Haaretz: Izrailu varta pryznać isnavańnie Sańnikava

U viadučaj izrailskaj hazecie Haaretz źjaviŭsia artykuł z krytykaj zamiežnaj palityki Izrailu. Infarmacyjnaj padstavaj dla artykułu stałasia niadaŭniaja presavaja kanferencyi novaha ambasadara Izrailu ŭ Biełarusi, Josefa Šahała.

Artykuł napisaŭ Džejms Kirčyk. Prapanujem vam pierakład frahmentu hetaha tekstu:

«Andrej Sańnikaŭ źjaŭlajecca palityčnym viaźniem. Heta, mahčyma, pryviadzie ŭ šok šmat kaho, chto ličyć, što isnavańnie palityčnych viaźniaŭ na eŭrapiejskim kantynencie skončyłasia z kracham kamunizmu ŭ 1989 hodzie. Heta biezumoŭna pryviało ŭ šok Josefa Šahała, byłoha deputata Knesetu, jaki ŭ minułym miesiacy ŭručyŭ Łukašenku davierčyja hramaty ambasadara Izrailu ŭ Biełarusi.

Na presavaj kanferencyi ŭ Miensku za niekalki dzion da cyrymonii biełaruski žurnalist spytaŭ Šahała ab pazycyi Izrailu nakont palitviaźniaŭ u Biełarusi. «Ja nia viedaju. Mnie treba pačytać hazety, i praz paŭhoda ja adkažu na vaša pytańnie», — adkazaŭ jon z sarkazmam. Potym dadaŭ, z vyklikam dla žurnalistaŭ: «Ja sam žurnalist i viedaju, jak pišucca artykuły. Vy kali-niebudź byli ŭ lahierach dla palityčnych źniavolenych?» Padčas cyrymonii, na jakoj Łukašenka vitaŭ Šahała ŭ jakaści ambasadara Izrailu, dyktatar skazaŭ jamu: «Ja hatovy padtrymać praktyčna ŭsio, što vy skazali».

Łukašenka i Šahał majuć racyju prynamsi ŭ adnym: izrailcianin u Miensku sapraŭdy pavinien «čytać hazety». Źjedlivaja prapanova Šahała žurnalistam, kab jany naviedali turmy, u jakich nibyta trymajuć palityčnych viaźniaŭ — z namiokam, što jany navat nie isnujuć — było sustreta emacyjnym adkazam Iryny Chalip, jakaja spytała, jakaja była b reakcyja na padobnuju zajavu dla prykładu ambasadara Niamieččyny ŭ Izraili, kali b jon pastaviŭ pad sumnieŭ Hałakost. Kali prypluščyć vočy na paraŭnańnie ź hitleryzmam, hnieŭ Chalip tut apraŭdany i zrazumieły.

Dla svajho padchalimstva Šahał nia moh vybrać horšaha času. Tolki na minułym tydni 27 krainaŭ-siabraŭ Eŭraźviazu adklikali svaich ambasadaraŭ ź Miensku na znak salidarnaści z Polščaj, čyj ambasadar byