Jak supracoŭnica HRU pad vyhladam «śvieckaj ilvicy» ŭcirałasia ŭ davier da NATAŭskich aficeraŭ
Hetaje rasśledavańnie — historyja pra rasijskuju raźviedčycu, jakaja pad vyhladam śvieckaj ilvicy pieruanskaha pachodžańnia zmahła abvieści vakoł palca dziasiatki NATAŭskich aficeraŭ (i nie tolki) i hadami atrymlivała kaštoŭnuju infarmacyju z roznych jeŭrapiejskich krain. Jana i zaraz by žyła i pracavała ŭ Jeŭropie, kali b rasśledavańnie The Insider i Bellingcat nie prymusiła jaje viarnucca ŭ Rasiju. Novaje rasśledavańnie stała sumiesnym prajektam The Insider, Bellingcat, Der Spiegel i La Repubblica. Pryvodzim jaho sa skaračeńniami.
Apoŭnačy 14 vieraśnia 2018 hoda hienierał-major Andrej Aviarjanaŭ, kamandzir sakretnaj apieratyŭnaj častki HRU 29155, usio jašče byŭ na pracy — u štab-kvatery HRU na Charašoŭskaj šašy.
U hienierała vydaŭsia ciažki dzień: pad viečar The Insider i Bellingcat apublikavali svajo rasśledavańnie «Sałbiereckija», pryśviečanaje padnačalenym Aviarjanava — «Piatrovu» i «Bašyravu», dzie dakazvałasia ich dačynieńnie da śpiecsłužbaŭ. Siarod inšaha ŭ rasśledavańni ŭpieršyniu vyjaŭlałasia toje, što HRUšniki karystajucca pašpartami prykryćcia sa śpiecyjalnaj sieryi. Tekst zakančvaŭsia słovami: «Taksama cikava, što kali pamianiać apošniuju ličbu ŭ pašpartach Piatrova ci Bašyrava, to vy znoŭ vyjavicie ludziej ź dziŭnymi ankietami, ź niapoŭnymi adrasami (naprykład, biez kvatery) i adsutnych u jakich-niebudź sacsietkach i bazach dadzienych».
Choć Aviarjanaŭ nie moh tady viedać, što hety tekst stanie tolki pieršym ź sieryi hučnych rasśledavańniaŭ, jon užo razumieŭ maštab katastrofy, jakaja zdaryłasia: dziasiatki dziejnych supracoŭnikaŭ, mnohija ź jakich prama ŭ hety momant znachodzilisia ŭ Jeŭropie z pašpartami hetaj sieryi.
Usio kiraŭnictva vyviedki da nočy pracavała ŭ aŭralnym režymie. Za try chviliny da paŭnočy Aviarjanavu patelefanavali z adździeła HRU, jaki adkazvaje za «nielehałaŭ», heta značyć raźviedčykaŭ, jakija pastajanna žyvuć za miažoj pad vyhladam zamiežnikaŭ i pad čužym imiem. Zvyčajna hetaja prafiesija asacyjujecca sa Słužbaj źniešniaj raźviedki, ale svaje «nielehały», niachaj i niašmat, jość i ŭ HRU. Padrychtavać svajho nielehała — najskładaniejšaja z usich zadač vyviedki, na ŭkaranieńnie marnujucca doŭhija hady, raźviedčyk pavinien vydatna vałodać movaj i ŭmieć pierakanaŭča hulać svaju rolu, adnym słovam jon pavinien być maksimalna niepadobnym na «Piatrova» i «Bašyrava».
Na nastupny dzień, 15 vieraśnia 2018 hoda, žančyna z pašpartam na imia Maryja Adeła Kufielt Ryviera kupiła bilet u adzin kaniec ź Nieapala ŭ Maskvu. Zrešty, samaje charakternaje ŭ pašparcie było nie imia, a jaho numar — jon tolki apošniaj ličbaj adroźnivaŭsia ad pašpartoŭ «Piatrova» i «Bašyrava».
