Nasupierak sankcyjam u Biełaruś praciahvajuć hnać mašyny ź Jeŭropy z abjomam bolš za 1,9 litra. Ale jość niuansy

Jašče letam 2024 hoda Jeŭrasajuz unifikavaŭ sankcyi ŭ dačynieńni da Biełarusi i Rasii, jakija zabaraniajuć ekspart u našu krainu mašyn z abjomam ruchavika, bolšym za 1,9 litra, elektramabilaŭ i hibrydaŭ. Ale mašyny z ruchavikami abjomam, bolšym za 1,9 litra, praciahvajuć pastupać u Biełaruś, pryčym častka ź ich traplaje da nas absalutna lehalna.

Jak takoje mahčyma

Da 29 červienia 2024 hoda ŭ Biełaruś ź Jeŭrasajuza, u adroźnieńnie ad Rasii, možna było impartavać lubyja aŭto niezaležna ad cany, abjomu ruchavika, jaho typu i kliransu.

Adnak paśla vychadu Rehłamientu Savieta (ES) 2024/1865 ad 29 červienia 2024 hoda źjavilisia abmiežavańni i dla Biełarusi. Pryčym praz składanaść farmulovak i roznyja traktoŭki ŭ roznych krainach dachodziła da taho, što Litva na niekatory čas pierastała vypuskać u Biełaruś lubyja aŭto, z momantu vypusku jakich nie prajšło piać hadoŭ. Nie prapuskali ŭ Biełaruś jak mašyny ź ES, tak i tyja, što išli tranzitam z ZŠA. 

Ale praz paru dzion situacyja vyrašyłasia, i ŭ Biełaruś ź ES znoŭ pajechali mašyny luboha ŭzrostu z abjomam ruchavika da 1,9 litra i biez abmiežavańniaŭ pa kliransie, a elektramabili i hibrydy — nie.

Što tyčycca tranzitu aŭto sa Štataŭ, to Litva ŭ dadatak stała afarmlać i prapuskać praz Kłajpiedu elektramabili i hibrydy, a taksama aŭto z abjomam ruchavika, bolšym za 1,9 litra. Ale pry vykanańni dźviuch umoŭ: pa-pieršaje, mašyna pavinna być starejšaja za piać hadoŭ, a pa-druhoje, klirans pavinien być mienšy za 165 mm.

Tamu tranzitam praz Kłajpiedu ŭ Biełaruś biez prablem jeduć 5+ hadovyja Tesla, BMW 7‑j sieryi z 3‑litrovymi ruchavikami i hetak dalej.

Pavialičyć

Abjom — nie hałoŭnaje

Vyhladaje, što apošnim časam aŭtamabili z abjomam ruchavika, bolšym za 1,9 litra, biełarusam stała možna kuplać i ŭ Jeŭrasajuzie.

Tak, adna ź minskich kampanij, jakaja śpiecyjalizujecca na pryhonie aŭto na zamovu ź Jeŭropy, prapanuje svaim klijentam mašyny, starejšyja za piać hadoŭ, z ruchavikami abjomam 2.0 i bolš.

Hałoŭnyja patrabavańni: mašyna pavinna być starejšaja za 5 hadoŭ, a klirans — mienšy za 165 mm.

Takija aŭto jany pierapradajuć praz polskuju firmu-pasiarednika, apłata idzie praz bank, mašyny dastaŭlajuć aŭtavozami praź Litvu, to-bok bieź jakich-niebudź schiematozaŭ pa abychodzie sankcyj.

Ale kali klijent zachoča mašynu, maładziejšuju za piać hadoŭ, to polskaja mytnia nie aformić ekspart na Biełaruś. Adpaviedna, lehalna dastavić jaje nie atrymajecca, a tolki alternatyŭnymi šlachami.

Pa infarmacyi «Našaj Nivy», ekspart mašyn u Biełaruś, starejšych za piać hadoŭ i z abjomam bolš za 1,9 litra, u Polščy pačali afarmlać nie paźniej, čym z kanca viasny — pačatku leta 2025 hoda.

Roznyja krainy mohuć roznyja padychody

Havorki pra toje, što litoŭskaja mytnia budzie afarmlać ekspart takich mašyn na Biełaruś, taksama vialisia jašče viasnoju hetaha hoda, ale nakolki viadoma «Našaj Nivie», u Litvie źmien nie adbyłosia.

Tranzitnyja dekłaracyi na aŭto sa Štataŭ tak i robiać na starejšyja za 5 hadoŭ aŭto niezaležna ad ruchavika, ale z kliriensam da 165 mm. A voś ekspartnyja dekłaracyi na jeŭrapiejskija aŭto adkryvajuć tolki na mašyny z ruchavikom abjomam da 1,9 litra.

Roznyja padychody ŭ roznych krainach całkam mahčymyja. Tak, naprykład, u jutubie možna znajści nie adno videa, dzie hramadzianie Rasii jeduć u Hiermaniju i nabyvajuć tam aŭto z abjomam da 1,9 litra i klirensam da 165 mm, paśla čaho afarmlajuć usie dakumienty na svoj pašpart i jeduć u Rasiju.

U toj ža čas, pa słovach čałavieka, jaki zajmajecca pryhonam aŭto z Polščy, polskaja mytnia nie afarmlaje ekspartnyja dekłaracyi na aŭto ŭ Rasiju navat na tyja varyjanty, što nie traplajuć pad sankcyi. A ad pakupnika ź Biełarusi mohuć patrabavać raśpisku, što toj abiacaje nie pierapradavać aŭto ŭ Rasiju. 

Što heta aznačaje dla šerahovaha aŭtaamatara?

Propusk mašyn z abjomam bolš za 1,9 litra — biezumoŭna, pazityŭnaja navina, bo jość šerah papularnych lehkavikoŭ, jakija ŭ liniejcy nie majuć matoraŭ, mienšych za 2 litry. Naprykład, BMW 5‑j sieryi, Audi A6 i mnohija inšyja.

Ale tym nie mienš varta ŭličvać, što na mašyny, starejšyja za piać hadoŭ, u Biełarusi dziejničajuć pavyšanyja mytnyja staŭki.

Kali razmytnić 3—5‑hadovaje aŭto z 2,0 pad kapotam možna za 2700 jeŭra z vykarystańniem ilhoty abo za 5400 bieź jaje, to za starejšyja za piać hadoŭ myta składzie 4800 jeŭra pa 140‑m ukazie i 9800 jeŭra, kali ličyć pa poŭnym taryfie.

Atrymlivajecca, što pierapłata składaje 2100 jeŭra. Ale, jak patłumačyli ŭ kampanii, kudy «Naša Niva» źviarnułasia pad vyhladam klijenta, heta vyhadniej, čym vieźci maładziejšaje aŭto praz Turcyju. Bo sama mašyna kaštuje krychu tańniej, a dastaŭka praz alternatyŭnyja šlachi abydziecca ŭ 4500—5000 jeŭra zamiest 1500—2000 jeŭra, kali dastaŭlać naŭprost praź Litvu. U dadatak nie daviadziecca parušać jeŭrapiejskaje zakanadaŭstva

• 1
• 1
• 0
• 5
• 0
• 1
• 0
• 0