Italija płanuje pabudavać najdaŭžejšy padviesny most u śviecie — u Sicyliju

Jak piša The Times, Italija źbirajecca ŭvasobić u žyćcio adnu z samych ambicyjnych inžyniernych zadum u historyi — pabudavać najdaŭžejšy ŭ śviecie padviesny most praź Miesinski praliŭ. Jon pavinien złučyć sicylijski horad Miesina ź Viła-San-Džavani ŭ Kałabryi.

Z adzinym padviesnym pralotam daŭžynioj kala 3,3 kiłamietra most bolš čym na kiłamietr pierasiahnie ciapierašniaha rekardsmiena — turecki most Čanakale. Trymać kanstrukcyju buduć stalovyja trosy dyjamietram bolš za mietr.

Premjer-ministr Italii Džordžyja Miełoni zajaviła: «Heta niaprostaja zadača, ale my razhladajem jaje jak inviestycyju ŭ sučasnaść i budučyniu Italii. Nam padabajucca składanyja vykliki, kali jany majuć sens».

Jana dadała, što most, košt jakoha aceńvajecca ŭ 13,5 miljarda jeŭra, a zaviaršeńnie płanujecca na 2032 hod, stanie «demanstracyjaj voli i techničnych viedaŭ Italii, ź jakimi mała chto ŭ śviecie moža paraŭnacca».

Pavodle danych italjanskaj budaŭničaj kampanii WeBuild, na moście šyrynioj 60 mietraŭ raźmieściacca šeść pałos dla aŭtamabilaŭ i dźvie čyhunačnyja kalainy. Kanstrukcyju buduć padtrymlivać dźvie viežy vyšynioj 399 mietraŭ.

Ideja złučyć Sicyliju z macierykom chvalavała rozumy ŭładaroŭ jašče z časoŭ Karła Vialikaha. Urad Italii raspracoŭvaŭ płany z 1960-ch hadoŭ, ličačy budaŭnictva vyrašalnym dla ekanamičnaha raźvićcia adnaho z samych biednych rehijonaŭ Italii. Ale prajekty zaŭsiody adkładalisia praz vysoki košt i ekałahičnyja prablemy.

Pavialičyć

Sprečki vakoł budaŭnictva

I siońnia płany budaŭnictva sutyknulisia z surjoznym supracivam. Hałoŭnyja arhumienty praciŭnikaŭ — ekałahičnaja pahroza dla mihrujučych ptušak, upłyŭ mafii i vysokaja siejśmičnaja niebiaśpieka.

Apošniaja aściaroha maje trahičnaje abhruntavańnie. Mienavita Miesina, adzin z punktaŭ budučaha mosta, u 1908 hodzie była praktyčna ściortaja ź ziamli ziemlatrusam mahnitudaj 7,1 bała. Taja katastrofa zabrała žyćci kala 80 000 čałaviek i stała samaj śmiarotnaj u sučasnaj historyi Jeŭropy.

U adkaz na heta kampanija WeBuild śćviardžaje, što padviesnyja masty źjaŭlajucca najbolš siejśmična nadziejnymi kanstrukcyjami, bo jany mała adčuvalnyja da ziemlatrusaŭ. Mienavita tamu ich časta budujuć u takich niebiaśpiečnych zonach, jak Kalifornija i Japonija.

Nie mienš vostra staić i pytańnie arhanizavanaj złačynnaści. Most złučyć dva rehijony, jakija ličacca centrami italjanskaj mafii: Sicyliju, radzimu «Koza Nostry», i Kałabryju, dzie bazujecca ŭpłyvovy kłan «Ndranhieta», što stvaraje vielizarnyja karupcyjnyja ryzyki dla prajekta koštam u miljardy jeŭra.

Pavialičyć

Abvinavačvańni va ŭmiašańni mafii paryruje ministr transpartu Matea Salvini (Matteo Salvini). Jon nastojvaje, što strach pierad mafijaj nie pavinien paralizavać raźvićcio krainy. Salvini padkreślivaje, što most i źviazanaja ź im infrastruktura stvorać 120 000 pracoŭnych miescaŭ i daduć mahutny šturšok ekanomicy poŭdnia Italii.

