Byłoha afhanskaha vajskoŭca tak mocna pabili ŭ Biełarusi, što jamu daviałosia amputavać ruku
Były supracoŭnik Ministerstva abarony Afhanistana Džychad Machamied Hul Navai paśla prychodu talibaŭ da ŭłady sprabavaŭ trapić u Jeŭropu praź Biełaruś. Pavodle infarmacyi afhanskich ŚMI ŭ vyhnańni, jaho zatrymali biełaruskija siłaviki i mocna pabili, piša Reform.news.
Miascovyja krynicy ŭ pravincyi Chos paviedamlajuć, što Navai zatrymali na miažy i katavali. Ciapier jon znachodzicca ŭ balnicy pad nahladam milicyi. U vyniku mocnych paškodžańniaŭ jahonaja ruka stała čornaj i była amputavanaja.
Televizijny kanał Afghanistan International paviedamlaje, što Džychadu 33 hady, jon žanaty i maje dźviuch dačok. Pavodle Radio Hurriyet, afhanskaja delehacyja naviedała Navai ŭ balnicy kala troch tydniaŭ tamu i zabiaśpiečyła jaho nieabchodnym lačeńniem.
Delehacyja talibaŭ była ŭ Biełarusi ŭ kancy žniŭnia dla acenki ŭmoŭ utrymańnia afhanskich viaźniaŭ i mahčymaściaŭ ich viartańnia ŭ Afhanistan. Afhanskija dypłamaty ŭ Rasii apłacili lačeńnie Navai ŭ balnicy. Sam eks-aficer adznačyŭ, što šukaŭ prytułku i zajaviŭ: «Ja nie byŭ vajennapałonnym, ja šukaŭ prytułak, ale jany złamali majo žyćcio».
Pavodle infarmacyi televizijnaha kanała, pasolstva ŭ Maskvie atrymała zadańnie jak maha chutčej viarnuć Navai ŭ Afhanistan. Niekatoryja krynicy adznačajuć, što amputacyja ruki mahła być źviazanaja nie tolki z katavańniami, ale i z chvarobaj.
Skandał u «Jeŭraopcie». 96‑hadovamu dziadulu nie dazvolili prysieści na kresła kala kasy20
Kamientary