ZŠA abiacajuć pavialičyć pastaŭki zbroi Ukrainie, ale nastojvajuć na «samaabaronie Jeŭropy» ŭžo da 2027 hoda
Hety pavarot aznačaje kardynalnuju źmienu pravił hulni i zapuskaje dla Jeŭropy žorstki zvarotny adlik na fonie vajny va Ukrainie i niapeŭnaści, jakaja pavisła nad sistemaj transatłantyčnaj biaśpieki.
Administracyja Trampa ŭ kułuarnych razmovach daviała da jeŭrapiejskich sajuźnikaŭ, što Złučanyja Štaty bolš nie majuć namieru nieści na sabie asnoŭny ciažar kanviencyjnaj abarony aljansu paśla 2027 hoda. Pra heta vydańniu Kyiv Post paviedamili try krynicy, znajomyja sa źmiestam sakretnych pieramoŭ, što adbylisia na hetym tydni.
Zhodna ź infarmacyjaj, ahučanaj na bryfinhach dla jeŭrapiejskich kaleh u siaredzinie tydnia, čynoŭniki Pientahona adkryta zajavili: hałoŭnym pryjarytetam dla ZŠA budzie Inda-Cichaakijanski rehijon.
Było padkreślena, što Amieryka «nie moža vieści vajnu na dva fronty», tamu strukturnaja pieradača adkaznaści za abaronu kantynienta samoj Jeŭropie — pytańnie vyrašanaje i abmiarkoŭvacca jano nie budzie.
Ukraina ŭ centry ŭvahi
Niahledziačy na stratehičny razvarot, amierykanski bok zapeŭniŭ, što pastaŭki zbroi va Ukrainu praciahvajucca i navat pavialičacca ŭžo da kanca hetaha hoda. Heta demanstruje namier Vašynhtona trymać Kijeŭ uzbrojenym navat u pracesie pieraraźmierkavańnia ciažaru adkaznaści ŭnutry NATA.
Vysokapastaŭleny zachodni čynoŭnik, znajomy z chodam pieramoŭ, apisaŭ situacyju tak:
«Padtrymka Ukrainy zachoŭvajecca, ale Jeŭropa pavinna być hatovaja da NATA, u jakim Złučanyja Štaty bolš nie buduć aŭtamatyčnaj «siłaj chutkaha reahavańnia».
Inšy jeŭrapiejski dypłamat vykazaŭsia jašče bolš kateharyčna:
«Vašynhton kaža Jeŭropie, što era amierykanskaha daminavańnia ŭ NATA zakančvajecca — i terminy ŭžo vyznačanyja».
Karotki dedłajn i nastupstvy
Jeŭrapiejskim stalicam dali zrazumieć, što «siurpryzaŭ być nie pavinna». Kali da 2027 hoda Jeŭropa nie sfarmiruje ŭłasnuju strukturu kiravańnia ŭ ramkach aljansu, ZŠA hatovyja całkam samaŭchilicca ad klučavych pracesaŭ płanavańnia, u tym liku ad Madeli sił NATA (NFM) i Pracesu abaronnaha płanavańnia (NDPP).
Pakul što amierykanskija čynoŭniki praciahnuć udzieł u hetych pracesach, ale vyklučna dziela taho, kab sadziejničać pieradačy paŭnamoctvaŭ. Paśla 2027 hoda, jak adznačyŭ adzin z čynoŭnikaŭ, Jeŭropie daviadziecca «raźbiracca samoj», nie raźličvajučy na ŭdzieł ZŠA jak na niešta harantavanaje.
Vysokapastaŭleny supracoŭnik Rady biaśpieki adnoj ź jeŭrapiejskich krain acharaktaryzavaŭ pasłańnie amierykancaŭ jak «ćviordaje, kančatkovaje i adnaznačna stratehičnaje».
Mienš amierykancaŭ u štab-kvatery
Źmieny zakranuć i kadravy skład. Pientahon płanuje skaracić kolkaść vysokapastaŭlenych amierykanskich aficeraŭ u kamandnaj struktury NATA, vyzvaliŭšy hetyja miescy dla jeŭrapiejcaŭ.
Adnak adna klučavaja pazicyja zastajecca niedatykalnaj: Viarchoŭny hałoŭnakamandujučy abjadnanymi ŭzbrojenymi siłami NATA ŭ Jeŭropie (SACEUR) pa-raniejšamu budzie amierykancam. Heta zachoŭvaje centralny słup vajskovaj architektury aljansu.
Vašynhton patrabuje ad jeŭrapiejcaŭ nie prosta słoŭ, a «pravieranych dokazaŭ» taho, što jany naroščvajuć vajenny patencyjał. Układ ZŠA ŭ rehijanalnyja płany abarony budzie abmiežavany tolki tymi siłami (pastajannymi i ratacyjnymi), jakija ŭžo znachodziacca na jeŭrapiejskaj ziamli — biez pašyreńnia abaviazacielstvaŭ.
Jak reziumavaŭ adzin z zachodnich čynoŭnikaŭ: «Heta nie vyvad vojskaŭ. Ale heta kaniec staroj paradyhmy NATA».
Raptoŭna pamior Uładzimir Usier — niemałady aktyvist, jaki ŭlapaŭsia ŭ film BT i špijanaž u Polščy29
Kamientary
Sałodkija mary Kramla - vyvieści ZŠA ź jeŭrapiejskaje, a značycca suśvietnaje palityki, kali ŭžo nie ŭdajecca prymusić Jeŭropu skakać pad dudku Maskvy.
I Tramp hety kurs vykonvaje: robić Amieryku rehijanalnym pravincyjnym hulcom pa-za miežami intaresaŭ Rasii.
Spynili mižnarodnyja prahramy ŭdziełu ZŠA, ciapier i z NATO vyłaziać.
Možna skazać koratka: "My ŭciakajem za miežy kramloŭskich intaresaŭ".
Zaŭtra skažuć: "My ŭciakajem za miežy piekinskich intaresaŭ"