Kala dziesiaci hadoŭ «Adeła» žyła ŭ roznych krainach Jeŭropy i ŭ šmatlikich kołach była dobra viadomaja jak śvieckaja lvica, jakaja naradziłasia ŭ Pieru, dyzajnier sa svajoj linijaj juvielirnych upryhožvańniaŭ. Ź joj ciesna stasavalisia vajennyja, palityki i žurnalisty, jana davała intervju i rabiła šumnyja viečarynki, ale za adzin dzień, 15 vieraśnia 2018 hoda, Maryja Adeła Kufieldt Ryviera pieratvaryłasia ŭ Volhu Vasiljeŭnu Kołabavu 1982 hoda naradžeńnia i viarnułasia ŭ svaju maskoŭskuju kvateru.
Lehienda
«Maryja Adeła» raskazvała svaim novym znajomym davoli ekzatyčnuju viersiju svajho pachodžańnia: jana naradziłasia ŭ pieruanskim Kaljaa, jaje baćka byŭ niemcam, a maci — pieruanka. Baćka ich kinuŭ i maci vychoŭvała jaje adna, a ŭ 1980 hodzie razam ź joj pajechała ŭ Saviecki Sajuz, kab uziać udzieł u Alimpijskich hulniach (!). Tamaka jaje maci atrymała ekstranaje paviedamleńnie ź Pieru, joj patrebna było terminova viarnucca dadomu, i jana pakinuła maleńkuju «Maryju Adełu» na apieku niejkaj savieckaj siamji (?!), ź jakoj jana, vidać, pasiabravała. Jaje maci tak i nie viarnułasia, i «Maryja Adeła» vyrasła ŭ Rasii, majučy składanyja adnosiny jak z pryjomnaj maci, tak i z baćkam, jaki, jak jana raskazvała ludziam, žorstka abychodziŭsia ź joj u dziciačyja hady.
Rym, Malta, Paryž, Łondan
Kali mienavita «Adeła» źjaviłasia ŭ Jeŭropie, vyśvietlić zaraz składana, ale, miarkujučy pa jaje fota ŭ sacyjalnych sietkach inšych ludziej, znachodziłasia jana ŭ Rymie i na Malcie ŭ pieryjad z 2009 pa 2011 hod.
Marsel D'Ardžy Śmit, jakaja raniej pracavała redaktaram brytanskaha vydańnia časopisa Cosmopolitan, ličyła Adełu svaim blizkim siabram z taho času, jak paznajomiłasia ź joj na viečaryncy z nahody jaje dnia naradžeńnia na Malcie ŭ 2010 hodzie. Pavodle jaje słoŭ, «Adeła» tady skazała joj, što vyvučała hiemałohiju ŭ Paryžy, ale časta byvała na Malcie, dzie ŭ jaje byŭ chłopiec.
Pa słovach Marsel D'Ardžy Śmit, «Adeła Maryja» spačatku vyvučała hiemałohiju va ŭniviersitecie ŭ Rymie, a ŭ lutym 2011 hoda adpraviłasia ŭ Vialikabrytaniju ŭ ramkach vučebnaj pajezdki ŭ roznyja kampanii pa dyzajnie adzieńnia. U kastryčniku 2011 hoda «Maryja Adeła» pierajechała ŭ Paryž, kab atrymać stupień MBA.
U Łondan «Adeła» taksama naviedvałasia niaredka, i D'Ardžy Śmit uspaminaje, što «Adeła» prasiła jaje paznajomić ź jakimi-niebudź anhielskimi palitykami abo łordami, praŭda, dalej hutarak sprava nie zajšło.
Nieŭzabavie paśla pierajezdu ŭ Paryž jana zarehistravała ŭ Francyi ŭłasnuju juvielirnuju handlovuju marku pad brendam Serein. Z hetaha momantu aficyjnym biźniesam prykryćcia dla Adeły stała hetaja juvielirnaja kampanija.
