Novy most z boku rynku Ždanovičy ŭvojdzie ŭ trojku samych doŭhich u Minsku
Jakim budzie puciepravod, jaki złučyć dva rajony stalicy, Minsk-Navinam raskazaŭ načalnik budaŭničaha adździeła pradpryjemstva «Minskinžprajekt» Juryj Łaŭrynovič.
Pačałasia praca nad prajektam novaha ŭčastka vuł. Kaleśnikava — ad vuł. Lucynskaj da vuł. Cimirazieva — z aŭtamabilnym puciepravodam nad čyhunkaj. Heta transpartnaja raźviazka złučyć Centralny i Frunzienski rajony stalicy.
Pakul ža z Masiukoŭščyny, Dambroŭki i Kamiennaj Horki da rynku Ždanovičy i žyłoj zabudovy ŭ Lebiadzinym možna dabracca na aŭtamabili tolki praz MKAD abo zrabiŭšy jašče bolšaje koła praz druhoje transpartnaje kalco. Uźviadzieńnie novaha ŭčastka vuł. Kaleśnikava vyrašyć hetuju prablemu i dazvolić lohka pieramiaščacca z adnaho rajona ŭ druhi.
Novy most
Zaraz kančatkova prapracoŭvajucca inžyniernyja rašeńni, tamu možna havaryć tolki pra papiaredni varyjant, adnak ahulnyja rysy ŭžo vymaloŭvajucca. Aŭtamabilny most płanujecca ŭźvieści z žalezabietonnych zbornych belek i zborna-manalitnych apor. Usiaho 11 pralotaŭ z belkami pa 33 m i adzin pralot — 18 m. Spatrebicca 13 apor.
Ahulnaja daŭžynia kanstrukcyi pieravysić 380 m, šyrynia budzie varjavacca ad 41,3 da 47,8 m (pa try pałasy ŭ kožnym napramku, a taksama dadatkovyja pałosy).
— Pakolki z boku vuł. Cimirazieva skryžavańnie raźmieścicca blizka da puciepravoda, nieabchodna na samym moście arhanizavać dadatkovyja pałasy dla prava– i levapavarotnych źjezdaŭ. Adsiul i roznaja šyrynia, — patłumačyŭ načalnik budaŭničaha adździeła «Minskinžprajekta».
Prajeznuju častku ad tratuaraŭ adździalać parapietnaj žalezabietonnaj aharodžaj.
Ju. Łaŭrynovič udakładniŭ: i sami kanstrukcyi, i technałahičny praces praduhledžvajuć minimalnaje ŭmiašańnie ŭ sistemu čyhunki i isnujučuju zabudovu. Płošča pad puciepravodam z boku rynku Ždanovičy budzie svabodnaj, tam možna arhanizavać prachody, prajezdy, navat miescy dla handlu.
Novy puciepravod uvojdzie ŭ trojku samych praciahłych u stalicy, naroŭni z raźmieščanym na praśpiekcie Žukava nad stancyjaj Minsk-Sartavalny (daŭžynia — kala 460 m) i na skryžavańni praśpiektaŭ Dziaržynskaha i Žukava (458 m).
Ciapier čytajuć
Žyhar — Kraŭcovu: Ja tabie asabista apłaču kvitok da Minska, tam i damaŭlajsia z Łukašenkam!34
Kamientary
(Darečy, pra toje trochi jość i ŭ aryhinalnym artykule).
Ja pra ŭsie ŭčastki, nie tolki pra hety. U artykule sami pryznajuć niedachop jašče 4 (usiaho 5).
Kali tolki pra hety, to Hlebki ŭ 1974 užo isnavała, a Viaśnianku prajektavali z 1978 h. Treciaje kalco, častkaj jakoha źjaŭlajecca zhadany puciepravod, było ŭ hienpłanach minimum z 1985 (pa adnoj z krynic, navat 1965). Sam pierajezd u tym miescy byŭ z samaha pačatku čyhunki.
Prablema transpartnych kolcaŭ u Minsku - staraja, horadabudaŭniki dziesiacihodździami ich zvodziać, a tyja "nie zvodziacca".
Vašyja słovy pra kłopat ułady ja nie razumieju: ci to taki ździek zamaskiravany, ci to naiŭnaść.