U staličnym hipiermarkiecie pastavili razumnyja vahi sa štučnym intelektam. Jak pracuje technałohija?

Jak pracuje navinka i ci možna daviarać štučnym vačam, raźbiralisia Minsk-naviny.

Pavodle zadumy, pryłada pavinna palehčyć i paskoryć praces uzvažvańnia tavaraŭ. Pakupnikam nie treba zapaminać i ŭvodzić kod dla kožnaj sadaviny abo harodniny, nabirać ich nazvy ŭručnuju ci šukać u śpisie — z usim spravicca štučny intelekt.

Ustalavanaja nad manitoram vah kamiera zachoplivaje pradukty, jakija kładuć na płatformu, a sistema aŭtamatyčnaha videarazpaznavańnia analizuje vyjavu i prapanuje varyjanty pa formie i kolery tavaraŭ.

Pavodle śćviardžeńnia vytvorcy, pryłada nie tolki adroźnivaje harodninu, sadavinu, cukierki, suchafrukty, arechi ci inšyja pradukty, ale i lohka navučajecca.

Niejrasietka zapaminaje zrobleny pakupnikom vybar i ŭličvaje jaho ŭ dalejšaj pracy, tamu kožnaje novaje ŭzvažvańnie robić nastupnyja bolš dakładnymi.

Jość u «razumnych» vah jašče adzin plus — jany dapamahajuć paźbiehnuć pierabłytvańnia tavaraŭ. Kali pakupnik abo apieratar kasy niapravilna ŭkazvaje kod tavaru pry ŭzvažvańni, u bazie danych kramy ŭźnikaje błytanina: adnaho tavaru akazvajecca lišak, a druhoha, naadvarot, niedachop.

Takaja situacyja moža ŭźniknuć nie tolki z-za vypadkovaj pamyłki, ale i z-za naŭmysnaj padmieny z boku pakupnikoŭ, jakija ŭzvažvajuć darahija pradukty jak tannyja. Štučny zrok raspaznaje tavary z dakładnaściu da 99 %, što praktyčna całkam vyklučaje vierahodnaść pamyłki z-za čałaviečaha faktaru, zapeŭnivaje na svaim sajcie vytvorca «razumnych» vah.

Testavańnie «razumnaj» techniki pačałosia, zdavałasia b, z samaha prostaha — čyrvonaha jabłyka.

I tut adrazu zdaryŭsia pravał: vahi frukt nie raspaznali naohuł, nie vydaŭšy nivodnaha varyjantu. Nastupnymi na płatformu adpravilisia kruhłyja pamidory ŭ pakiecie — zhodna z apisańniem, štučny zrok pavinien raspaznavać tavary ŭ ploncy, sietcy i cełafanie.

Vydaŭšy na paru siekund varyjant «Pamidory śliŭka», «razumnaja» technika znoŭ zadumałasia… i znoŭ nie prapanavała nivodnaha varyjantu.

Na hetym miescy možna było b zrabić vysnovu, što technałohija zusim syraja i dalokaja ad daskanałaści, ale tut da vah padyšła pakupnica z kitajskim vinahradam «Šajn muskat». I cud — bujnyja zialonyja jahady vahi, narešcie, raspaznali.

Pavialičyć

Śledam na płatformu adpraviłasia jašče adna hronka, užo ŭ pakiecie — i heta pryładzie akazałasia pa siłach, a dakładniej, pa vačach. Ekśpierymienty ź inšaj harodninaj i sadavinoj praciahvalisia ź pieramiennym pośpiecham. Z šampińjonami prablem nie było, płady inžyra štučny intelekt raspaznavaŭ praz raz, a voś mnostva sartoŭ jabłykaŭ i vinahrad dla niejrasietki akazalisia terra incognita.

Najlepš spravy išli z bananami — ich vahi vyznačali va ŭsich vypadkach. Spravilisia vahi i z zahornutaj u plonku piekinskaj kapustaj. Zatoje bakłažan i čyrvonaja cybula nie paddalisia ŠI, a hreckija arechi vahi ŭparta identyfikavali jak žoŭtyja čery.

Pavialičyć

U vyniku, kab nakleić etykietki na pradukty, ich nazvy davodziłasia nabirać uručnuju, a sami płady — dastavać z pakietaŭ. Sam praces uzvažvańnia zaniaŭ jašče bolš času, čym na zvyčajnych pryładach.

Jak niaredka byvaje, zaduma dobraja, ale jaje realizacyja kulhaje — da čałaviečych vačej i ruk vysokim technałohijam pakul jašče daloka.

• 1
• 0
• 6
• 0
• 1
• 0
• 0
• 0