Naŭsieda vykazaŭsia nakont idei Cichanoŭskaha pra aŭtanomnyja «astravy» biełarusaŭ u roznych krainach
Prezident Litvy Hitanas Naŭsieda zajaviŭ, što nikoli nie zhadzicca na stvareńnie aŭtanomij na terytoryi Litvy. Adnak jon adznačaje, što słovy Siarhieja Cichanoŭskaha, jaki vykazaŭ takuju ideju, nie varta ŭsprymać usurjoz, piša Delfi.lt.
U intervju prajektu «Žyćcio-malina» ŭ pačatku lipienia Siarhiej Cichanoŭski skazaŭ, što ŭ vypadku niaŭdačy źviaržeńnia režymu Alaksandra Łukašenki, biełarusy, jakija pakinuli radzimu, mahli b stvarać «astravy» z aŭtanomijaj.
«Ja chaču žyć u Biełarusi, u turmie šmat pra heta dumaŭ. Kali biełarusy nie zachočuć zmahacca, nie buduć vieryć mnie — niachaj vierać kamuści inšamu, hałoŭnaje, kab jany zmahalisia, kab heta dało vynik. Kali heta nie daje vyniku… Ja pačnu stvarać takija astravy. U Rasii była takaja niamieckaja aŭtanomnaja vobłaść, niešta padobnaje, była i jaŭrejskaja. My možam raźvivacca i tak. Kraina — heta ž ludzi», — havaryŭ były palitviazień.
U Litvie, dzie ciapier žyvuć Cichanoŭskija, hety słovy vyklikali dyskusiju. Prezident Litvy Hitanas Naŭsieda vykazaŭsia z hetaj nahody.
«Zaŭsiody jość roznyja ludzi, roznyja mierkavańni. Narešcie, davajcie ŭličvać toj fakt, što čałaviek u žudasnych umovach apošnija niekalki hadoŭ znachodziŭsia ŭ turmie. Mahčyma, u jaho krychu inšaje ŭjaŭleńnie pra pracesy, jakija nasamreč adbyvajucca, kali jon šmat hadoŭ pravioŭ u ciomnaj turmie», — zajaviŭ prezident Litvy žurnalistam u aŭtorak.
«Davajcie zrazumiejem jaho situacyju, pastarajemsia acanić ćviaroza», — dadaŭ Naŭsieda.
Pa słovach kiraŭnika litoŭskaj dziaržavy, niama sensu navat havaryć pra aŭtanomnyja rehijony ŭ Litvie. «Ja nikoli nie zhadžusia na stvareńnie jakich-niebudź astravoŭ u Litvie. U nas byli sproby stvaryć aŭtanomii ŭ pieryjady niezaležnaści — jany skončylisia ničym», — skazaŭ jon.
«My zaŭsiody hatovyja pryniać inšyja narody, što ratujucca ad palityčnych pieraśledaŭ, ale pierš za ŭsio my ŭličvajem intaresy ŭłasnaj nacyjanalnaj biaśpieki. Heta, na maju dumku, śfiera nacyjanalnaj biaśpieki, i my nie dapuścim tut impravizacyj», — zaklučyŭ Naŭsieda.
Kiraŭnik adździeła mižnarodnych suviaziaŭ Ofisa Śviatłany Cichanoŭskaj Dzianis Kučynski zajaviŭ, što biełarusy nie ŭjaŭlajuć pahrozy ni suvierenitetu Litvy, jakaja ich prytuliła, ni jaje terytaryjalnaj cełasnaści.
«Nichto i nikoli nie budzie stvarać nijakich archipiełahaŭ u Litvie. Heta prosta absurd. Litvinizm — heta dziecišča Minska i kramloŭskich śpiecsłužbaŭ», — zajaviŭ dypłamatyčny daradca Cichanoŭskaj.
Čaho čakaje Polšča ad Minska i ci zakryje znoŭ miažu na hetym tydni?26
Kamientary
Cichanoŭski hetuju kašu zavaryŭ - jamu i adkazvać. Ci jon lapnuŭ jazykom - i ŭ kusty?