Łukašenka patrabuje ad Litvy palityčnych pieramoŭ na ŭzroŭni MZS. Fury zastajucca ŭ zakładnikach
Alaksandr Łukašenka ličyć, što situacyju ź litoŭskimi hruzavikami pavinny «razrulvać» MZS Biełarusi i Litvy. Što mienavita treba «razrulvać», kali miaža adkrytaja, nie tłumačycca, ale 1800 fur na litoŭskich numarach nieruchoma stajać u Biełarusi.
Alaksandr Łukašenka pryniaŭ z dakładam dziaržsakratara Rady biaśpieki Alaksandra Valfoviča, jaki pa daručeńni sustrakaŭsia z vadzicielami fur, što stajać u Biełarusi paśla zakryćcia i paśla adkryćcia Litvoj hranicy, pieradaje BIEŁTA.
«My z vami damaŭlalisia, što ŭ niadzielu vy pierahavorycie z vadzicielami vialikahruzaŭ. Ich 1800 dzieści litoŭskich, ź litoŭskimi numarami, — skazaŭ Alaksandr Łukašenka. Valfovič udakładniŭ, što ŭ Biełarusi ciapier 1818 fur na litoŭskich numarach. — Vadzicieli, zrazumieła, — i biełarusy, i rasijanie, i litoŭcy, i kazachi — roznyja ludzi jość. Miažu jany [litoŭcy] adkryli. Zrazumieła, pryznavacca nie chočuć, što jany vinavatyja. Dy nam heta i nie treba — ludzi bačać, chto maje racyju, chto vinavaty».
Łukašenka dadaŭ, što litoŭski bok budzie «źnižać hradus», padšturchoŭvajučy, pavodle jaho słoŭ, vadzicielaŭ da taho, kab jany zajmali peŭnuju palityčnuju pazicyju.
«Treba było rastłumačyć ludziam, što adbyvajecca, jak adbyvajecca, chto kamu vinien, u rešcie rešt. Ja miarkuju, vy heta zrabili» — skazaŭ jon Valfoviču.
«Hetyja ludzi ni ŭ čym nie vinavatyja. Ja ŭžo havaryŭ ab hetym: jany ni ŭ čym nie vinavaty. U tym liku i ich arhanizacyi aŭtapieravozčykaŭ. U čym litoŭskija aŭtapieravozčyki vinavatyja? Ni ŭ čym. Heta hłupstva było na palityčnym uzroŭni», — dadaŭ jon.
Ale čamu Biełaruś nie vypuskaje litoŭskija fury, Łukašenka publična nie ŭdakładniŭ. Ale skazaŭ, što «ciapierašniuju situacyju» treba budzie vyrašyć źniešniepalityčnym viedamstvam dźviuch krain: «Niachaj Ministerstva zamiežnych spraŭ naša i litoŭskaje sustrakajucca i razrulvajuć hetu situacyju».
Litoŭski bok admaŭlaŭ mahčymaść palityčnych pieramoŭ ź biełaruskimi ŭładami, jakich ličyć i nielehitymnymi, i suahresarami ŭ vajnie z Ukrainaj. Łukašenka, vyhladaje, choča złamać ich, šantažujučy zakładnikami.
Kamientary