Afhanistan zazyvaje ŭ krainu zamiežnych turystaŭ rolikam, u jakim abyhryvajecca vykradańnie ludziej
U Afhanistanie turahienctva, źviazanaje z talibami, vypuściła rekłamny rolik, kab pryciahnuć u krainu zamiežnych turystaŭ. Adnak videa heta nastolki niezvyčajnaje, što ŭ mnohich vyklikała zamiest simpatyi da krainy šok, piša Euronews.
U pačatku rolika pakazanyja sceny, jakija imitujuć vykradańnie: dvoje ludziej stajać na kaleniach z čornymi pakietami na hałavie, a ŭzbrojenyja ludzi patrabujuć vykup.
«Čao, Italija. Kali vy chočacie, kab dva vašyja hramadzianiny viarnulisia ŭ Italiju ŭ cełaści i zachavanaści, vy pavinny adpravić nam 5 miljardaŭ dalaraŭ u bitkoinach», — havorać u roliku.
Potym pakiety zdymajuć, «załožniki» ŭśmichajucca i vitajuć hledačoŭ z frazaj: «Sardečna zaprašajem u Afhanistan!»
Dalej pakazvajucca kadry, dzie turysty hulajuć pa miascovych rynkach, fatahrafujuć pryrodu i hulajuć ź dziećmi. Padobny rolik užo źjaŭlaŭsia raniej — tam «achviarami» byli amierykancy.
Hetyja videaroliki nahadvajuć pra pakarańnie zakładnikaŭ, u tym liku amierykanskaha žurnalista Denieła Pierła ŭ 2002 hodzie ŭ Pakistanie i Džejmsa Foŭli, taksama reparciora z ZŠA, u 2014 hodzie ŭ Siryi.
لماذا طلب الشباب الأفغاني خمسة مليون دولار مقابل إطلاق سراح الإيطاليين؟ #ترفيه pic.twitter.com/9rX2hHs95z
Hetyja roliki vyklikali supiarečlivuju reakcyju: ad pachvały za aryhinalnuju zadumu da asudžeńnia za vykarystańnie temaŭ hvałtu i za toje, što ŭ kadry niama žančyn. Prytym što asnoŭnaj idejaj videa zajaŭlajecca razbureńnie niehatyŭnych stereatypaŭ pra Afhanistan.
Aŭtar idei, Jasaf Arubi, vyras u ZŠA i kaža, što nie maje suviaziaŭ z afhanskimi ŭładami. Jon śćviardžaje, što choča pakazać inšuju, mirnuju i haścinnuju častku svajoj radzimy, jakaja doŭhi čas była pad akupacyjaj.
Paśla taho, jak u 2021 hodzie taliby zachapili ŭładu, Afhanistan apynuŭsia ŭ mižnarodnaj izalacyi, a bolšaść nasielnictva žyvie ŭ biednaści. Turystyčny siektar razhladajecca jak sposab palepšyć ekanamičnaje stanovišča. U 2024 hodzie krainu naviedali kala 9 tysiač inšaziemcaŭ, a z pačatku 2025 — jašče kala 3 tysiač.
Adnak niebiaśpieka ŭ krainie ŭsio jašče isnuje: adbyvajucca terakty, vykradańni i zatrymańni. Naprykład, u 2024 hodzie ŭ Bamijanie zabili troch ispanskich turystaŭ, a brytanskuju paru, što zajmałasia adukacyjnymi prajektami, aryštavali. Amierykanca, jaki byŭ aryštavany ŭ 2022 hodzie, vyzvalili tolki praz dva hady.
Takim čynam, niahledziačy na sproby zrabić turyzm «novaj nadziejaj» dla krainy, Afhanistan usio ž zastajecca nie nadta biaśpiečnym miescam dla padarožžaŭ.
Kamientary