Dziŭny šlub
U lipieni 2012 hoda «Maryja Adeła» vyjšła zamuž za mužčynu, jaki, jak jana tłumačyła siabram, byŭ italjancam. Nasamreč, aproč italjanskaha pašparta, jaje muž D. M. mieŭ ekvadorskaje i rasijskaje hramadzianstva i naradziŭsia ŭ Maskvie ŭ siamji ruskaj maci i baćki z Ekvadora. Niezadoŭha da ich viasiella jon atrymaŭ rasijski pašpart u pasolstvie Rasii ŭ Ekvadory. Paśla taho jak šlub byŭ zarehistravany ŭ Rymie, jon jeździŭ u Maskvu, dzie ŭ vieraśni 2012 hoda atrymaŭ rasijski identyfikacyjny numar padatkapłacielščyka.
Praz hod jon znoŭ pajechaŭ u Maskvu asobna ad «Maryi Adeły».
Jon pamior u Maskvie 13 lipienia 2013 hoda va ŭzroście 30 hadoŭ, pryčyna śmierci zapisana ŭ paśviedčańni ab śmierci jak «dvajnaja pnieŭmanija i sistemnaja čyrvonaja vaŭčanka». Jaho blizkija siabry byli vielmi ździŭlenyja, kali daviedalisia ad The Insider, što jon byŭ u šlubie, pra «Maryju Adelu» jany nikoli nie čuli, i jaje źniešnaść im ni pra što nie kazała.
Viasiołaja ŭdava
U pačatku 2013 hoda «Maryja Adeła» zarehistravała ŭłasnuju kampaniju ŭ Italii — Serein SRL, metaj jakoj była vytvorčaść i handal juvielirnymi vyrabami i pradmietami raskošy. Paźniej jana pierajechała ŭ nieapalitanski pryharad Pazilipa ź vidam na zaliŭ.
Mienavita ŭ Nieapali pačaŭsia pik karjery «Maryi Adeły» jak rasijskaha špijona-nielehała. Na praciahu nastupnych troch hadoŭ jana stała nieadjemnaj častkaj miascovaha śvieckaha žyćcia: adkryła bucik juvielirnych vyrabaŭ i pradmietaŭ raskošy, paźniej pieratvaryła jaho ŭ modny kłub, dzie burliła miascovaje śvieckaje žyćcio, i, narešcie, uznačaliła miascovaje adździaleńnie dabračynnaj arhanizacyi Lion's Club.
U buciku «Maryi Adeły» byli pradstaŭleny firmovyja ŭpryhožvańni ź linii Serein, jakija, pa joj słovam, jana raspracavała sama. Na siońnia nieisnujučaj veb-staroncy jaje kampanii śćviardžałasia: «Z 1800 hoda my pracujem, kab stvarać maleńkija tvory mastactva, jakija vyklikali b emocyi».
«Maryja Adeła» na ŭračystym adkryćci kanceptualnaj kramy Serein, 11 lutaha 2016 hoda
Na spravie ž zvarotny pošuk malunkaŭ pakazvaje, što «maleńkija tvory mastactva», jakija pradajucca ŭ buciku «Maryi Adeły» i niby «stvoranyja ŭ Nieapali», apynulisia kapiejkavymi cacankami, nabytymi ŭ kitajskich aptovych internet-kram.
Lions Club i ŭkaranieńnie ŭ NATA
Mabyć, hałoŭnym dasiahnieńniem «Adeły», jakoje adkryła joj mnohija dźviery, stała atrymańnie pasady sakratara ŭ miascovym adździaleńni dabračynnaj arhanizacyi Lion's Club u 2015 hodzie. Hetaje adździaleńnie, jakoje nasiła nazvu Lions Club Napoli Monte Nuovo , mieła adnu važnuju asablivaść — jano było stvorana aficerami NATA, jakija bazujucca ŭ Nieapali.
