U štacie Tenesi ranicaj 10 kastryčnika prahučaŭ mahutny vybuch na zavodzie Accurate Energetic Systems (AES), jaki zajmajecca vytvorčaściu vybuchovych rečyvaŭ. Paśla pieršaha vybuchu adbyłasia i druhasnaja detanacyja.
Pa danych telekanała Fox News sa spasyłkaj na miascovyja ŭłady, zahinuli jak minimum dva čałavieki, jašče nie mienš za dzieviatnaccać ličacca źnikłymi bieź viestak. Niekalki paranienych byli dastaŭlenyja ŭ špital.
Na kadrach, jakija apublikavaŭ telekanał, bačna, što na miescy vybuchu zastałasia vialikaja kuča abłomkaŭ, achoplenaja połymiem. Taksama vybuch paškodziŭ i niekalki aŭtamabilaŭ, što znachodzilisia na stajancy kala zavoda. Žychary horada Łobiełvił, jaki raźmieščany prykładna za 20 chvilin jazdy ad miesca trahiedyi, raskazali, što padčas vybuchu ich damy litaralna treślisia.
Pradpryjemstva AES znachodzicca ŭ lasistaj miascovaści prykładna za 80 kiłamietraŭ na zachad ad Nešviła. Pavodle adkrytych krynic, vytvorčy kompleks uklučaŭ piać budynkaŭ i łabaratoryju dla pravierki jakaści pradukcyi. Kampanija isnuje z 1980 hoda i śpiecyjalizujecca na raspracoŭcy, vytvorčaści, transpartavańni i zachoŭvańni roznych vidaŭ vybuchovych i enierhietyčnych materyjałaŭ, u tym liku dla patreb abaronnaj i kaśmičnaj pramysłovaści.
Siarod klijentaŭ zavoda — Ministerstva abarony i Ministerstva ŭnutranaj biaśpieki ZŠA. AES pastaŭlała armii dynamit, supraćpiachotnyja miny i vybuchovy porach dla snaradaŭ bujnoha kalibru. Zavod taksama źjaŭlajecca adnym z hałoŭnych pracadaŭcaŭ u rehijonie.
Šeryf akruhi paviedamiŭ, što pryčyna vybuchu pakul nie vyśvietlenaja, a rasśledavańnie moža zaniać niekalki dzion. Miedyki i ratavalniki nie adrazu zmahli trapić na terytoryju pradpryjemstva, bo tam praciahvałasia detanacyja.
Ciapier čytajuć
U pačatku 2000‑ch troje nastaŭnikaŭ historyi źbiehli va Ukrainu ad «hienacydu biełaruskaha naroda», jaki čyniŭ režym Łukašenki. Jak skłaŭsia ich los?1212
Kamientary