Historyja7979

Łatuška zrobić Biełaruś iznoŭ krainaj zamkaŭ?

Urad pryniaŭ prahramu «Zamki Biełarusi» koštam $15,5 miljona.

Upieršyniu takaja prahrama zaćvierdžanaja na dziaržaŭnym uzroŭni. «Zamki Biełarusi» raspracavała Ministerstva kultury.

Kaliści ŭ Biełarusi było bolš za sto zamkaŭ.
Na žal, zachavanyja abarončyja zbudavańni možna pieraličyć pa palcach. Što nie zrujnavali vojny, dabivaŭ čas i narodnaja haspadarka.

U śpis prahramy płanavali ŭklučyć 16 abjektaŭ. Ale ŭ vyniku ŭvajšło 38 — uličyli prośby abłasnoha dy rajonnaha čynavienstva.

Na adnaŭleńnie zamkaŭ płanujuć vydatkavać kala 131 miljarda rubloŭ ciaham 2012—2018.

«Zamki» — jak «Dažynki»

Prahrama praduhledžvaje adnaŭleńnie takich lehiendarnych zbudavańniaŭ, jak Stary zamak u Hrodnie (na jaho vydatkoŭvajecca 37 młrd 200 młn rubloŭ), zamki ŭ Lidzie i Lubčy, Sapiehaŭski pałac u Ružanach.

Hrodna zajmaje druhoje miesca paśla Minska pa abjomie ŭkładańniaŭ. Najmienšy kavałak biudžetu (1,5 młn rubloŭ) pryznačany Słucku — na dobraŭparadkavańnie terytoryi haradzišča ICH—CHIII st. Pryčym vydzialać srodki płanujuć u 2017—18 hadach. Budziem spa­dziavacca, inflacyja ich nie zžare až nastolki, kab nie chapiła zapłacić čałavieku, jaki abkosić haradzišča.

Voźmucca i za prylehłyja da zamkaŭ terytoryi. U Miry adnoviać rehularny italjanski park.
Praŭda, źviestak pra jaho vyhlad nie zachavałasia. A zaadno restaŭrujuć staŭ, dambu, aharodžu i navat miemaryjał na miescy źniščeńnia mirnych žycharoŭ niamieckimi fašystami.

U Kamianieckaj viežy płanujecca zamianić dach — na heta ź miascovaha biudžetu vydatkavana 51,8 młn.
Ramantavany šmatkroć pomnik užo vyklikaje kpiny turystaŭ škłopakietami ŭ bajnicach. Zatoje ŭ Kreŭskim zamku płanujuć adnavić paŭnočnuju, kniaskuju viežu, u jakoj padpisvałasia Unija. Na Kreva vydatkujuć 2 młrd 500 młn ciaham 2012—15 hadoŭ.

Zamki ŭ Navahrudku, Krevie, Halšanach, Bychavie, Hieranionach, Smalanach i Telmanie čakaje kansiervacyja z «častkovaj restaŭracyjaj».
Samyja cełyja ich frahmienty prystasujuć pad muziejnyja ekspazicyi. Jak, naprykład, častku zamka Sapiehaŭ u Bychavie, dzie była meblevaja fabryka i vajskovaja čaść.

Biudžetnyja srodki abu­dziać adviečny kanflikt miž restaŭratarami, hatovymi biaskonca ŭdaskanalvać prajekty, i miascovaj uładaj, jakaja płanuje vykarystać hrošy na naviadzieńnie paradku.
Tak, prajektnaja hrupa Biełaruskaha kamiteta ICOMOS na čale ź Iharam Rachanskim nastojvaje na navukovych daśledavańniach u Halšanskim zamku. Čynavienstva ž płanuje abmiežavacca ramontam.

Park Višniavieckich fundujuć francuzy

Park z reštkami ściany zamka Višniavieckich u vioscy Telman pad Brahinam źbirajucca paradkavać za francuzskija hrošy:
25 młn rubloŭ vydatkoŭvaje hramadskaja arhanizacyja «Spadčyna bieź miežaŭ» i asacyjacyja «Val de Łuar». Ciapierašni paleski ahraharadok imia niamieckaha kamunista — heta kolišniaja vioska Dvor­-Haradzišča.
Tam stajaŭ Brahinski zamak, centr vializarnych łatyfundyjaŭ Višniavieckich.

Niekali Adam Višniaviecki, rupliviec pravasłaŭja ŭ Rečy Paspalitaj, prytuliŭ tut Łžedźmitryja I, jaki ŭpieršyniu pryznaŭsia mienavita jamu, niby jon — syn Ivana Hroznaha. U 1648 hodzie žychary Brahina adčynili bramu ardzie Chmialnickaha i za zdradu zamak ź miastečkam byŭ razburany. Na jahonym miescy ŭźnik pałac z falvarkam, jakim vałodaŭ i Michał Višniaviecki — karol polski i vialiki kniaź litoŭski.

Budzie što raskazać turystam, kali, kaniečnie, znojducca śmiełyja. Brahinski rajon — samy zabrudžany ŭ Čarnobylskaj zonie.
Radyjacyja tut siahaje 20—30 Kiury/km.

