«Nie znajšłosia lidara, zdolnaha heta zrabić». Labiedźka raskazaŭ, kali prajhrała demakratyja ŭ Biełarusi i pry čym tut Paźniak

Vydańnie spytała ŭ Labiedźki, jaki ŭ 1994-m na prezidenckich vybarach padtrymaŭ Alaksandra Łukašenku, što heta było: pamyłka maładości, pačatak kryzisu siaredniaha ŭzrostu?

— Nie-nie. Ja dumaju, što tam było ŭsio: ramantyzm, naiŭnaść i niejkaja pieradvyznačanaść ci asudžanaść. Ja heta tolki ciapier razumieju. I mahu skazać, kali my prajhrali. My prajhrali nie ŭ 1994 hodzie. Naša paraza była ŭ 1992-m.

Labiedźka kaža, što ŭ 1992 hodzie demakraty byli na piku papularnaści i ŭ zonie vialikich čakańniaŭ z boku vybarščykaŭ. Ludzi byli rasčaravany ŭ kamunistyčnaj namienkłatury i žadali pieramien. I hetyja žadańni nie moh zadavolić ni ŭrad Kiebiča, ni Viarchoŭny Saviet XXII sklikańnia, afarbavany ŭ koler čyrvonaha kamunistyčnaha ściaha.

— Tady była zapuščana inicyjatyva pravieści refierendum za rospusk Viarchoŭnaha Savieta. Było sabrana kala 450 tysiač podpisaŭ. Heta kolkaść śviedčyć pra nastroi ŭ krainie. Tady byŭ pik mahčymaściaŭ dla demakrataŭ. I my hetym nie skarystalisia. Treba było iści na vulicu i klikać vybarščyka na barykady! Ale nie znajšłosia lidara, zdolnaha heta zrabić.

Jon kaža, što ŭ 1992-m kamunistyčnaja namienkłatura nie była manalitam.

— Tady nie było ni karpienkoŭščyny, ni azaronkaŭščyny. I ŭ Rasii byli viałyja muskuły. Heta byŭ idealny čas dla taho, kab źviarnucca da vulicy, i tolki jana mahła paŭpłyvać tady na situacyju. Ale hetaha nie było zroblena. I što adbyłosia paśla? 1993 hod byŭ pierałomnym u nastrojach ludziej.

Da adprečvańnia staroj partyjnaj namienkłatury dadałosia rasčaravańnie ŭ demakratach. Ale pry hetym zapyt na spraviadlivaść i pieramieny zastaŭsia. I ŭ hety zapyt arhanična ŭvajšoŭ Łukašenka jak treciaja siła.

Vydańnie spytała palityka, ci adčuvaje jon svaju asabistuju vinu i vinu jaho pakaleńnia za toje, što my ciapier apynulisia ŭ toj kropcy, u jakoj znachodzimsia?

— Viadoma, usie my niasiom adkaznaść. Kali my nie zmahli dasiahnuć taho, kab Biełaruś siońnia była ŭ Jeŭrapiejskim sajuzie, a susiedniaja Litva — tam, značyć, adkaznaść jość na ŭsich. Na kimści bolš, na kimści mienš, ale na ŭsich, biez vyklučeńnia. Tak, na lidarach taho času jana samaja vialikaja!

Hadzińnik cikaje, arkušy kalendara padajuć, źmianiajucca lidary. Adpaviedna, i adkaznaść pieraraźmiarkoŭvajecca. Ale siońnia najbolšuju adkaznaść niasie Śviatłana Cichanoŭskaja jak lehitymny nacyjanalny lidar. Čas i ludzi vybrali jaje! U 2001 hodzie hety kryž nios Uładzimir Hančaryk (adziny kandydat ad apazicyi na pasadu prezidenta Biełarusi na vybarach 2001 hoda. — Zaŭv. red.). U 2006-m — Alaksandr Milinkievič. Byŭ pieryjad pamiž hetym, kali adkaznaść lažała na lidarach partyj, siarod jakich byŭ i ja.

Za toje, što adbyvałasia ŭ 90-ch, adkaznaść u pieršuju čarhu lažyć na Zianonie Paźniaku jak lidary apazicyi. Častkova na Šuškievičy. Palityka — śfiera piersanifikavanaja.

• 30
• 9
• 6
• 5
• 1
• 0
• 0
• 0