5 lipienia ŭ biełaruski prakat vychodzić «F1» — błakbastar z Bredam Pitam pra samyja elitnyja honki ŭ śviecie. Što tam cikavaha, akramia topavaj zorki i darahich balidaŭ?
Stužka «F1» paznajomić vas z Sani Chiejzam — niekali viadomym honščykam, jakoha i hraje Bred Pit. U 90-ja Chiejz vystupaŭ u «Formule-1» i mieŭ niebłahija pierśpiektyvy, pakul strašnaja avaryja nie prymusiła jaho syści na pakoj.
Pabudavać žyćcio pa-za sportam Chiejzu nie ŭdałosia. Mužčyna ŭciahnuŭsia ŭ zaležnaść ad stavak, paciarpieŭ niaŭdaču ŭ troch šlubach i ŭ vyniku žyvie ŭ prościeńkim trejlery dy časam udzielničaje ŭ drobnych honkach.
Na ščaście, u Sani zachavalisia dobryja siabry, i adzin ź ich navat maje ŭłasnuju kamandu ŭ «Formule-1» pad zahadkavaj nazvaj APXGP. Voś tolki i tam nie ŭsio dobra: kamanda nie pakazvaje zajzdrosnych vynikaŭ, i inviestary hatovyja jaje pradać, kali nie ŭbačać pieramohi APXGP na adnym z hran-pry «Formuły-1». Zdajecca, u kamandy jość z kim dasiahać toj pieramohi, ale dośvied Chiejza byŭ by karysny.
Tamu Rubien (Chaŭjer Bardem), ułaśnik APXGP, prapanuje Sani miesca ŭ kamandzie. I, viadoma, toj nie admaŭlaje sabie ŭ zadavalnieńni znoŭ nyrnuć u atmaśfieru najlepšych honak u śviecie.
Hetaj atmaśfiery vam dakładna chopić. Adzin z pradziusaraŭ stužki — lehiendarny honščyk «Formuły-1» Ljuis Chemiłtan, a ŭ kadry, akramia Chemiłtana, možna pabačyć dziasiatki honščykaŭ i supracoŭnikaŭ hetaha turnira.
Šmat budzie i samich honak. Zdajecca, hetyja honki vartyja kožnaha z 250 miljonaŭ dalaraŭ, ź jakich składajecca biudžet «F1».
Tak što kali lubicie ekšn — adnaznačna biarycie kvitki. I navat kali honki — nie vaša, mocny akciorski duet Pita i Bardema dapamoža zrazumieć, čym ža ludziej tak vabić śviet «Formuły-1».
Na žal, u hetaj stužcy šmat nie tolki honak, ale i štampaŭ. Pad vokładkaj spartovaj dramy ŭ «F1» lohka paznać kłasičnuju historyju pra amierykanskuju maru. Takoj maraj dla Sani Chiejza byŭ navat nie pośpiech u honačnym śviecie, a sama atmaśfiera vialikich honak, pra što jon i raskazvaje ŭ filmie.
«F1» akazaŭsia adnym z tych filmaŭ, dzie stvaralniki sami nie viedajuć, što ž jany chočuć źniać. Tak, tut dastatkova ekšnu, i ŭ hetym płanie film sapraŭdy pracuje. Heta bačna i pa rejtynhach. Naprykład, na płatformie Rotten Tomatoes film nabraŭ rejtynh u 84% — nie hienijalna, ale i nie haniebna.
Ale bačna i sproby pajści hłybiej za sport, zarazić hledača fiłasofijaj honak. Rubien pytajecca ŭ Chiejza — maŭlaŭ, čamu ž nie tenis ci holf, što ž takoje ŭ hetym sporcie, što my pryśviacili siabie mienavita jamu? Z druhoha boku, toj fiłasofii ŭ stužcy tak mała, što hetyja ŭryŭki hłybokich dyjałohaŭ tonuć u biaskoncych hran-pry «Formuły-1».
Kab zrabić nie prosta jakasnaje, a vialikaje kino pra honki, mała prosta mieć 250 miljonaŭ dalaraŭ, Ljuisa Chemiłtana, dostup da trasy i niekalki fajnych balidaŭ. Scenar akazaŭsia słabym miescam novaj stužki — nastolki, što vyciahnuć hetuju historyju da šedeŭra nie ŭdałosia navat Bredu Pitu.
I ŭ toj ža čas «F1» — žyvoje kino, jakoje daje mahčymaść pravieryć niervy na tryvałaść i jakoje źbiare svaje hrošy ŭ kinateatrach. Voś tolki kłasikaj jamu nie być.
«Naša Niva» — bastyjon biełaruščyny
PADTRYMAĆCiapier čytajuć
Minski haradski sud nie vytrymlivaje nahruzki — nie paśpiavajuć sudzić palitviaźniaŭ6
Kamientary