Spalvać nielha, vykidać u śmietnik — taksama. Što rabić ź listotaj u dvary?
Uvosień, kali haradskija vulicy i dačnyja ŭčastki ŭsypanyja dyvanami ź listoty, uźnikaje pytańnie, kudy padzieć apałaje liście? Bo daloka nie ŭsie sposaby zakonnyja. Smartpress piša, jak abychodzicca ź listotaj pravilna, pavodle biełaruskich pravił.
Jak ich pravilna ŭtylizavać
Uładalniki ziamielnych učastkaŭ musiać svaje raślinnyja adchody:
kampastavać;
vyvozić u miežach asobnaj pasłuhi. Dla hetaha nieabchodna zaklučyć damovu ź jurydyčnymi asobami, jakija zajmajucca žyllova-kamunalnymi pasłuhami, abo arhanizacyjami, jakija zajmajucca kamunalnymi adchodami.
A voś vykidvać raślinnyja adchody ŭ kantejniery dla druhasnych resursaŭ nielha!
Žychary šmatkvaternych damoŭ, kali ich prydamavaja terytoryja pieradadzienaja ŭ arendu tavarystvu ŭłaśnikaŭ, taksama pavinny kiravacca hetym praviłam.
Raślinnyja adchody ŭ hetym vypadku vyvoziacca ŭ miežach asobnych damoŭ pavodle zajavak upaŭnavažanych asob tavarystva ŭłaśnikaŭ.
Ci možna spalić?
Spalvańnie listoty na dvary abo na dačy parušaje sanitarnyja normy i praviły pažarnaj biaśpieki. Pry hareńni vydzialajucca kancerahieny, dym zabrudžvaje pavietra i moža pryvieści da ŭzharańnia.
Za parušeńnie hetych pravił praduhledžany štraf pavodle artykuła 15.63 KaAP — da 30 bazavych vieličyń (da 1260 rubloŭ).
Pryrodaachoŭnyja inśpiekcyi nahadvajuć: «Spalvać apałaje liście ŭ nasielenych punktach zabaroniena». Heta datyčyć i indyvidualnych učastkaŭ, i sadovych tavarystvaŭ.
Ci možna vyvieźci ŭ les?
Mnohija ličać, što kali liście pierahnivaje, to i škody pryrodzie nie budzie. Na spravie ŭsio inakš.
Listota, sabranaja ŭ horadzie, źmiaščaje pył, ciažkija mietały i čaścicy ad vychłapnych hazaŭ. Vysypać jaje ŭ lesie — značyć unosić zabrudžvańnie ŭ pryrodnuju ekasistemu.
Akramia taho, pavodle zakona raźmiaščać adchody (u tym liku arhaničnyja) možna tolki ŭ śpiecyjalna adviedzienych miescach. Śmietnik listoty ŭ lesie — heta administracyjnaje pravaparušeńnie. Da 10 bazavych vieličyń (420 rubloŭ) daviadziecca zapłacić, kali vy vyrašyli, što lasny masiŭ — heta najlepšaje miesca dla vašych raślinnych adchodaŭ.
Kamientary