19 lipienia ŭ Polščy adbyłasia surjoznaja techničnaja avaryja ŭ sistemie kiravańnia pavietranym rucham, z-za jakoj u niekatorych aeraportach krainy spynilisia vylety samalotaŭ.
Pieršym pra prablemu paviedamiŭ Varšaŭski aeraport imia Frederyka Šapena. Tam udakładnili, što z-za zboju ŭ infarmacyjnych sistemach Polskaha ahienctva pavietranaha ruchu (PAPR) pa ŭsioj krainie niemahčyma ažyćciaŭlać vylety. Pry hetym pasadki praciahvajucca, ale zhodna z admysłovymi pracedurami.
Paźniej pradstaŭnik PAPR Marcin Chadaj paćvierdziŭ hetuju infarmacyju i dadaŭ, što zranku ŭ niekalkich polskich aeraportach uviedzienyja abmiežavańni na vylety, choć samaloty ŭsio ž pryziamlajucca.
Paśla 14-j hadziny pa polskim časie (15-j pa biełaruskim) Polskaje ahienctva pavietranaha ruchu paviedamiła:
«Paśla prymianieńnia nieabchodnych pracedur asnoŭnaja sistema kiravańnia pavietranym rucham była adnoŭlenaja. Pryčynaj časovych prablem stała niaspraŭnaść, jakaja była nieadkładna likvidavanaja. Padčas dziejańnia reziervovaj sistemy biaśpieka apieracyj uvieś čas zachoŭvałasia na maksimalnym uzroŭni».
Niadaŭna padobny zboj adbyŭsia ŭ aeraporcie Kišyniova, dzie pryčynaj stała niestabilnaść u elektrasietcy, vyklikanaja rasijskimi rakietnymi atakami na terytoryi Ukrainy.
Kamientary