Šou ci dypłamatyja? Čamu kiraŭnik Ałbanii rehularna stanovicca na kalena pierad premjeram Italii Miełoni?

Premjer-ministr Ałbanii Edzi Rama ŭžo niekalki razoŭ źviartaŭsia da adnaho i taho ž rytuału — jon stanaviŭsia na kalena pierad kiraŭnicaj urada Italii Džordžaj Miełoni. Pryčym adbyvajecca heta padčas aficyjnych mierapryjemstvaŭ, piša Bi-bi-si.

Jaho pavodziny vyklikajuć uśmiešku ŭ prysutnych, ale dla spadaryni Miełoni a, hetaja situacyja nie zusim zručnaja.

Čamu 62-hadovy palityk tak demanstratyŭna heta robić i što kažuć pra heta ŭ jaho krainie?

«Maja darahaja siastra»

10 lipienia ŭ Rymie, na Kanfierencyi pa pytańniach adnaŭleńnia Ukrainy, Edzi Rama pavinšavaŭ Džordžu Miełoni, staŭšy na kalena. Było bačna, jak italjanskaja premjerka sprabuje niešta skazać jamu i ŭśmichajecca. Edzi Rama padniaŭsia z kalen, kali Miełoni padyšła, i jany abnialisia.

Paśla hetaha palityki niešta abmierkavali, pierš čym pačać paziravać dla aficyjnaha fota. U svajoj pramovie Edzi Rama padziakavaŭ Džordžy Miełoni za arhanizacyju mierapryjemstva i nazvaŭ jaje «lubimaj siastroj».

«Maja darahaja siastra Džordža Miełoni siońnia nahadaŭ usim, što ŭsie darohi viaduć u Rym», — zajaviŭ ałbanski premjer.

Padobnaja situacyja adbyłasia nie ŭpieršyniu. Padčas šostaha samitu Jeŭrapiejskaj palityčnaj supolnaści, jaki adbyŭsia 16 maja ŭ ałbanskaj stalicy Tyranie, Edzi Rama taksama stanaviŭsia na kalena pierad italjanskaj premjerkaj.

Ałbanija prymała bolš za 40 jeŭrapiejskich lidaraŭ, i jak haspadar, Edzi Rama sustrakaŭ usich haściej samitu.

Tady niekatoryja ŚMI pisali, što ałbanski premjer takim rycarskim sposabam prajaviŭ pavahu da žančyny-premjera.

Sama Džordža Miełoni, dla jakoj taki ŭčynak byŭ, zdajecca, niečakanym, skazała: «Jon robić heta tolki, kab być sa mnoj adnaho rostu».

ŚMI pisali tady, što rost Edzi Ramy — 201 sm, a Džordžy Miełoni — 163 sm.

Teatralny akt ci dypłamatyja

Adnak takija pavodziny ałbanskaha premjera rycarskimi i darečnymi ličać daloka nie ŭsie. Jaho apanienty ŭ Ałbanii źviarnulisia da rezkaj krytyki i navat pastavili jaho kalenaprykłanieńnie ŭ histaryčny kantekst.

Pavialičyć

«Teatralnym aktam, napoŭnienym niebiaśpiečnym padtekstam», nazvała hety ŭčynak u maii, kali heta zdaryłasia ŭpieršyniu, vydańnie Alb Media.

«Ujaŭlajecie sabie kanclera Hiermanii Frydrycha Mierca, jaki staić na kaleniach pierad Džordžaj Miełoni ŭ Bierlinie? Ci Makrona na Jelisiejskich palach? Nie. Bo sapraŭdnyja lidary nikomu nie pakłaniajucca», — piša vydańnie i zhadvaje taksama «balučuju historyju pamiž Ałbanijaj i Italijaj z časoŭ fašysckaj akupacyi».

«Premjer-ministru padabajecca šou, jakoje stavić jaho ŭ centr uvahi. (…) Jon užo pieratvaryŭ heta ŭ tradycyju — ładzić šou navat tam, dzie heta nie patrebna», — adznačaje inšaje vydańnie Tetova News.

Baskietboł i žyvapis

Styl i pavodziny ałbanskaha premjera pastajanna traplajuć na fota i videa. Na Jeŭrasamicie ŭ mai žurnalisty adznačyli jaho pavyšanuju ŭvahu nie tolki da Džordžy Miełoni, ale i da inšych žančyn-palitykaŭ.

A taksama da stylu adzieńnia, u pryvatnaści, biełych krasovak sa zoračkaj razam z aficyjnym kaściumam. Edzi Rama ŭ Ałbanii zastajecca papularnym palitykam užo bolš za 10 hadoŭ. Jon pryjšoŭ da ŭłady na chvalu baraćby z kamunizmam naprykancy 90‑ch minułaha stahodździa.

Z taho času Rama pracavaŭ ministram kultury, potym 11 hadoŭ byŭ meram Tyrany. Kiraŭnikom urada stanaviŭsia trojčy. Upieršyniu ŭ 2013 hodzie paśla pierakanaŭčaj pieramohi Sacyjalistyčnaj partyi na parłamienckich vybarach. U 2014 i 2021 hadach jaho partyja znoŭ vyjhrała vybary i pradstaviła jaho na pasadu premjer-ministra.

A da taho, jak stać palitykam, Edzi Rama prafiesijna zajmaŭsia baskietbołam, a taksama žyvapisam i skončyŭ Nacyjanalnuju vyšejšuju škołu vyjaŭlenčaha mastactva.

• 2
• 0
• 0
• 1
• 0
• 0
• 0
• 1