Tramp padpisaŭ časovy biudžet. Samy doŭhi ŭ historyi ZŠA šatdaŭn zavieršany
U sieradu viečaram Pałata pradstaŭnikoŭ ZŠA prahałasavała za prajekt biudžetu, jaki nieŭzabavie padpisaŭ prezident Tramp. Rabota fiederalnaha ŭrada adnovicca paśla rekordnaha 43‑dzionnaha pierapynku, piša Bi-bi-si.
Časovy biudžet pastupiŭ na podpis da prezidenta Donalda Trampa pozna ŭviečary ŭ sieradu, praź dźvie hadziny paśla taho, jak prajekt padtrymali 222 členy Pałaty pradstaŭnikoŭ. Dla jaho zaćviardžeńnia była nieabchodnaja prostaja bolšaść hałasoŭ.
Raniej prajekt biudžetu ŭžo byŭ uchvaleny Sienatam ZŠA.
U ciapierašnim składzie Pałaty ŭ respublikancaŭ 219 mandataŭ suprać 214 u demakrataŭ (usiaho 433, dva miescy ŭ ciapierašni čas vakantnyja). Prostaja bolšaść, takim čynam, składaje 217 hałasoŭ.
Adnak uviečary ŭ sieradu ŭ zale adsutničali čatyry kanhresmieny: troje respublikancaŭ i adzin demakrat. Heta źniziła nieabchodny dla pryniaćcia prajekta biudžetu barjer da 215 hałasoŭ, jaki ŭ vyniku byŭ pieraadoleny z zapasam.
Heta stała mahčymym tamu, što dakumient byŭ padtrymany nie tolki 216 respublikancami, ale i šaściu demakratami. Pry hetym dva pradstaŭniki Respublikanskaj partyi prahałasavali suprać razam z 207 demakratami.
Paśla taho jak časovy biudžet padpisaŭ prezident, urad adnović pracu, i samy doŭhi ŭ historyi ZŠA šatdaŭn zavieršycca. Papiaredni rekord (35 dzion) taksama byŭ ustalavany pry prezidencie Trampie, ale padčas jaho pieršaha terminu.
Padpisaŭšy biudžet u prysutnaści vialikaj kolkaści telekamier, Tramp nazvaŭ dzień zakančeńnia šatdaŭna «vialikim».
Što źmienicca paśla zakančeńnia šatdaŭna?
Prajekt, pryniaty ŭ sieradu, dazvolić fiederalnamu ŭradu pracavać jašče dva ź nievialikim miesiacy — da 30 studzienia 2026 hoda. Pryniaty prajekt biudžetu harantuje, što ŭsie fiederalnyja ministerstvy i ahienctvy adnoviać pracu, ich finansavańnie zabiaśpiečana da 30 studzienia 2026 hoda. Akramia taho, heta aznačaje, što vyklikanyja šatdaŭnam zvalnieńni i skaračeńni fiederalnych słužačych spyniacca.
Tym rabotnikam, chto z-za šatdaŭna byŭ adpraŭleny ŭ adpačynak abo byŭ vymušany pracavać biez apłaty (jak, naprykład, avijadyśpietčary), u minułym vypłačvali zarobak zadnim čysłom.
Niekatoryja prahramy, jakija byli hetaj vosieńniu pastaŭleny na paŭzu z-za šatdaŭna — u tym liku charčovaja prahrama SNAP dla małamajomnych — buduć prafinansavany pryniatym prajektam biudžetu da kanca nastupnaha finansavaha hoda, heta značyć da kanca vieraśnia 2026 hoda. Novy prypynak pracy ŭrada, kali jon zdarycca za hety čas, ich užo nie zakranie.
Kamientary