Aŭstryja ŭśled za Litvoj i Ukrainaj admoviłasia pahadzicca z budaŭnictvam biełaruskaj AES

Pradstaŭniki hramadskaści, ministerstvaŭ i fiederalnych ziemlaŭ Aŭstryi na słuchańniach 11 maja ŭ Vienie vykazalisia suprać budaŭnictva AES u Biełarusi.

Vynik słuchańniaŭ padvioŭ Hierchard Łojdl, pradstaŭnik ekałahičnaj słužby ŭrada Vierchniaj Aŭstryi. «Infarmacyja, pradstaŭlenaja na słuchańniach aficyjnaj biełaruskaj delehacyjaj, biazdokaznaja, — zajaviŭ jon. — Nie dakazana, što prajekt «AES‑2006» možna adnieści da «pakaleńnia 3+». Upłyŭ AES na navakolnaje asiarodździe analizujecca nie poŭnaściu. Niama nijakaj vyraznaści ŭ pytańniach abychodžańnia z adchodami i z zachoŭvańniem AJAP. Niajasna, što adbudziecca ŭ vypadku padzieńnia na achoŭny korpus reaktara pasažyrskaha samalota. Mahčymaści vykarystańnia ŭznaŭlalnych krynic enierhii acenieny niapravilna, niama jasnaści sa scenaryjami najbolej ciažkich avaryj. Naš vyvad: prajekt nie hatovy. Prosim prypynić jaho realizacyju».

Pa zamovie Ministerstva navakolnaha asiarodździa Aŭstryi hrupa daśledčykaŭ padrychtavała ekśpiertnaje zaklučeńnie pa papiaredniCh AUNA biełaruskaj AES, u jakim prajektu była dadziena niehatyŭnaja acenka. Doktar Antonija Vieniš z Aŭstryjskaha instytuta ekałohii, suaŭtar ekśpiertnaha zaklučeńnia, zajaviła na słuchańniach, što pradstaŭlenaja pa aficyjnych kanałach infarmacyja pra biełaruskuju AES «nie ŭtrymoŭvaje analizu ryzykaŭ». «Čamu ŭ nas niama hetaj infarmacyi? Vierahodnaść katastrofy nie vyklučana na 100%. Heta pytańnie važna dla Aŭstryi», — skazała Vieniš.

«Astravieckaja placoŭka znachodzicca pryblizna na takoj ža adlehłaści ad Aŭstryi, što i Čarnobylskaja AES. Kala 3% čarnobylskich radyjonuklidaŭ vypała ŭ Aŭstryi, i my nie chočam, kab heta paŭtaryłasia, tamu my suprać», — zajaviŭ pradstaŭnik aŭstryjskaj hramadskaj arhanizacyi «Hłobał 2000» Rejnchard Uryh.

Pa zaprašeńni «Hłobał 2000» u Vienu pryjechali pradstaŭniki hramadskaj ekałahičnaj ekśpiertyzy biełaruskaj AES Iryna Suchij (HA «Ekadom») i Andrej Ažaroŭski (hrupa «Ekaabarona»). Jany pradstavili na słuchańniach zaklučeńnie hramadskaj ekałahičnaj ekśpiertyzy, jakoje taksama havoryć ab nieprymalnaści i pavyšanaj niebiaśpiecy prajekta Astravieckaj AES.

Viadučy słuchańniaŭ, pradstaŭnik Ministerstva navakolnaha asiarodździa Aŭstryi Vilchielm Fohiel paviedamiŭ, što pa vynikach kansultacyj i słuchańniaŭ pa biełaruskaj AES budzie składzieny dakumient, jaki budzie aficyjna nakiravany ŭ Biełaruś.

Aŭstryja admoviłasia vykarystoŭvać jadziernuju enierhietyku na refierendumie ŭ 1978 hodzie i z taho času aktyŭna vystupaje suprać budaŭnictva novych AES i za vykarystańnie ŭznaŭlalnych krynic enierhii.

• 0
• 0
• 0
• 0
• 0
• 0
• 0
• 0