«Cichanoŭski svajoj žyviolnaj charyzmaj moža zaciamnić šmat kaho ź lidaraŭ». Šrajbman pra viartańnie Cichanoŭskaha
Jakaja palityčnaja budučynia Siarhieja Cichanoŭskaha i što čakaje adnosiny Biełarusi i ZŠA paśla vizitu śpiecpasłańnika Trampa ŭ Minsk? Analityk Bierlinskaha centra Karnehi Arciom Šrajbman vykazaŭ svajo bačańnie.
Što čakać ad Cichanoŭskaha
Razvažajučy ab matyvach vyzvaleńnia Siarhieja Cichanoŭskaha, Arciom Šrajbman kazaŭ pra «jezuicki raźlik» Łukašenki i jaho atačeńnia na toje, što heta moža pryvieści da razładu ŭ šerahach biełaruskich demakratyčnych sił.
«Ab tym, što jon isnuje, havaryŭ navat Siarhiej Cichanoŭski na svajoj pres-kanfierencyi. Heta nie było, ščyra kažučy, vyšejšaj matematykaj dahadacca da takoha choda», — zaŭvažaje Šrajbman u intervju jutub-kanału Carnegie Politika.
Pa słovach Šrajbmana, vybar mienavita Cichanoŭskaha moh być abumoŭleny tym, što «chacieli pasprabavać kinuć takoha vožyka — hladzicie, što vy budziecie z hetym rabić?».
Na pohlad analityka, Siarhiej Cichanoŭski adroźnivajecca ad usich astatnich palityčnych lidaraŭ 2020 hoda i błohieraŭ:
«Heta čałaviek vielmi takoj syroj, narodnaj, možna skazać papulisckaj, ale najpierš takoj ničym nie adfiltravanaj palityčnaj enierhii. Jon sapraŭdy vielmi zaradžany na baraćbu čałaviek».
Šrajbman dapuskaje, što Siarhieja mahli źmianić hady turmy, mahčyma, palityčnaja dziejnaść na emihracyi heta niejak źmienić. Adnak jaho pavodziny ŭ 2020 hodzie śviedčać ab tym, što
«heta čałaviek, jakoha možna spynić, tolki pasadziŭšy, zabiŭšy, niejak fizična spyniŭšy jaho palityčnuju dziejnaść. Čałaviek ź vielmi vialikim pierakanańniem u svajoj słušnaści, z takim zrazumiełym palityčnym eha. Adnaznačna palityčny lidar takoha, pryčym dastatkova aŭtarytarnaha typu».
Analityk dadaje, što mnohija ŭ 2020 hodzie bačyli ŭ Cichanoŭskim «niejki demakratyčny anałah maładoha Łukašenki, jaki idzie prosta ŭ sacyjalnuju hłybinku, da ludziej, jakija raniej hałasavali za Łukašenku, i takimi davoli žorstkimi, vostrymi łozunhami prykoŭvaje ich da siabie».
Ciapier, razvažaje Šrajbman, Cichanoŭski moža «jak minimum, zaciamnić šmat kaho ź lidaraŭ».
Ale ci budzie jon ź imi svarycca? Adkazu na heta pytańnie Šrajbman nie daje.
Ekśpiert upeŭnieny, što kanfliktu ŭsie buduć imknucca paźbiehnuć, bo jon nikomu ŭ demakratyčnym asiarodździ nie vyhadny.
Asnoŭnyja ryzyki, na pohlad Šrajbmana, zaklučajucca «chutčej nie ŭ tym, što ludzi svaracca pamiž saboj, a ŭ tym, što Siarhiej pryvyk da krychu inšaha palityčnaha pola ŭ 2020 hodzie, kali było mahčyma niešta rabić, było mahčyma mieć znosiny ź ludźmi, było aktyŭnaje hramadstva, jakoje nie było zapałochanaje».
Ciapier hramadstva inšaje, a palityki i błohiery ŭ emihracyi adrezany ad pajezdak pa rehijonach.
Ale Šrajbman miarkuje, što Cichanoŭski zdolny navučycca, bo da 2020-ha ŭ Cichanoŭskaha byŭ miedyjny biznes u niekalkich krainach.
Što źmienić vizit Kiełaha?
Analizujučy nastupstvy vizity śpiecpradstaŭnika prezidenta ZŠA Kita Kiełaha ŭ Minsk, Šrajbman źviartaje ŭvahu na słovy pradstaŭnika Biełarusi ŭ AAN Valancina Rybakova, jaki, miarkujučy pa ŭsim, arhanizavaŭ hety vizit, ab spadziavańniach na poŭnuju narmalizacyju adnosin z ZŠA.
