Uzbrojenaja hrupa na katary pad ściaham ZŠA zładziła pierastrełku z pamiežnikami Kuby. Čaćviora zahinuli
Incydent adbyŭsia ranicaj 25 lutaha.
Hrupa ŭzbrojenych ludziej na katary pad ściaham ZŠA ŭvarvałasia ŭ terytaryjalnyja vody Kuby i adkryła ahoń pa supracoŭnikach kubinskaj pahraničnaj achovy, paviedamiła MUS respubliki.
Incydent adbyŭsia ranicaj 25 lutaha kala kanała El-Pina ŭ pravincyi Vilja-Kłara, kali kubinskaja bierahavaja achova nabliziłasia da katara, kab identyfikavać pasažyraŭ.
U vyniku sutyknieńnia čatyry čałavieki na amierykanskim sudnie byli zabityja, jašče šaściora atrymali ranieńni. Ich evakujavali i akazvajuć miedycynskuju dapamohu. Taksama ranieńni atrymaŭ kamandzir kubinskaha sudna.
Paźniej u MUS Kuby ŭdakładnili, što katar byŭ zarehistravany ŭ Fłarydzie. Uvieś ekipaž sudna składaŭsia z uradžencaŭ Kuby, jakija pražyvajuć u ZŠA. Niekatoryja ź ich majuć sudzimaści. Kubinskija ŭłady šukali hetych ludziej za datyčnaść da arhanizacyi, finansavańnia abo ździajśnieńnia dziejańniaŭ terarystyčnaha charaktaru na terytoryi krainy abo za jaje miežami.
Na hety momant ustanoŭleny asoby šaści tych, chto zastaŭsia ŭ žyvych, i adnaho zahinułaha; źviestki jašče pra traich udakładniajucca. Na katary byli znojdzieny šturmavyja vintoŭki, karotkastvolnaja zbroja, samarobnyja vybuchovyja pryłady (kaktejli Mołatava), broniekamizelki, aptyčnyja pryceły i kamuflažnaja forma.
Na Kubie taksama zatrymali hramadzianina Duniela Ernandesa Santasa, jakoha nakiravali z ZŠA, kab jon pryniaŭ uzbrojenuju hrupu. Supracoŭniki biaśpieki praciahvajuć rasśledavańnie.
Kamientary