Stała viadomaja nazva bara, jaki viadomyja žurnalisty adkryvajuć u Varšavie. Jany buduć sami stajać za stojkaj

Pryčyna, čamu žurnalisty pajšli ŭ barnuju spravu, akazałasia prostaj. Sprava ŭ skaračeńni donarskich hrošaj — niezaležnyja biełaruskija miedyja adčuvajuć hetuju prablemu ŭžo nie pieršy hod. U kancy 2023‑ha kamanda Reform.news abviaščała zbor na padtrymku miedyja, tady biełarusy za dva dni sabrali dla žurnalistaŭ 17 tysiač jeŭra.

Historyja z baram jakraz datyčyć finansavańnia sajta, kaža Paŭlučenka:

«My znajšli inviestara, jaki vystaviŭ niekalki ŭmoŭ. Asnoŭnaja ŭmova — častka prybytku ad hetaha bara budzie iści na padtrymku redakcyi Reform.news. Voś takaja prostaja manietyzacyja.

Nasamreč hrošy nievialikija. Dziakuj, što znajšoŭsia inviestar, jaki padtrymaŭ ideju. Biezumoŭna, my ŭkładajem i častku ŭłasnych hrošaj. Ale pakul što havorka pra nievialikija sumy. My nie majem dośviedu ŭ takich prajektach, tamu supracoŭničajem ź ludźmi, jakija majuć u hetym dośvied».

Pavialičyć

Novy bar budzie mieć nazvu Redakcja.

«Asnoŭnaja ideja — zrabić žurnaliscki bar. My sprabujem stvaryć takuju prastoru, kab heta byŭ nie tolki biznes, ale i prastora dla žurnalisckaj dziejnaści. Pasprabujem tam stvarać našy padkasty, spadziajemsia, što budziem tam častkova zapisvać [šou] «Saša, što ty niasieš?!». 

Taksama spadziajomsia, što biełaruskija i nie tolki biełaruskija žurnalisty, jakija pracujuć u Varšavie, buduć naviedvać hetaje miesca i karystacca mahčymaściami pamiaškańnia. Jano dazvalaje zapisvać intervju, ładzić niejkija iventy. Šmat chto ź biełarusaŭ adkryvaje zusim nievialičkija bary na niekalki čałaviek, hetaje pamiaškańnie budzie troški bolšaje».

U pieršyja miesiacy, kaža Paŭlučenka, žurnalisty Reform.news źbirajucca sami pracavać u bary, chacia i budzie składana sumiaščać heta z asnoŭnaj pracaj. Jon zaŭvažaje, što ŭ žurnalistaŭ jaho miedyja niama ofisa, dzie jany mahli b razam pracavać, tamu dla hetaha buduć vykarystoŭvać i pamiaškańnie bara.

Pakul što prajekt na rańniaj stadyi:

«My tolki znajšli miesca dla bara, heta dobraje pamiaškańnie ŭ centry Varšavy ź dziaržaŭnaj arendaj, to-bok ceny nie takija, jak na kamiercyjnym rynku. Pakul što majem mahčymaść rabić tam patrochu ramont. Jašče jość pytańni biurakratyčnyja, pytańni z atrymańniem licenzii, tamu, mahčyma, u hetym hodzie jašče nie zapracujem.

Spadziajomsia, što ŭ bližejšyja miesiacy čatyry my zrobim hetyja spravy. U našych intaresach chutčej pačać pracavać, bo my ŭžo płacim hrošy za arendu».

Paŭlučenka dzielicca, što pakul stvaralniki bara i sami nie viedajuć, u kolki im kančatkova abydziecca adkryćcio ŭstanovy, ale raźlik na nievialikija hrošy. U prajekta šmat sainviestaraŭ.

Pavodle słoŭ Paŭlučenki, jon sam układaje sumu pamieram u adzin-dva siaredniejeŭrapiejskija miesiačnyja zarobki.

Praz usio heta, kaža Fiodar, i dyzajn, i abstalavańnie ŭ bary buduć niedarahija. Mahčyma, u pracesie atrymajecca aščadzić, naprykład, nabyć nianovaje abstalavańnie.

Paŭlučenka pryznaje, što prajekt maje svaje ryzyki:

«Toje, što ŭ nas niama dośviedu pracy ŭ takim biznesie, stvaraje pieraškody. Adčuvaju ryzyku, što moža nie atrymacca, šmat jakija [padobnyja] prajekty nie ŭźlatali. Ale štości mnie padkazvaje, što naša aŭdytoryja nas padtrymaje. I ŭvohule ŭ Varšavie, nakolki ja razumieju, žyvie bolš za 80 tysiač biełarusaŭ. Spadziajusia, što jany daviedajucca pra hetaje miesca i buduć jaho čaściej naviedvać».

• 7
• 1
• 3
• 1
• 0
• 0
• 0
• 5