Z aŭkcyjonu pradajuć kalekcyju karcin Viktara Babaryki. U tym liku tvory Lubiča i Zaka
Z małatka pradajuć 19 tvoraŭ mastactva z kalekcyi Viktara Babaryki na 344 tysiačy rubloŭ. Abjavy apublikavany na sajcie «BiełJurZabieśpiačeńnia», zaŭvažyła «Lusterka».
Samyja tannyja łoty — heta piać hraviur z vydańnia Old and New London — «Narrative of its History», «Is People and its Places» («Stary i Novy Łondan: apaviadańnie ab jaho historyi, ludziach i miescach») kanca XIX stahodździa. Pačatkovy košt prodažu kožnaj ź ich 165 rubloŭ.
Samy darahi łot — tvor «Arlekin» biełaruska-francuzska-polskaha mastaka Jaŭhiena Zaka. Jaho vystavili pa startavym košcie 99 312 rubli.
Inšy tvor hetaha ž aŭtara «Bukiet kvietak» pradajuć z małatka pa canie ad 66 208 rubloŭ.
«Piejzaž» Michaiła Kikoina vystaŭleny za 56 277 rubloŭ. Jaho ž «Jabłyni» - za 49 656.
Jość siarod aryštavanych karcin i praca mastaka Paryžskaj škoły ź Biełarusi — Vosipa Lubiča. Jaho karcinu «Teatralnaja łoža», napisanuju prykładna ŭ 1925 hodzie, z kalekcyi Viktara Babaryki vystavili pa košcie ad 19 862 rubli.
Ahulny pačatkovy košt usich tvoraŭ mastactva — kala 344 tysiač rubloŭ. Adnak kali znojducca žadajučyja ich nabyć na aŭkcyjonie 8 kastryčnika, košt prodažu budzie vyšejšym.
Chutčej za ŭsio, hetyja karciny z pryvatnaj kalekcyi Babaryki. Nahadajem, dziakujučy eks-bankiru svaja mastackaja kalekcyja źjaviłasia ŭ Biełhazprambanka. Natchniŭšysia prykładam zamiežnych bankaŭ, jon u pačatku 2010-ch pačaŭ źbirać raboty mastakoŭ, źviazanych ź Biełaruśsiu. Metaj było viarnuć u krainu imiony, jakich niama ŭ muziejnych zborach, — ad Sucina i Šahała da mienš viadomych aŭtaraŭ nakštałt Baksta. Kalekcyja vyrasła ź idei «viarnuć stračanaje mastactva» i stała bujnym kulturnym prajektam.
Raniej praz aŭkcyjony pradali inšuju majomaść Viktara Babaryki, u tym liku aŭtamabil i hadzińnik.
Ziamielny ŭčastak eks-bankira — samy darahi aktyŭ, adabrany ŭ palitviaźniaŭ i vystaŭleny na prodaž. Kali brać apanientaŭ Łukašenku ŭ cełym, to daražej pradali tolki kvateru Valeryja Capkały — amal za 400 tysiač rubloŭ.
Ciapier čytajuć
Mižnarodny kryminalny sud pačaŭ rasśledavańnie złačynstvaŭ, ździejśnienych režymam Łukašenki12
Kamientary