Pa ŭspaminach padpałkoŭnika Torstena S., aficera niamieckaha bundeśviera, jaki ŭ 2015 hodzie byŭ skarbnikam Lion's Club, členstva ŭ kłubie skaračałasia i kiraŭnik nieapolskaha Lion's Club rekamiendavaŭ «Maryju Adełu» jak sposab ažyvić aktyŭnaść, aktyvizavaŭšy mižnarodnyja suviazi hramadzian. Jon uzhadvaje, što «Maryja Adeła» vielmi aktyŭna sprabavała ažyvić dziejnaść kłuba, naviedvała ŭsie mierapryjemstvy, a ŭ niejki momant u 2018 hodzie, kali siabroŭstva skaraciłasia i znoŭ źjavilisia pierśpiektyvy zakryćcia kłuba, jana navat padachvociłasia apłacić siabroŭskija ŭnioski kožnaha. Tady padpałkoŭnik nie ŭbačyŭ u hetaj raptoŭnaj ščodraści ničoha padazronaha.
Troje apytanych žurnalistami znajomych «Maryi Adeły», źviazanych z NATA, raspaviali, što jak čalec Lion's Club jana mieła znosiny sa šmatlikimi supracoŭnikami NATA, pasiabravała z šeraham aficeraŭ i časta mieła znosiny ź imi ŭ sacyjalnych sietkach, pryčym niekatoryja z hetych suviaziaŭ nasili vidavočna ramantyčny charaktar.
«Maryja Adeła» mieła pramy asabisty dostup da šmatlikich aficeraŭ NATA i VMS ZŠA ŭ Nieapali, prychodziła dadomu da niekatorych ź ich, naviedvała šmatlikija mierapryjemstvy, arhanizavanyja NATA ci Uzbrojenymi siłami ZŠA, u tym liku štohadovyja bali NATA i Karpusy marskoj piachoty ZŠA. Adzinaje, što pakul niezrazumieła, ci mieła jana kali-niebudź fizičny dostup da bazy NATA.
Evakuacyja i vydumany rak
Paśla publikacyi The Insider i Bellingcat rasśledavańnia ab «Piatrovie» i «Bašyravie» sa zhadvańniem HRUšnaj sieryi pašpartoŭ «Maryja Adeła» u apošni raz prylacieła ŭ Maskvu, ničoha nie paśpieŭšy rastłumačyć svaim jeŭrapiejskim znajomym. Adzinym suvieniram ź jaje minułaha žyćcia, jaki «Maryja Adeła» zachapiła z saboj, była kotka Łuiza, jakuju jaje znajomyja apisali jak «adzinuju stabilnuju reč u jaje žyćci».
Praz dva miesiacy paśla adjezdu jana apublikavała apošni zahadkavy, ale važny post na svajoj staroncy ŭ Facebook. U im jana zhadała, što pakutavała ad raku, i raskazała ab tym, što jaje vałasy znoŭ adraśli «paśla chimijaterapii».
Pakul vydumanaja «Adieła» hinuła ad raku, sapraŭdnaja Volha Kołabava niadrenna asvojvałasia ŭ Maskvie kupiła Audi apošniaj madeli i ŭsialiłasia ŭ atrymanuju ad dziaržavy elitnuju kvateru.
Jaje jeŭrapiejskija siabry dumali, što źnikłaja «Adeła», vierahodna, pamierła. Ale praz krychu bolš za try hady paśla źniknieńnia, 4 śniežnia 2021 hoda, «Maryja Adeła» pakinuła zahadkavaje paviedamleńnie, na hety raz u čacie WhatsApp z Marsel D'Aržy Śmit. U paviedamleńni było:
«Darahaja, darahaja Marsel!
Jość šmat rečaŭ, jakija ja nie mahu (i nikoli nie zmahu) rastłumačyć!
Ale sumuju pa tabie vielmi i vielmi-vielmi…»
Identyfikacyja «Adeły»
«Maryja Adeła» patrapiła ŭ pole zroku rasśledavalnikaŭ u kancy 2021 hoda, kali jany vyjavili, što ŭładalnikam pašparta HRUšnaj sieryi źjaŭlajecca čałaviek ź imiem, jakoha niama ni ŭ adnoj rasijskaj bazie. Jany vyjavili, što joj było vydadziena jak minimum try pašparty — adzin unutrany i dva zamiežnych — z dyjapazonaŭ, jakimi karystalisia mnohija inšyja viadomyja aficery HRU.
