«Čamu ty adklučyŭ ruchaviki?» Papiaredni dakład ab katastrofie samalota Air India vyklikaŭ jašče bolš sprečak

Pavodle dakłada, praź niekalki siekund paśla ŭźlotu abodva pieraklučalniki padačy paliva ŭ kabinie piłotaŭ Boeing 787 raptam pierajšli ŭ stanovišča cut-off (adklučana).

Hukazapisvalnik kabiny (CVR) zafiksavaŭ, što adzin ź piłotaŭ spytaŭ druhoha, čamu toj adklučyŭ abodva ruchaviki, na što surazmoŭca adkazvaje, što jon hetaha nie rabiŭ. Chto mienavita pramaŭlaŭ hetyja frazy — nie ŭdakładniajecca.

Padčas uźlotu samalotam kiravaŭ druhi piłot, a kamandzir pavietranaha sudna kantralavaŭ praces. Heta zvyčajnaja praktyka ŭ hramadzianskaj avijacyi. Pieraklučalniki byli viernuty ŭ stanovišča run (pracuje), što pryviało da paŭtornaha aŭtamatyčnaha zapusku abodvuch ruchavikoŭ. Na momant katastrofy adzin ruchavik pačaŭ adnaŭlać ciahu, a druhi ŭžo pierazapuściŭsia, ale jašče nie adnaviŭ poŭnuju mahutnaść.

Samalot prabyŭ u pavietry mienš za chvilinu i zvaliŭsia na žyły rajon horada Achmiedabad pobač z aeraportam.

Z taho času, jak vyjšaŭ papiaredni dakład, uźnikła mnostva śpiekulatyŭnych viersij. Poŭny dakład čakajecca prykładna praz hod.

Wall Street Journal i Reuters paviedamili, što «novyja detali rasśledavańnia katastrofy samalota Air India źmiaścili fokus uvahi na staršaha piłota, jaki znachodziŭsia ŭ kabinie».

Italjanskaja hazieta Corriere della Sera śćviardžaje sa spasyłkaj na krynicy, što druhi piłot nieadnarazova pytaŭ kamandzira, «čamu toj adklučyŭ ruchaviki». Kamandziram pavietranaha sudna byŭ 56-hadovy Sumit Sabcharvał, druhim piłotam, jaki kiravaŭ samalotam u hety momant (u hramadzianskaj avijacyi heta nazyvajecca Pilot Flying, PF) — 32-hadovy Kłajv Kunder.

Razam jany mieli bolš za 19 tysiač hadzin nalotu — pryčym amal pałova na Boeing 787. Abodva prajšli ŭsie miedycynskija pravierki pierad vyletam.

Chvala śpiekulatyŭnych teoryj vyklikała niezadavolenaść śledčych i aburyła indyjskich piłotaŭ.

Na minułym tydni Biuro rasśledavańnia avijacyjnych zdareńniaŭ Indyi (AAIB) zajaviła, što «niekatoryja pradstaŭniki mižnarodnych ŚMI znoŭ i znoŭ robiać vysnovy na padstavie vybaračnaj i niepaćvierdžanaj infarmacyi». Pavodle mierkavańnia AAIB, heta biezadkazna, tamu što rasśledavańnie jašče praciahvajecca.

Dženifier Chamiendzi, staršynia amierykanskaha Nacyjanalnaha savieta pa biaśpiecy na transparcie (NTSB), jaki ŭdzielničaje ŭ rasśledavańni, nazvała paviedamleńni ŭ ŚMI «praduziatymi i śpiekulatyŭnymi», padkreśliŭšy, što «rasśledavańni takoha maštabu patrabujuć času».

Indyjskaja asacyjacyja kamiercyjnych piłotaŭ asudziła paśpiešnyja abvinavačańni na adras ekipažu, nazvaŭšy ich «nieabačlivymi» i «vielmi biestaktoŭnymi», i zaklikała ŭstrymacca ad vysnoŭ da publikacyi kančatkovaha dakładu.

Sem Tomas, kiraŭnik Asacyjacyi piłotaŭ Indyi (ALPA India), zajaviŭ Bi-bi-si, što «śpiekulacyi ŭziali vierch nad adkrytaściu i prazrystaściu», i padkreśliŭ nieabchodnaść analizu dakumientacyi i historyi techničnaha absłuhoŭvańnia samalota razam z danymi hukazapisvalnika z kabiny ekipaža.

U centry sprečki apynuŭsia tolki karotki frahmient zapisu pieramovaŭ piłotaŭ. Poŭnaja rasšyfroŭka, jakaja źjavicca ŭ kančatkovym dakładzie, pavinna pralić śviatło na toje, što ž sapraŭdy adbyłosia.

Jak tłumačyć adzin śledčy avijacyjnych zdareńniaŭ, jaki žyvie ŭ Kanadzie i pažadaŭ zastacca ananimnym, pradstaŭleny ŭ dakładzie frahmient razmovy dapuskaje niekalki interpretacyj.

