Raźvivać internet buduć Vakulčyk, Zajcaŭ, Kulašoŭ...

U radu pa raźvićci infarmacyjnaha hramadstva pry prezidencie Biełarusi ŭvajšło 20 čałaviek. Adzinym pradstaŭnikom pryvatnaha biznesu abrany Andrej Narejka, kiraŭnik asacyjacyi «Bielinfakam».

Skład rady i farmat jaje pracy zaćvierdžanyja ŭ pałažeńni, prykładanym da ŭkaza prezidenta № 515 «Ab niekatorych pytańniach raźvićcia infarmacyjnaha hramadstva ŭ Respublicy Biełaruś». Ukaz byŭ padpisany prezidentam 8 listapada, paviedamlaje IT.TUT.BY.

U adsutnaść prezidenta (staršynia rady) daradčym orhanam buduć kiravać namieśnik premjera Anatol Kalinin (namieśnik staršyni rady) i/abo pamočnik prezidenta Viktar Łukašenka (namieśnik staršyni rady). Sakratarom rady pryznačany Usievaład Jančeŭski — pamočnik prezidenta, načalnik hałoŭnaha ideałahičnaha ŭpraŭleńnia administracyi prezidenta.

Akramia ich u radu ŭvajšli Siarhiej Abłamiejka (rektar BDU), Valeryj Vakulčyk (staršynia śledčaha kamiteta), Ihar Vojtaŭ (staršynia DKNT), Viktar Huminski (namieśnik staršyni PP NS), Siarhiej Huruloŭ (staršynia dziaržaŭnaha VPK), Vadzim Zajcaŭ (staršynia KDB), Anatol Kulašoŭ (ministr unutranych spravaŭ), Mikałaj Ładućka (staršynia Minharvykankama), Siarhiej Maskievič (ministr adukacyi), Andrej Narejka (kiraŭnik asacyjacyi «Bielinfakam»), Mikałaj Pancialej (ministr suviazi i infarmatyzacyi), Aleh Pralaskoŭski (ministr infarmacyi), Anatol Rusiecki (kiraŭnik prezidyuma NAN RB), Uładzimir Siańko (namieśnik staršyni praŭleńnia Nacbanka), Valeryj Capkała (dyrektar administracyi PVT) i Siarhiej Špiehun (načalnik AAC).

Siarod kiraŭnikoŭ dziaržaŭnych strukturaŭ i orhanaŭ adzinym pradstaŭnikom pryvatnaha biznesu abrany staršynia praŭleńnia Asacyjacyi «Bielinfakam», kandydat fizika-matematyčnych navuk Andrej Narejka. Jamu 47 hadoŭ, jon pracavaŭ deputatam druhoha sklikańnia Pałaty pradstaŭnikoŭ Nacyjanalnaha Schodu Biełarusi, ciapier taksama kiruje TAA «Prafiesijnyja radyjosistemy».

Rada budzie źbiracca nie radziej čym raz na paŭhoda, kab «vyznačać mety i zadačy dziaržaŭnaj infarmacyjnaj palityki, mietadaŭ i sposabaŭ jaje realizacyi». Akramia taho, rada zojmiecca kaardynacyjaj dziejnaści dziaržaŭnych orhanaŭ i inšych dziaržaŭnych strukturaŭ u halinie raźvićcia infarmacyjnaha hramadstva ŭ Biełarusi. Jašče adna zadača rady — kaardynavać pracu i raźvićcio dziaržaŭnaj sistemy akazańnia elektronnych pasłuh. Čalcy rady buduć abmiarkoŭvać miery pa ŭmacavańni infarmacyjnaj biaśpieki, intehracyi dziaržaŭnych infarmacyjnych sistem, miery dziaržpadtrymki pa raźvićci infarmacyjnaha hramadstva ŭ krainie i, jak vynik, farmulavać kankretnyja prapanovy pa palapšeńni situacyi.

Pry radzie budzie funkcyjanavać pastajannaja rabočaja hrupa pad kiraŭnictvam sakratara rady — jana zojmiecca padrychtoŭkaj prapanovaŭ i płanaŭ pracy kožnaha z pasiedžańniaŭ rady.

Ź infarmacyjnaha i arhanizacyjna-techničnaha boku dziejnaść rady i jaho pastajannaj rabočaj hrupy zabiaśpiečać administracyja i kiraŭnictva spravami prezidenta Biełarusi.

Nahadajem, paśla ŭtvareńnia rady častka ekśpiertaŭ vykazała mierkavańnie, što novaja struktura praciahnie abmiažoŭvać svabodu ŭ internecie.

• 0
• 0
• 0
• 0
• 0
• 0
• 0
• 0