Były futbalist «Mančester Junajted» Eryk Kantana źbirajecca vyłučyć svaju kandydaturu na vybarach prezidenta Francyi, jakija projduć viasnoj hetaha hoda,piša Liberation.
Ciapier jon zaniaty zboram podpisaŭ nie mienš za 500 čałaviek, jakija zajmajuć vybarnyja pasady na roznych uzroŭniach ułady — takija patrabavańni francuzskaha zakanadaŭstva. Kantana ŭžo nakiravaŭ listy meram sotniaŭ haradoŭ, u jakich prosić ich pra padtrymku.
«Naša kraina staić pierad ciažkim vybaram, ad jakoha zaležyć jaje budučynia», — piša futbalist.
Kantana pavinien sabrać nieabchodnuju kolkaść podpisaŭ da kanca lutaha. Pieršy tur vybaraŭ prezidenta Francyi adbudziecca ŭ kancy krasavika, druhi, kali spatrebicca, — u pačatku traŭnia. Ciapierašni kiraŭnik dziaržavy Nikala Sarkazi, pavodle sacyjałahičnych apytańniaŭ, straciŭ padtrymku mnohich vybarščykaŭ, jakija hałasavali za jaho piać hadoŭ tamu.
Ličycca, što asnoŭnym supiernikam Sarkazi na vybarach prezidenta budzie kandydat ad sacyjalistaŭ Fransua Ałand.
Kamientary