavika ŭ Biełarusi prachodziŭ respublikanski subotnik. Na im kamandavańnie ŭnutranych vojskaŭ MUS, dzieci z vajskova-patryjatyčnych kłubaŭ i supracoŭniki «Intehrała» pracavali razam — «u adzinym paryvie» prybirali terytoryju skviera Marata Kazieja ŭ Minsku.
Što za «Maładaja hvardyja»?
Fond «Maładaja hvardyja» źjaviŭsia ŭ mai 2024 hoda. Jon abjadnaŭ usie vajskova-patryjatyčnyja kłuby na bazie struktur unutranych vojskaŭ MUS, ciapier ich užo 22.
Dyrektar — pamočnik kamandujučaha ŭnutranymi vojskami Siarhiej Hrabieńnikaŭ. Da jaho arhanizacyju ŭznačalvała analityk Biełaruskaha instytuta stratehičnych daśledavańniaŭ Hanna Vieruš. Jana taksama «člen Prablemnaha savieta Akademii kiravańnia pa hramadska-palityčnych navukach» i prafiesarka Rasijskaj akademii vajskovych navuk.
Zasnavalnik fondu — «Biełaruskaje tavarystva «Viedy», napisana ŭ rekłamnaj ulotcy, prykładzienaj da lista Karpiankova. Pry hetym u niekatorych pastach telehram-kanała arhanizacyi jaje zasnavalnikam nazyvajuć kiraŭnika arhanizacyi «Viedy» Vadzima Hihina. Aficyjny adras «patryjatyčnaj» arhanizacyi supadaje z adrasam Nacyjanalnaj biblijateki, jakoj taksama kiruje Hihin.
Farmalna fond nie maje viedamasnaj padparadkavanaści, havorycca ŭ danych arhanizacyi z Adzinaha dziaržaŭnaha rejestra jurydyčnych asob.
U skład apiakunčaj rady «Maładoj hvardyi» ŭvajšli «pradstaŭniki ŭsich zacikaŭlenych viedamstvaŭ, palityki, rabotniki ŚMI i pradprymalniki» — usiaho 13 čałaviek. Ich imiony nie paviedamlali, ale ŭ momant adkryćcia fondu siarod haściej byli, naprykład, kiraŭnik Biełteleradyjokampanii Ivan Ejsmant i pieršaja namieśnica staršyni Minharvykankama Nadzieja Łazarevič.
Jakaja rola Karpiankova ŭ hetaj arhanizacyi — z dastupnych danych niezrazumieła. Adnak mienavita jon abjaŭlaŭ pra stvareńnie «Maładoj hvardyi» i vinšavaŭ arhanizacyju z hadavinaj. Taksama Karpiankoŭ rehularna prysutničaje na jaje mierapryjemstvach.
Ciapier čytajuć
Šasnaccać hradusaŭ. Rasijski karespandent paskardziŭsia, što źmierz u łukašenkaŭskim pałacy15
Šasnaccać hradusaŭ. Rasijski karespandent paskardziŭsia, što źmierz u łukašenkaŭskim pałacy
«Svoj nos ź Biełastoka jany nie vysoŭvajuć». Biełarusy Padlašša skardziacca, što biełarusy novaj chvali emihracyi nie zacikaŭlenyja supolnymi spravami3939
Kamientary