«Kali piłot B [druhi piłot] sapraŭdy paviarnuŭ pieraklučalniki, chaj navat nieŭśviadomlena i nienaŭmysna, — całkam mahčyma, što jon potym admaŭlaŭ heta, — ličyć ekśpiert. — Ale kali piłot A zrabiŭ heta naŭmysna i śviadoma, jon moh zadać hetaje pytańnie, vydatna viedajučy, što zapisy samapisca buduć uvažliva vyvučany, z metaj adciahnuć uvahu i paźbiehnuć identyfikacyi jak vinavataha».

«Navat kali AAIB u vyniku zmoža dakładna vyznačyć, chto što skazaŭ, heta ŭsio roŭna nie daje adnaznačnaha adkazu na pytańnie, chto adklučyŭ ruchaviki. Mahčyma, my naohuł nikoli nie daviedajemsia adkaz na hetaje pytańnie».

Jak padkreślili śledčyja, chacia i jość važkija padstavy ličyć, što pieraklučalniki padačy paliva byli adklučany ŭručnuju, važna zachoŭvać «zdolnaść da niepraduziataha mierkavańnia».

Niekatoryja piłoty miarkujuć, što niaspraŭnaść sistemy ličbavaha kiravańnia ruchavikom (FADEC), jakaja adsočvaje jaho paramietry, tearetyčna mahła vyklikać aŭtamatyčnaje adklučeńnie ŭ vypadku atrymańnia chibnych sihnałaŭ ad datčykaŭ.

Adnak kali pytańnie piłota — «čamu ty adklučyŭ ruchaviki» — prahučała paśla taho, jak pieraklučalniki padačy paliva byli pieraviedzieny ŭ stanovišča cut-off, jak paznačana ŭ papiarednim dakładzie, heta padryvaje vyšejskazanuju teoryju.

Kančatkovy dakład, chutčej za ŭsio, budzie ŭklučać sinchranizavanuju pa časie rasšyfroŭku pieramovaŭ u kabinie i padrabiazny analiz dadzienych ab ruchaviku, što dapamoža prajaśnić situacyju.

Bolš pytańniaŭ vyklikaje nie toje, chto što skazaŭ, a toje, što nie było skazana.

Papiaredni dakład nie ŭtrymlivaje poŭnaj rasšyfroŭki zapisaŭ hukazapisvalnika z kabiny, pryvodziacca tolki repliki, jakija pakazvajuć, što adbyvałasia ŭ apošnija siekundy.

Uźnikaje pytańnie: śledčyja viedajuć, chto što havaryŭ, ale nie raskryvajuć padrabiaznaści z etyčnych mierkavańniaŭ — ci jany nie ŭpeŭnienyja, dzie čyje hałasy, i im patrebna bolš času dla vyvučeńnia, pierš čym publikavać vysnovy?

Piter Hiołc, były top-mieniedžar NTSB, ličyć, što AAIB pavinna apublikavać rasšyfroŭku z ukazańniem, kamu naležyć jakaja replika.

«Kali jakija-niebudź niaspraŭnaści pačalisia padčas uźlotu, jany pavinny byli być zafiksavany bartavym samapiscam i, chutčej za ŭsio, zapuścili b tryvožnyja sihnały ŭ sistemie kiravańnia palotam — i ekipaž amal napeŭna zaŭvažyŭ by heta, i, što važniej, abmierkavaŭ by», — skazaŭ jon.

Ekśpierty zaklikajuć nie rabić zaŭčasnych vysnoŭ.

«Treba być aściarožnymi, bo lohka vykazać zdahadku: kali pieraklučalniki byli adklučany, značyć, heta było zroblena naŭmysna — pamyłka piłota, suicyd, niešta inšaje. I heta niebiaśpiečny šlach pry takim abmiežavanym abjomie infarmacyi», — skazaŭ u kamientary Bi-bi-si Šon Pruchnicki, były rasśledavalnik avijacyjnych zdareńniaŭ i avijacyjny ekśpiert z Univiersiteta štata Ahaja.

Na minułym tydni kiraŭnik AAIB adznačyŭ, što meta papiaredniaha dakładu — «dać infarmacyju pra toje, ŠTO adbyłosia».

«Zanadta rana rabić kančatkovyja vysnovy», — zajaviŭ jon, padkreśliŭšy, što rasśledavańnie praciahvajecca, i ŭ finalnym dakładzie buduć ukazany jak pryčyny, tak i rekamiendacyi.

Jon paabiacaŭ publikavać abnaŭleńni pa «techničnych pytańniach abo pytańniach, što ŭjaŭlajuć hramadskuju cikavaść», pa miery źjaŭleńnia novaj infarmacyi.

• 0
• 0
• 0
• 2
• 1
• 7
• 0
• 0