Haradziščy dla piknikoŭ

Dzieviatnaccać zamčyščaŭ, u tym liku ŭ vioscy Žabier Drahičynskaha rajona, Kryŭlanach Žabinkaŭskaha rajona, u Zasłaŭi i Brasłavie, zapłanavana dobraŭparadkavać.
Kali čuješ słova «dobraŭparadkavańnie», mižvoli pryhadvajecca zamčyšča ŭ Mazyry, na jakim pradpryjemstva «Mazyrdreŭ» zbudavała pachabny rekłamny cieramok. Ci zamčyšča ŭ Brasłavie, dzie panastaŭlali altanak dla amataraŭ vypić-zakusić...

Na dobraŭparadkavańnie haradzišča ŭ kurortnym Brasłavie, darečy, vydatkoŭvajuć 2 młrd 500 młn — utraja bolej, čym na połacki Vierchni zamak.

Fartecyja la doma Haliny Radzivonaŭny

Na piaci haradziščach (u Turavie, Miłahradzie, Hłusku, Ryžkavičach i Minsku) zapłanavanyja raboty pa muziejefikacyi.
Uražvaje, što ŭ adnym šerahu ź Minskim staić zamčyšča ŭ Ryžkavičach. Tak, heta reštki siaredniaviečnaha Škłova XVI—XVIII ct., dzie byŭ koliś zamak Chadkievičaŭ, klaštar z kaściołam daminikancaŭ, muravanaja ŭnijackaja Pietrapaŭłaŭskaja carkva... Ale Ryžkavičy pakul nie ŭniesienyja ŭ nivodny daviednik.
Na muziejefikacyju archieałahičnaha kompleksu ŭ vioscy Ryžkavičy Škłoŭskaha rajona, u jakoj žyvie Halina Radzivonaŭna Łukašenka, zapłanavana vydatkavać 40 młn ź biudžetu rajona i vobłaści.

Minsk atrymaje najbolšuju častku srodkaŭ — 62 młrd 573 młn rubloŭ.
Płan adnaŭleńnia Minskaha zamčyšča, raspracavany «Minskprajektam», praduhledžvaje pabudovu novaj pravasłaŭnaj carkvy na padmurkach chrama XII st. Toj chram — adna z najvialikšych tajamnicaŭ staražytnaha Mienska: jon tak i nie byŭ dabudavany, a paśla, śviedčać archieołahi, pieratvaryŭsia ŭ pahanski niekropal. Nijakich źviestak pra toje, jak moh vyhladać chram, niama. Kali pastaviać falsifikat na aŭtentyčnych padmurkach, čamu b nie panabudoŭvać novych zamkaŭ i na ŭsich pustych haradziščach?

Minskaje zamčyšča — serca ŭsioj Biełarusi, pačatak pačatkaŭ.
Dyskusii vakoł prajekta adnaŭleńnia Nižniaha zamka ŭ Vilni raściahnulisia na 100 hadoŭ. U Biełarusi dyskusijaŭ nie było.

Niemahčyma biez nas

Ja b vielmi chacieŭ, kab zamak u Krevie, dzie koliś vyrašaŭsia los krajoŭ ad Bałtyki da Čarnamorja, uźniaŭ svaje śpičastyja mury,
kab i pad Brahinam, u vioscy ź viernutym spradviečnym imiem Dvor-­Haradzišča, paŭstaŭ cikavy aśvietny asiarodak, kab tłumy turystaŭ zachaplalisia Škłoŭščynaj i kab staražytny Minsk urešcie zažyŭ ułasnym pavažnym ludskim žyćciom...
Ale heta niemahčyma biez udziełu nas usich, kamu heta nieabyjakava.

Kamientary79

Ciapier čytajuć

Izrail nanios udary pa Iranie. Zahinuŭ kiraŭnik Korpusa vartavych isłamskaj revalucyi2

Izrail nanios udary pa Iranie. Zahinuŭ kiraŭnik Korpusa vartavych isłamskaj revalucyi

Usie naviny →
Usie naviny

«Heta viaršynia». Łukašenka zapatrabavaŭ ad čynoŭnikaŭ vypracavać nacyjanalnuju ideju63

U Indyi raźbiŭsia pasažyrski samalot. Na borcie byli 242 čałavieki

Zoaabaroncy napisali zajavu na haspadara doma, na kanapie jakoha pamior łoś17

«Kožny raz dakazvaju, što ja čałaviek». Siamja biełarusaŭ z polskimi karaniami čatyry hady sprabuje atrymać DNŽ u Polščy13

Jak być maładym baćkam u 66 hadoŭ, pra maru i pra novy albom — u hutarcy ź lehiendaju fołku Ivanam Kirčukom7

Dziaŭčyna z-pad Maładziečna niekalki miesiacaŭ žyła ŭ Hdańsku na vulicy. Jana raskazała pra svajo niaprostaje žyćcio26

Nazvany top-25 kampanij ź biełaruskim kapitałam na Padlaššy

Hienštab Ukrainy paviedamiŭ, što straty Rasii pieravysili 1 miljon čałaviek8

Prezident Sierbii pachvaliŭsia, što nie padpisaŭ dekłaracyju samitu ŭ Adesie i «nie zdradziŭ» Rasii7

bolš čytanych navin
bolš łajkanych navin

Izrail nanios udary pa Iranie. Zahinuŭ kiraŭnik Korpusa vartavych isłamskaj revalucyi2

Izrail nanios udary pa Iranie. Zahinuŭ kiraŭnik Korpusa vartavych isłamskaj revalucyi

Hałoŭnaje
Usie naviny →

Zaŭvaha:

 

 

 

 

Zakryć Paviedamić