Jeŭrapiejskaja kamisija płanuje zabaranić jeŭrapiejskim terminałam dla pryjomu zvadkavanaha pryrodnaha hazu (ZPH) absłuhoŭvać rasijskich klijentaŭ. Heta abmiežavańnie moža ŭstupić u siłu z 1 studzienia 2026 hoda. Pra heta paviedamlajecca ŭ prajekcie rašeńnia, jaki płanujuć apublikavać 17 červienia, piša Reuters.
Dla ŭžo dziejnych kantraktaŭ praduhledžvajecca adterminoŭka na hod — da 17 červienia 2026 hoda, a poŭnaje spynieńnie pracy z rasijskimi kampanijami pavinna adbycca nie paźniej za 31 śniežnia 2027 hoda.
Taksama imparciory hazu buduć abaviazanyja raskryvać infarmacyju pra pachodžańnie paliva, kab dakazać, što jano nie rasijskaha pachodžańnia. Heta nieabchodna dla taho, kab jeŭrapiejskija mytnyja i enierhietyčnyja orhany mahli kantralavać vykanańnie zabarony.
U dakumiencie adznačajecca, što kali haz dakładna maje rasijskaje pachodžańnie, to impart zabaronieny, a ŭ inšych vypadkach imparciory pavinny padavać dakumienty, jakija paćviardžajuć jaho inšaje pachodžańnie.
U 2024 hodzie ES impartavaŭ z Rasii kala 25 miljardaŭ kubamietraŭ zvadkavanaha hazu — udvaja mienš, čym z ZŠA. Pry hetym pastaŭki rasijskaha ZPH u ES pavialičylisia, u adroźnieńnie ad pastavak pa trubapravodach, jakija źnizilisia z 155 da 40 miljardaŭ kubamietraŭ z 2021 hoda.
ES stavić metu — całkam admovicca ad rasijskich enierharesursaŭ da kanca 2027 hoda, u tym liku jak pa doŭhaterminovych damovach, tak i pa spotavych kantraktach.
Kamientary
Pff, da 2028 Pucina całkam zadavalniaje.
Nahadaju, što ŭ 2024 JEZ nabyŭ u Rasiei naftapraduktaŭ na 21.3 miljard. A Ŭkrainie dapamoh na 16.