Salvini taksama asprečvaje abvinavačvańni apazicyjnych palitykaŭ levaha tołku, jakija ličać, što hrošy, jakija pojduć na budaŭnictva mosta, možna było b vydatkavać z bolšaj karyściu na škoły i balnicy:

«U kitajskich ci amierykanskich ŚMI buduć havaryć pra inžynierny cud, a ŭ nas jość ludzi, jakija bačać u najbujniejšym infrastrukturnym prajekcie na Zachadzie prablemu».

Niečakany arhumient

Jak piša Financial Times, kab pieraadoleć supraciŭ, urad Miełoni zrabiŭ niečakany chod, pieravioŭšy dyskusiju ŭ płoskaść abarony.

Rym płanuje ŭklučyć košt mosta ŭ vajennyja vydatki ŭ ramkach abaviazacielstvaŭ pierad NATA (5% VUP štohod, ź jakich 1,5% — na stratehičnuju infrastrukturu). Va ŭradavym dakładzie prajekt nazvany «fundamientalnaj infrastrukturaj dla vajennaj mabilnaści» i «klučavym u kantekście abarony i biaśpieki, spryjajučy pieramiaščeńniu ŭzbrojenych sił Italii i sajuźnikaŭ NATA».

Adnak ekśpierty ličać takija zajavy manipulacyjaj. Alesandra Marone (Alessandro Marrone), kiraŭnik abaronnaj prahramy Rymskaha instytuta mižnarodnych adnosin, śćviardžaje, što ŭrad «mocna pierabolšvaje kancepcyju» vajennaha abjekta. Pavodle jaho, pryjarytet NATA — chutkaja pierakidka vojsk na ŭschodni fłanh, a dla hetaha patrebny madernizavanyja party, aeraporty i darohi, jakija viaduć da Adryjatyki i Alpaŭ, a nie most na Sicyliju.

Bolš za toje, ekśpierty papiaredžvajuć, što most sam moža stać słaboj kropkaj i mišeńniu dla ahresara i zapatrabuje vykarystańnia darahich sistem SPA dla abarony.

Siońniašniaja paromnaja pieraprava praz praliŭ — heta sapraŭdnaje vyprabavańnie dla padarožnikaŭ. Aŭtamabilistam davodzicca hublać bolš za hadzinu, kab patrapić z adnaho bieraha na druhi. Dla čyhunki heta pieratvarajecca ŭ składanuju łahistyčnuju apieracyju: ciahniki padzialajuć na siekcyi, jakija paasobku zahaniajuć na parom, a potym źbirajuć nanova na bierazie. Uvieś praces moža raściahnucca na try hadziny. Most ža abiacaje kardynalna źmianić situacyju, skaraciŭšy čas u darozie da 15 chvilin.

Ministr Salvini žartam nahadaŭ, što praliŭ biez paromu pierasiakali tolki dvojčy: u 252 hodzie da n.e. rymski konsuł Łucyj Mieteł, jaki źviazaŭ bočki, kab pierapravić bolš za 100 bajavych słanoŭ, i śviaty XV stahodździa Francišak z Paoły, jaki, pavodle lehiendy, pierapłyŭ jaho na ŭłasnym płaščy.

Jak adznačaje vydańnie, budaŭnictva mosta pakładzie kaniec šmathadovaj historyi paromnaj pierapravy. Popyt na jaje byŭ nastolki vysoki, što ŭ 1950-ja hady adno z sudnaŭ, zatoplenych u kancy Druhoj suśvietnaj vajny, padniali z marskoha dna i viarnuli ŭ ekspłuatacyju. Jano pracavała na maršrucie jašče sorak hadoŭ i było śpisana tolki ŭ 1991 hodzie. Ciapier hetaja epocha, padobna, nabližajecca da svajho zaviaršeńnia.

• 4
• 0
• 0
• 0
• 1
• 0
• 0
• 0