Na zarobki ŭ Polšču ciapier tolki z DNŽ? Razabralisia, chto moža pracaŭładkavacca tam pa novych praviłach
Paśla taho, jak stała viadoma pra źmieny ŭ polskim mihracyjnym zakanadaŭstvie, pačali źjaŭlacca čutki pra toje, što nibyta ciapier zamiežniki bieź miascovaha DNŽ nie mohuć uładkavacca na pracu ŭ Polščy. Razabralisia, jak nasamreč.
Tolki dva typy viz dajuć prava na pracu ŭ Polščy
Biełarusam uładkavacca na pracu ŭ Polščy stała sapraŭdy značna składaniej, navat kali ŭžo jość viza, pa jakoj možna lehalna znachodzicca ŭ krainie.
Vyklučeńnie — viza, atrymanaja pa karcie palaka. Ich trymalniki pa-raniejšamu mohuć aficyjna pracavać u Polščy biez atrymańnia dazvołu na pracu i zajmacca pradprymalnickaj dziejnaściu na tych ža ŭmovach, što i hramadzianie Polščy.
Uładalniki ŭsich inšych typaŭ viz, akramia pracoŭnaj, bolš nie mohuć atrymać dazvoł na pracu i, adpaviedna, pracavać u Polščy.
Tym nie mienš, sam instytut pracoŭnych viz zastaŭsia, i najaŭnaść DNŽ nie źjaŭlajecca abaviazkovym patrabavańniem dla dostupu na rynak pracy Polščy, jak heta adbyvajecca ŭ Litvie.
Tamu biełarusy, jak i raniej, mohuć aficyjna pracavać u Polščy pa pracoŭnaj vizie. Ale atrymać jaje nie tak prosta, jak heta było raniej.
Chutka prystupić da pracy nie atrymajecca
Vizavaja ekśpiertka i redaktarka Visaflow.live Anastasija Łysakoŭskaja kaža, što,
kab zapisacca na padaču na vizu ŭ Minsku, u ludziej sychodzić ad 4 da 6 miesiacaŭ.
U Breście i Hrodnie praściej. Tam realna zapisacca na vizu za adzin-dva, maksimum try miesiacy.
Ekśpiertka raić biełarusam pry pieršaj mahčymaści padavać dakumienty na atrymańnie časovaha DNŽ na padstavie pracy. U Polščy razhlad zajavy na atrymańnie DNŽ ciapier zajmaje šeść i bolš miesiacaŭ.
Paśla padačy dakumientaŭ na atrymańnie DNŽ u pašpart staviać admysłovy štamp, ź jakim možna zakonna zastavacca ŭ Polščy navat paśla zakančeńnia terminu vizy. Ale vyjazdžać u inšyja krainy ES ź im nielha, tamu taki varyjant padychodzić nie ŭsim — asabliva dalnabojščykam, dla jakich vyjezd za miežy Polščy — častka pracy.
Z takim štampam možna vyjechać na radzimu, ale dla viartańnia ŭ Polšču treba budzie mieć novuju vizu, bo adnaho štampa, jaki paćviardžaje fakt padačy na DNŽ, niedastatkova dla ŭjezdu ŭ Polšču.
Mnohija pracoŭnymi vizami sapsavali sabie vizavuju historyju
Ale prablemy z zapisam — heta nie adzinaja składanaść. Łysakoŭskaja adznačaje, što pavialičyłasia kolkaść admoŭ pry vydačy pracoŭnych viz.
«Kali ciaham apošnich hadoŭ u čałavieka była pracoŭnaja viza, i jon nie karystaŭsia joj pa metavym pryznačeńni, to pry novaj padačy na pracoŭnuju vizu z 99% vierahodnaściu budzie admova», — kaža Łysakoŭskaja.
Asabliva ŭ 2022 — pačatku 2024 hoda biełarusy niaredka adkryvali pracoŭnyja vizy, nie płanujučy ŭładkoŭvacca na pracu ŭ Polščy. Takaja viza rabiłasia chutka, fejkavaje zaprašeńnie kaštavała niadoraha, a sama viza, jak praviła, vydavałasia adrazu na hod.
Ciapier kali taki čałaviek sapraŭdy zachoča pracavać u Polščy, to ŭ jaho heta naŭrad ci atrymajecca.
Taksama Anastasija Łysakoŭskaja miarkuje, što kali čałaviek atrymaje pracoŭnuju vizu, ale nie ŭładkujecca na pracu, to takuju vizu davoli chutka anulujuć. Na heta ŭkazvaje abaviazak pracadaŭcy paviedamlać adpaviednym orhanam ab niajaŭcy na pracu ci zvalnieńni. Pa novym zakonie, polskaha pracadaŭcu čakaje štraf da 5000 złotych (kala 1170 jeŭra) za niepadaču danych pra zamiežnaha rabotnika, jaki bolš nie pracuje ŭ jaho.
Pierajechać u Polšču ź inšaj krainy ES taksama stała składaniej
Jašče adna katehoryja biełarusaŭ, jakija apynulisia ŭ pralocie, — trymalniki DNŽ inšych krain Jeŭrasajuza. Da 1 červienia 2025 hoda biełarusy, jak i inšyja zamiežniki z trecich krain, mieli mahčymaść pryjechać u Polšču ź dziejnym DNŽ abo PMŽ, vydadzienym luboj inšaj krainaj ES, atrymać dazvoł na pracu, prystupić da jaje i paśla padavać dakumienty na atrymańnie polskaha DNŽ na padstavie pracy.
Ciapier taki kiejs dastupny tolki dla asob, jakija karystajucca pravam mabilnaści na terytoryi Polščy. Pad ich, pry peŭnych umovach, mohuć trapić uładalniki DNŽ typu EU Blue Card i statusu pastajannaha rezidenta ES.
To-bok kali ŭmoŭny ajcišnik ci inšy vysokakvalifikavany śpiecyjalist z Blue Card zachoča pierajechać u Polšču, naprykład, z Bałharyi abo Litvy, to ŭ jaho heta moža atrymacca. A voś budaŭnik ci kiroŭca-dalnabojščyk takoj mahčymaści bolš nie maje.
Ciapier umoŭny budaŭnik abo dalnabojščyk, kab źmianić krainu pracy na Polšču, musić spačatku atrymać polskuju pracoŭnuju vizu i ŭžo na jaje padstavie prystupać da pracy ŭ Polščy. Hetyja novaŭviadzieńni značna ŭskładniajuć pierajezd u Polšču pa pracy ź inšych krain ES.
Kamientary
Ili u mienia informacija ustarievšaja ili u nn niepravdivaja.