U Kleckim rajonie razvaliŭsia staradaŭni viatrak, jaki znachodziŭsia pad achovaj dziaržavy
Miascovyja praŭładnyja kanały vinavaciać niepahadź, a aktyvisty — miascovyja ŭłady, jakija ničoha nie rabili, kab zachavać pomnik amal čatyry dziesiacihodździ, što jon znachodzicca pad achovaj dziaržavy.
Pra razbureńnie reštak vietranoha młyna ŭ vioscy Šajki paviedamiŭ telehram-kanał «Kleck | Novosti». Pavodle infarmacyi na kanale, viatrak nie vytrymaŭ niepahadzi 7 lipienia.
Adnak zvodka nadvorja havoryć, što ŭ toj i papiarednija dni chutkaść vietru ŭ rajonie nie pieravyšała 7 m/s, čaho dastatkova tolki dla taho, kab padniać pył i raschistać tonkija haliny drevaŭ, ale nijak nie dla taho, kab razburyć viatrak.
Na dumku aŭtaraŭ telehram-kanała «Spadčyna», sapraŭdnaja pryčyna razbureńnia vietraka ŭ adsutnaści choć jakoj uvahi miascovych orhanaŭ da historyka-kulturnaj kaštoŭnaści na praciahu dziesiacihodździaŭ.
Draŭlany viatrak, jaki adnosiŭsia da typu šatrovych vietrakoŭ, byŭ pabudavany ŭ kancy XIX — pačatku XX stahodździa i stajaŭ u centry vioski, na pierakryžavańni jaje hałoŭnych vulic. U saviecki čas viatrak pačaŭ pracavać na elektrapryvodzie. Stacyjanarna ŭstanoŭleny asnoŭny konusapadobny abjom vietraka byŭ zavieršany pavarotnym šatrom z čatyrochłopaścievym vintom, jaki byŭ stračany jašče ŭ saviecki čas. Karkasnaja kanstrukcyja asnoŭnaha abjomu viertykalna ašalavana.
Jašče za savieckim časam viatrak u Šajkach byŭ uniesieny ŭ Zbor pomnikaŭ historyi i kultury Biełarusi — aficyjny pieralik abjektaŭ, jakija byli ŭziatyja pad achovu dziaržavy.
Achoŭny status viatrak atrymaŭ jašče ŭ 1987 hodzie, ale za minułyja amal čatyry dziesiacihodździ jaho stan tolki paharšaŭsia, nie było prykmiet taho, što miascovyja ŭłady choć niejak sprabujuć zachavać hety pomnik pramysłovaj architektury.
Na zdymkach siaredziny 2000-ch hadoŭ viatrak u Šajkach užo stajaŭ pakasiŭšysia, biez častki abšyŭki i sa śladami hnijeńnia kanstrukcyi. U apošnija hady jon vyhladaŭ jašče horš, było vidavočna, što jon znachodzicca ŭ avaryjnym stanie i tolki pytańniem času było, kali viatrak abryniecca pad ułasnym ciažaram.
U 2024 hodzie pa zakazie sielsavieta instytut «Biełžyłprajekt» raspracavaŭ prahramu pa supraćavaryjnych i kansiervacyjnych rabotach na hetym pomniku narodnaha dojlidstva, ale da realnych dziejańniaŭ sprava tak i nie dajšła.
Viatrak u Šajkach staŭ prynamsi šostym zbudavańniem hetaha typu, jaki Biełaruś straciła za apošnija hady. U 2002 hodzie viecier pavaliŭ viatrak u Adelsku Hrodzienskaha rajona, u 2008 hodzie — u Žyličach Kleckaha rajona. Abodva vietraki byli ŭ takim ža avaryjnym stanie, jak i apisany vyšej. U 2016 hodzie razabrany viatrak u Kaladzičach Pružanskaha rajona, u 2018 hodzie — u Rahach Słaŭharadskaha rajona. U tym ža 2018 hodzie zhareŭ viatrak u vioscy Leśniki Drahičynskaha rajona, jaki pierad hetym biespaśpiachova sprabavali pieravieści ŭ inšaje miesca.
Razbureńnie ci paškodžańnie historyka-kulturnaj kaštoŭnaści ŭ vyniku niadbajnaha zachoŭvańnia źjaŭlajecca kryminalnym złačynstvam, za jakoje adkaznym asobam pahražaje da troch hadoŭ chimii, ale na praktycy ŭ Biełarusi realnymi terminami (a časam – i mizernym štrafam) nie karajuć navat za naŭmysnaje źniščeńnie pomnikaŭ historyi i kultury.
«Naša Niva» — bastyjon biełaruščyny
PADTRYMAĆ-
U Teatry lalek admianili śpiektakl pavodle kazak bratoŭ Hrym
-
Niderłandy, jak i Irłandyja, Słavienija i Ispanija, pryhrazili bajkatavać «Jeŭrabačańnie-2026», kali ŭ im budzie ŭdzielničać Izrail
-
«Usio — chłuśnia i manipulacyi». Śpiecyjalisty rezka adkazali na isteryju vakoł rekanstrukcyi Čyrvonaha kaścioła
Ciapier čytajuć
Na vučeńniach «Zachad» adpracoŭvajuć napad na Polšču i Litvu pad vyhladam abarony Kalininhrada19
Kamientary
Nasamreč 07.07.2025 byŭ vietrany dzień. Papiaredni prahnoz pa madeli ECMWF na toje miesca byŭ na paryvy 14 m/s. Na bližejšaj mieteastancyi Hancavičy zafiksavali paryvy vietru da 21 m/s. Na astatnich navakolnych ad 12 da 21 m/s.
Pry hetym viatrak staviać u śpiecyfičnych miescach, dzie viecier razhaniajecca i moža być bolej za toje, što fiksuje mieteastancyja. I na vyšyni viecier macniej.
Adnak, kaniešnie, kali b viatrak byŭ u naležnym (pracoŭnym) stanie, jon by vytrymaŭ i taki viecier. Tarnada nie było, dachi damoŭ u vioscy tady nie lotali.