Pošuk realnaj asoby «Adeły» akazaŭsia niaprostaj zadačaj. Zvarotny pošuk pa tvary ŭ bazie pašpartnych dadzienych Rasii daŭ sotni mahčymych supadzieńniaŭ ź nizkim padabienstvam, jakija my analizavali adno za inšym. Paraŭnańnie dvuch roznaŭzrostavych fatahrafij «Adeły» z krynic u sacyjalnych sietkach sa starym fota pašparta hramadzianki Rasii pa imi Volha Kołabava 1982 hoda naradžeńnia ŭ instrumiencie Microsoft Azur dało mienš za 35%. Adnak z-za taho, što fota ŭ pašpartnym fajle Kołabavaj vielmi staroje, nizki pracent moh być prosta z-za roźnicy va ŭzroście.
U astatnim ža bijahrafii Kołabavaj i «Adeły» dobra stykavalisia. Pa-pieršaje, Volha Kołabava nie pakinuła nijakaha ličbavaha śleda ŭ Maskvie da 2018 hoda. Zatoje ślady jaje prysutnaści časta vyjaŭlajucca paśla listapada 2018 hoda — jakraz prykładna ŭ toj čas, kali «Adeła» pavinna była viarnucca ŭ Maskvu.
U listapadzie 2018 hoda Volha Kołabava nabyła svoj pieršy aŭtamabil u Rasii, novuju Audi 3 2018 hoda vypusku — «Adeła» taksama addavała pieravahu Audi.
U svaim akaŭncie ŭ «Adnakłaśnikach» Kołabava prasoŭvaje pravajenny kantent z hrupy «Siabry Pucina» i padpisanaja na vietkliniku ŭ Maskvie, jakaja lečyć u tym liku i katoŭ.
Vykarystoŭvajučy staryja rehijanalnyja bazy dadzienych, žurnalisty ŭ kančatkovym vyniku zmahli adsačyć apošniuju ličbavuju prysutnaść Volhi ŭ Rasii da 2005 hoda, kali va ŭzroście 23 hadoŭ jana zarehistravała kampaniju, jakaja handluje ałkaholem u Krasnadarskim krai ŭ Rasii. Vyjaviŭšy jaje tahačasnuju adrasnuju rehistracyju, jany zmahli adšukać jaje baćku. Sudziačy pa ŭsim, Volha Kołabava była patomnaj hrušnicaj.
Vyrašalnym paćvierdžańniem taho, što «Adeła» i Volha Kołabava — adzin čałaviek, stała atrymanaja fatahrafija Volhi Kołabavaj ź jaje pravoŭ kiroŭcy, zroblenaja ŭ 2021 hodzie. Supastaŭleńnie hetych fota ŭžo dało pierakanaŭčaje supadzieńnie.
Ciapier čytajuć
Babaryka raskazaŭ, čamu pierad vybarami nie šukaŭ padtrymki ŭ Rasii. I jak jaho chacieli zvolnić ź Biełhazprambanka za łozunh «Žyvie Biełaruś!»31
Babaryka raskazaŭ, čamu pierad vybarami nie šukaŭ padtrymki ŭ Rasii. I jak jaho chacieli zvolnić ź Biełhazprambanka za łozunh «Žyvie Biełaruś!»
Maksim Znak pra pres-kanfierencyju va Ukrainie: My damovilisia nie ŭzdymać najbolš balučyja temy — katavańniaŭ, sankcyj, vajny. Moža, musili my pa-inšamu zrabić1010
Kamientary
Kazałoś by—iesť vozmožnosť jezdiť,v otličije ot sovka,radovaťsia žiźni,stať časťju čiełoviečieskoho Mira:no nie niet—viezdie lezut so svojej «zahadočnoj russkoj dušoj». Ot słova Zahadiť..