Pieršaje, što moža adbycca, na pohlad analityka, heta adnaŭleńnie pracy amierykanskaha pasolstva, jakoje evakuiravałasia ź Biełarusi ŭ pačatku poŭnamaštabnaj vajny Rasii suprać Ukrainy.
Analityk taksama dapuskaje, što ŭ dalejšym mohuć jašče adbycca vizity vysokapastaŭlenych amierykanskich čynoŭnikaŭ u Minsk, u tym liku dziaržsakratara ZŠA Marka Rubia. Adnak nie ŭ bližejšy čas.
«Ci jość nahoda prosta ciapier u Rubia pryjazdžać? Dla mianie heta nie vidavočna. Zdajecca, što heta kali i adbudziecca, to tolki ŭ kantekście niejkaha prasoŭvańnia ŭ rasijska-ŭkrainskim treku. Kali heta ŭžo stanie nie prosta vizitam dvuchbakovym, dzie niechta pryjazdžaje da Łukašenki pahavaryć z Łukašenkam, a kali pryjazdžajuć u Minsk pahavaryć, mahčyma, z Łukašenkam, mahčyma, z kimści jašče pra bolš šyrokaje rehijanalnaje ŭrehulavańnie. Ci mahčyma heta? Pakul heta vyhladaje vielmi małavierahodna, tamu što pieramovy Rasii i Ukrainy ŭ tupiku ci, prynamsi, buksujuć.
Jany adbyvajucca ŭ Stambule, i heta dastatkova kamfortnaje miesca dla ŭsich. Što tut moža dać Łukašenka, dla mianie nievidavočna. Tamu, kudy raści aficyjnym kantaktam ZŠA, pakul ciažka zrazumieć».
U toj čas, jak zaŭvažaje, Šrajbman, šmat čaho moža być realizavana na nižejšym uzroŭni. Akramia adnaŭleńnia pracy pasolstvaŭ, mohuć być naładžany rehularnyja kanały kamunikacyi, u tym liku i vajennych:
«Jany isnavali raniej, byŭ vajskovy ataše ŭ Minsku. Možna zaprašać amierykancaŭ, jak heta ni hučała b siońnia dzika, na vajskovyja vučeńni. Tamu što Łukašenka lubić hetyja žesty takoj demanstratyŭnaj prazrystaści».
Na pohlad Šrajbmana, amierykanskaha vajskovaha ataše mohuć zaprasić na vučeńni «Zachad-2025».
Akramia hetaha, «mohuć pačać havaryć ab sankcyjach, ab niejkich kropkavych inviestycyjach ZŠA ŭ Biełarusi». Ale «tut jość vialikaje pytańnie, jaki amierykanski biznes zachoča iści ŭ takuju jurysdykcyju».
Akramia hetaha Biełaruś zacikaŭlena ŭ adnaŭleńni dostupu da avijazapčastak:
«Adnavić staŭleńnie ZŠA da zakupki avijacyjnaha abstalavańnia — heta było b, ja dumaju, taki win-win i dla administracyi Trampa, jakaja lubić u svajoj pracy [być] u niekatorym sensie, takim palityčnym eksparcioram svaich bujnych kampanij, tak i dla Minska».
Mienavita z hetaha, na pohlad Šrajbmana, možna było b pačać, a ŭžo zatym «iści ŭ nastupnyja zony sankcyjnaha cisku».
Adnak, zaŭvažaje analityk, bolš šyrokaha źniaćcia sankcyj ź Biełarusi składana ŭjavić bieź niejkaha takoha ž paralelnaha ruchu z Rasijaj.
«Bo ŭsio ž bolšaja častka sankcyj suprać Biełarusi prymałasia va ŭviazcy z vajnoj, va ŭviazcy sa sprobami abmiežavać dla Rasii mahčymaści abychodu jaje sankcyj, dostupu jaje VPK da zachodnich kampanientaŭ i hetak dalej.
I tamu ŭjavić sabie, što niechta, navat ZŠA, zachoča stvarać ź Biełarusi taki, jak skazać, afšor, praź jaki možna budzie zavozić usio, što zachočaš, u Rasiju, pakul jašče dziejničajuć sankcyi na Rasiju, heta budzie aznačać padryvać svaje ŭłasnyja ryčahi ŭździejańnia na Rasiju.
Tamu heta dla mianie vyhladaje vielmi dalokaj pierśpiektyvaj i, vidavočna, nie suvymiernaj tolki z vyzvaleńniem palitviaźniaŭ», — abhruntoŭvaje svoj pohlad Šrajbman.
Kamientary