Doktar Aŭtachaus

Uzakonienyja pierakupščyki z radaściu zabiaruć vaš aŭtamabil dla prodažu. Što ŭzamien — tolki hrošy ci kłopat u dadatak?

Takim słovam nazyvajuć lubuju kramu, jakaja pradaje mašyny. My ž spynimsia na «aŭtachausach» u bolš vuzkim značeńni słova — heta kampanii, jakija pracujuć nie z novymi aŭto, a z byłymi ŭ karystańni. Naprykład, biaruć ich na kamisiju dla prodažu ci pryvoziać staryja mašyny ź Jeŭropy i Amieryki.

Niaskončanaja prystupka da cyvilizacyi

U Biełarusi pracuje dziasiatak takich kram. Asnoŭnyja — «Aŭtapodyum», «4 koły», «Miehapolis», «MyCar». Ich možna było b nazvać čarhovaj prystupkaj na šlachu da cyvilizavanaha rynku — prynamsi tyja, što znachodziacca pad dacham i majuć u štacie kvalifikavanych kansultantaŭ. Ale heta idealny varyjant.

Pakul ža situacyja na aŭtarynku Biełarusi śviedčyć pra advarotnaje. Vodhuki ŭ internecie — spres admoŭnyja. Niekatoryja pakryŭdžanyja dachodziać da abarony svaich pravoŭ. U Biełaruskim tavarystvie spažyŭcoŭ sabraŭsia stos pretenzij da aŭtachausaŭ. Jašče bolš ludziej navat nie pačynajuć papiarovuju ciahaninu.

«Na adnoj mašynie mnie padrapali bampier, na druhoj ja znajšoŭ raskolinu łabavoha škła pa ŭsioj daŭžyni źnizu. Heta jany svaje abjavy z canoj palivali ŭ marazy kipniem, kab nie treba było adskrabać… I ni za adnu ź situacyj nie zapłacili, maŭlaŭ, vy ž ničoha nie dakažacie. Uładalnik aŭtachausa — były pierakupščyk z Malinaŭki, tamu i staŭleńnie da klijentaŭ u jaho adpaviednaje», — raskazvaje adzin z tych, kamu nie paščaściła źviarnucca ŭ aŭtachaus.

Dyj aščadzić, kuplajučy mašynu ŭ aŭtachausie, składana. Aŭto kaštujuć stolki ž, kolki na rynku, ci navat daražej. Nakrutka jość, a harantyi — niama. Harantyju na niekalki miesiacaŭ možna atrymać na ličanyja aŭto — i toje tolki pry prachodžańni techahladu i ramontu za dadatkovyja hrošy.

Hałoŭnaje — zbyć

Kali pahladzieć na źjavu ź inšaha boku, z boku pradaŭcoŭ, atrymlivajecca bolš aptymistyčnaja karcina. Pradać svoj aŭtamabil aŭtachausu i atrymać 70—80% ad rynkavaj cany za paru dzion — davoli vyhadny varyjant, kali padciskaje čas. Papularnuju mašynu ŭvohule adarvuć z rukami. Kali ŭ mašynie jość chiby, cana ŭpadzie jašče nižej, praŭda, dla nastupnaha pakupnika aŭto budzie chutčej za ŭsio pradavacca jak biesprablemnaje.

Aŭtachaus — jašče i vyjście dla tych, chto pieradusim cenić svoj čas, a nie hrošy. Adnojčy vystaviŭšy svajo aŭto na prodaž, pra jaho možna časova zabycca. Mašyna moža stajać na prodažy i miesiac, i dva, pakul jaje narešcie nie znojdzie novy haspadar.

Atrymlivajecca, što aŭtachausy vyhadnyja dla tych, chto choča pradać, a nie kupić.

Jaŭhien Vasilkoŭ

Plusy aŭtachausaŭ

+ Pierakładvańnie sa svaich plačej pracy pa pošuku kupca
+ Mahčymaść terminova atrymać 80% ad rynkavaj cany mašyny
+ Mahčymaść uliku staroha aŭto ŭ košt novaha
+ Mahčymaść kupić aŭto ŭ kredyt

Minusy aŭtachausaŭ

— Ułaśniku vypłačvajecca zanižanaja cana mašyny
— Składana zbyć aŭtachausu prablemny aŭtamabil
— Aŭtachaus nie adkazvaje za naniesienyja mašynie paškodžańni na stajancy.

• 0
• 0
• 0
• 0
• 0
• 0
• 0
• 0