Andrej Pavuk pryjšoŭ na prajd u Vilni ŭ formie milicyjanta z čyrvona-zialonym ściaham. Čamu?
Błohier Andrej Pavuk raskazaŭ «Našaj Nivie», jak reahavali na čyrvona-zialony ściah inšyja biełarusy na prajdzie ŭ Vilni, a taksama arhanizatary šeścia i litoŭskaja palicyja.
Učora ŭ Vilni adbyŭsia Baltic Pride 2025. U maršy «Za roŭnaść!» pryniało ŭdzieł kala 20 tysiač čałaviek. Była i biełaruskaja kałona, jakaja niesła bieł-čyrvona-bieły ściah. U joj vyłučaŭsia Andrej Pavuk, jaki pryjšoŭ z čyrvona-zialonym ściaham. Da svajho vobrazu błohier dadaŭ kiciel, jaki ŭpryhožyŭ bancikam sa stužački ŭ kolerach viasiołki.
Andrej Pavuk prakamientavaŭ «Našaj Nivie», čamu vyrašyŭ źjavicca na prajdzie mienavita ŭ takim vyhladzie.
«Pa-pieršaje, heta była mahčymaść ujavić, jak b mahli prachodzić ŁHBT-prajdy ŭ Biełarusi, kali b była palityčnaja vola kiraŭnictva na heta. Heta byŭ by tryumf raŭnapraŭja i pravoŭ čałavieka. Pa-druhoje, ja hieteraseksuał, jaki pryjšoŭ na prajd z čyrvona-zialonym ściaham — i ad hetaha ničoha ŭ mianie ŭ žyćci nie źmianiłasia. Ja zastaŭsia takim samym čałaviekam, jak i byŭ. Majoj misijaj było pakazać, što łukašenkaŭskija simvały mohuć być na prajdzie i ad hetaha ničoha nie źmienicca».
Andrej kaža, što jaho niekalki razoŭ sprabavali spynić. Spačatku da jaho padychodzili dziaŭčaty, jakija pradstavilisia arhanizatarkami mierapryjemstva — jany prasili prybrać čyrvona-zialony ściah.
«Jany kazali niešta pra toje, što treba było zahadzia padavać zajaŭku na vykarystoŭvańnie takoj simvoliki. Ja spytaŭ, na jakuju normu zakanadaŭstva jany spasyłajucca — jany ničoha nie zmahli adkazać».
Dvojčy da biełarusa padychodzili i supracoŭniki palicyi, jakija cikavilisia tym, navošta Andrej pryjšoŭ mienavita z takim ściaham.
U inšych biełarusaŭ pytańni taksama ŭźnikali.
«Była žančyna, jakaja padbiehła da mianie i skazała: «Mianie až zakałaciła! Što heta takoje? Vy što?!» Užo bicca lezła. Ja rastłumačyŭ, što ŭziaŭ čyrvona-zialony ściah, kab łukašysty zaŭvažyli hetu padzieju, napisali pra jaje. U vyniku jana mianie padtrymała. Jašče adzin chłopiec padyšoŭ i skazaŭ, što ja hamafob. Ale ŭ jakim miescy tut hamafobija? Kali my stali abmiarkoŭvać heta, jon zrazumieŭ mianie».
Andrej Pavuk padkreślivaje: nie treba dumać, što jon ŭbraŭsia ŭ milicyjaniera, bo byccam chacieŭ paraŭnać ich z hiejami. Jaho pierformans zusim nie takuju kancepcyju maje.
«Mnie chaciełasia źmiašać niesumiaščalnaje i pahladzieć na reakcyju — i zmaharoŭ, i jabaciek. I, kaniešnie, pryciahnuć uvahu da temy pravoŭ čałavieka».
Błohier ličyć, što prajd — heta dobraja nahoda dla palityčnych pierformansaŭ i łozunhaŭ.
«Sam prajd mnie vielmi padabajecca. Ja raniej byŭ kansiervataram — taksama bajaŭsia hetaha ŭsiaho. A heta zusim nie toje, pra što havoryć prapahanda. Cudoŭnaja atmaśfiera, ludzi radasnyja, usie ščaślivyja. Taki karnavał a-la Rya-de-Žaniejra. Nichto nikomu nie zyčyć zła — nu akramia viernikaŭ, jakija stajać z płakatami «Isus pakaraje vas!». Vielmi kłasna, ja nie adčuvaŭ nijakaj pahrozy na hetym mierapryjemstvie.
U Biełarusi ž na niejkim patryjatyčnym śviacie strašna — asabliva kali Łukašenka ŭdzielničaje. Snajpiery na dachach siadziać. Krok uleva ci ŭprava treba zapytvać, ci možna zrabić. Prajd — heta pra svabodu. Kali ty razumieješ, što ŭ Biełarusi hetaja tema tabujavanaja, a tut možaš pra heta kryčać, havaryć i navat usoŭvać simvały varožaj krainy (našaj). Dla mastaka heta dobraja nahoda zaniacca karysnaj pakazuchaj».
U Kientuki partret Ihara Šunieviča vynieśli na ŁHBT-parad FOTY
Biełarusy Šviecyi vyjšli na tamtejšy hiej-prajd z partretam Šunieviča
«Kolki možna heta ciarpieć?» 17 krain ES zaklikali Jeŭrakamisiju pakarać Vienhryju za parušeńnie pravoŭ ŁHBT
U Varšavie zatrymali šaściarych biełarusaŭ, jakija pratestavali suprać ŁHBT-parada
Kamientary