Adznačyła svoj pieršy dzień naradžeńnia samaje niedanošanaje dzicia śvietu
U amierykanskim štacie Ajova Neš Kin, samaje niedanošanaje dzicia ŭ śviecie, adznačyŭ svoj pieršy dzień naradžeńnia. Jon naradziŭsia 5 lipienia 2024 hoda ŭsiaho na 21-m tydni ciažarnaści, heta značyć amal na 4,5 miesiaca raniej za termin, piša The Guardian.
Na momant naradžeńnia vaha Neša składała tolki 283 hramy — prykładna stolki važyć elektronnaja kniha biez čachła.
Raniejšy rekord naležaŭ dziciaci z Ałabamy, ale Neš apiaredziŭ jaho na adzin dzień i trapiŭ u Knihu rekordaŭ Hinesa. Jahonyja baćki, Moli i Rendał Kiny, pryznajucca, što paśla trahičnaha dośviedu (raniej ich dačka, narodžanaja na 18-m tydni, nie vyžyła) vielmi bajalisia, ale ŭsio ž vyrašyli zmahacca za žyćcio syna.
Paśla naradžeńnia Neš šeść miesiacaŭ pravioŭ u adździaleńni intensiŭnaj terapii dla niemaŭlat. Jak raskazała nieanatołah Emi Stenfard, dzicia vyžyła dziakujučy śpiecyjalizavanamu dohladu, bieśpierapynnamu kantrolu i ŭłasnaj nievierahodnaj žyvučaści. U pieršyja tydni chłopčyk byŭ u krytyčnym stanie, ale pastupova pačaŭ adnaŭlacca.
Ciapier chłopčyku krychu bolš za hod. Jon jašče nie poŭzaje, ale ŭžo ŭmieje pierakulvacca, dychaje z dapamohaj dadatkovaha kisłarodu i charčujecca praz zond, choć chutka jaho pačnuć pieravodzić na piure. U Neša taksama dyjahnastavali parok serca, ale daktary spadziajucca, što z uzrostam situacyja palepšycca.
Baćki apisvajuć syna jak vielmi mocnaha i žyćciaradasnaha chłopčyka, jaki zaŭsiody ŭśmichajecca.
Śmierci niama. Jak režysiorka Darja Žuk stała maci, a praz paŭtara hoda pachavała svajo dzicia
Biełaruskija miedyki vyratavali dziaŭčynku, jakaja naradziłasia masaj 600 hramaŭ
Jak skłałasia žyćcio chłopca, jakoha maci naradziła ŭ tualecie na panadvorku i kinuła. Jon sustreŭsia ź joju ŭ Małachava
Psichičnyja razłady ŭ baćkoŭ mohuć pavialičyć ryzyku zaŭčasnych rodaŭ — novaje daśledavańnie
«Nabirała vadu z unitaznaha bačka dla hatavańnia, myćcia». Hanna Bond ščyra raspaviała pra ciažkaje dziacinstva13
Kamientary