Minskuju Sierabranku čakajuć maštabnyja źmieny

Havorka idzie pra terytoryju ŭ miežach vuł. Vaniejeva — praśpiekta Rakasoŭskaha — vulicy Plachanava i Jakubava ahulnaj płoščaj 155,9 ha, na jakoj ciapier žyvuć bolš za 30 tysiač čałaviek. Adpaviedny horadabudaŭničy prajekt detalovaha płanavańnia praduhledžvajecca realizavać u dva etapy — da 2030-ha i da 2035 hoda, pišuć «Minsk-naviny».

Detali raskazała namieśnica načalnika ŭpraŭleńnia pa architektury i budaŭnictvie administracyi Leninskaha rajona Maryna Śmirnova.

Adna z asablivaściej Sierabranki — niedachop ustanoŭ hramadskaha charčavańnia, dzie možna było b nie tolki pasiadzieć ź filižankaj kavy, ale i pravieści volny čas u spakojnaj abstanoŭcy, źviarnuła ŭvahu Śmirnova.

U kvartale praśpiekta Rakasoŭskaha i 2-ha Viełasipiednaha zavułka ŭ bližejšyja piać hadoŭ źjavicca kafe farmatu «drajv». U bolš addalenaj pierśpiektyvie za tralejbusnym parkam uźviaduć šmatfunkcyjanalny hramadski kompleks z łakacyjami hramadskaha charčavańnia, kinateatram, kramami, dziciačaj hulniavoj zonaj, trenažornaj załaj. Pavodle raźlikaŭ horadabudaŭnikoŭ, u 13 novych ustanovach hramadskaha charčavańnia budzie 275 pasadačnych miescaŭ. Pry hetym płošča handlovaj sietki pašyrycca na 1 999 kv. m.

Na pieršym etapie zapłanavana ŭźvieści adzin šmatpaviarchovik na prasp. Rakasoŭskaha nasuprać byłoha ŭniviermaha «Paleśsie» (ciapier «Susiedzi»), druhi — u kancy vuł. Jakubava kala Minskaha haradskoha piedahahičnaha kaledža.

U nastupnym na terytoryi tralejbusnaha parka na vuł. Vaniejeva, jakaja padlahaje transfarmacyi, źjavicca žyły kvartał. Takim čynam, žyllovy fond u miežach detalovaha płana pavialičycca na 570 kvater i vyraście z 675,5 tys. da 708,8 tys. kv. m ahulnaj płoščy.

Z novych zbudavańniaŭ, jakija płanujecca ŭźvieści ŭ Sierabrancy, vyłučym niekalki. Da 2030-ha ŭ 2-m Viełasipiednym zavułku «prapišacca» pažarnaje depo, a jašče praź piać hadoŭ — try šmatuzroŭnievyja parkinhi. Pry hetym haražny kaapieratyŭ «Śvisłač-2008» padlahaje znosu z vypłataj uładalnikam kampiensacyi pa rynkavaj vartaści.

Samy rezanansny abjekt źjavicca pry realizacyi druhoha etapa detalovaha płana na skryžavańni vuł. Vaniejeva i Traścianieckaj — st. «Sierabranka» čaćviortaj linii mietrapalitena.

— U pierśpiektyvie my ŭbačym u hetym žyłym rajonie i samy praciahły bulvar ź piešachodnymi darožkami i małymi architekturnymi formami. Jaho dobraŭparadkujuć pa cotnym baku šmatkvaternych damoŭ praśpiekta Rakasoŭskaha pamiž płoščaj Vaniejeva i vulicaj Plachanava, — adznačyła surazmoŭca.

Niekatoryja abjekty paśla rekanstrukcyi źmieniać svajo pryznačeńnie. U pryvatnaści, daŭno pustujučy dziciačy sad na prasp. Rakasoŭskaha, 46, pieraabstalujuć u administracyjny budynak Dziaržaŭnaha kamiteta sudovych ekśpiertyz. Taki ž na prasp. Rakasoŭskaha, 38, pieratvorycca ŭ šmatfunkcyjanalny hramadski abjekt.

Uzdoŭž prasp. Rakasoŭskaha praduhledžvajecca dobraŭparadkavać samy praciahły ŭ žyłym rajonie bulvar.

Prajezd z vuł. Plachanava pamiž haražnym kaapieratyvam i paliklinikaj № 18 nabudzie status zavułka z paŭnacennym tratuaram, azielanieńniem i aśviatleńniem.

Nie abyduć uvahaj i dvarovyja terytoryi. Pavodle mierkavańnia horadabudaŭnikoŭ, ich patencyjał vykarystoŭvajecca nie całkam. Dla stvareńnia bolš pryvabnaj prastory praduhledžvajecca ŭładkavańnie placovak dla adpačynku i zaniatkaŭ sportam dla žycharoŭ usich uzrostavych hrup. Praca ŭ hetym napramku budzie pravodzicca paetapna sumiesna z ŽKH rajona, udakładniła Śmirnova.

Hramadskaje abmierkavańnie horadabudaŭničaha prajekta zaviaršyłasia 21 maja.

— U cełym budučyja pieraŭtvareńni ŭspryniaty stanoŭča, asobnyja zaŭvahi nasili łakalny charaktar. Naprykład, adna z žycharak rajona paprasiła razhledzieć mahčymaść budaŭnictva darožki ad doma sastarełych da vieładarožki. Hučali i supraćlehłyja punkty hledžańnia nakont budaŭnictva, rekanstrukcyi, znosu taho ci inšaha abjekta, — raspaviała Śmirnova.

• 0
• 2
• 1
• 2
• 0
• 0
• 2
• 0