Frydman: Trampa całkam zadavolić aŭtarytarny režym u Minsku, jaki praciahnie aryjentavacca na Rasiju
Palityčny analityk Alaksandr Frydman padzialiŭsia svaimi razvahami nakont novaj stratehii nacyjanalnaj biaśpieki ZŠA i roli ŭ joj Biełarusi.
Tym, chto spadziajecca na toje, što ŭmiašańnie ZŠA moža kardynalna źmianić situacyju abo zamiežnapalityčny kurs krainy, maje sens aznajomicca z apublikavanaj na minułym tydni «Stratehijaj nacyjanalnaj biaśpieki». Biełaruś u joj, zrazumieła, naŭprost nie zhadvajecca, adnak dakumient źmiaščaje ceły šerah punktaŭ, jakija dazvalajuć zrazumieć mety i pryjarytety amierykanskaj palityki.
Takim čynam, ZŠA ŭvažajuć za svaju zadaču źnižeńnie ryzyki pramoha supraćstajańnia pamiž Rasijaj i jeŭrapiejskimi krainami i majuć namier prykłaści namahańni dla adnaŭleńnia «stratehičnaj stabilnaści» ŭ dačynieńniach z Rasijaj. Kali ŭ vypadku Ukrainy havorka idzie naŭprost pra paślavajennaje adnaŭleńnie i nieabchodnaść jaje vyžyvańnia jak «žyćciazdolnaj dziaržavy», to dla Biełarusi, jakuju Maskva zaličvaje da «zony svaich pryvilejavanych intaresaŭ», amierykanskaje imknieńnie da «stratehičnaj stabilnaści» ŭ dačynieńniach z Rasijaj naŭrad ci abiacaje niešta dobraje. Z vysokaj dolaj vierahodnaści heta aznačaje pryznańnie rasijskaj daminacyi ŭ hetym rehijonie Jeŭropy.
Heta, adnak, nie aznačaje, što na Biełaruś u pryncypie nie budzie raspaŭsiudžvacca zajaŭleny ZŠA kurs na «ŭmacavańnie žyćciazdolnych dziaržaŭ Centralnaj, Uschodniaj i Paŭdniovaj Jeŭropy praz handlovyja suviazi, prodaž uzbrajeńniaŭ, palityčnaje supracoŭnictva, a taksama kulturnyja i adukacyjnyja abmieny».
Samym ža abnadziejlivym dla Łukašenki ŭ kancepcyi «hnutkaha realizmu» źjaŭlajecca pryncypovaja hatoŭnaść ZŠA supracoŭničać i padtrymlivać dobryja stasunki «z krainami, čyje sistemy kiravańnia i hramadski ŭkład adroźnivajucca ad našych», a taksama admova ad prasoŭvańnia demakratyčnych i inšych pieraŭtvareńniaŭ, «jakija istotna adroźnivajucca ad ich ułasnych tradycyj i historyj». Na taki padychod ułady Biełarusi spadziajucca z momantu ŭstalavańnia aŭtarytarnaha režymu ŭ 1990‑ia hady. I ciapier jany, zdajecca, dačakalisia svajho.
Zastajecca spadziavacca tolki na toje, što zbližeńnie Vašynhtona i Minska ŭ kantekście imknieńnia ZŠA zakončyć vajnu va Ukrainie pryviadzie da vyzvaleńnia palitviaźniaŭ u Biełarusi. I heta, badaj, adzinaje, što ZŠA mohuć prynieści na hetym etapie. U astatnim Vašynhton całkam zadavolić aŭtarytarny režym u Minsku, jaki praciahnie aryjentavacca na Rasiju, ale pry hetym budzie hatovy supracoŭničać z ZŠA.
Ciapier čytajuć
Połk Kalinoŭskaha paviedamiŭ pra hibiel troch bajcoŭ3
Kamientary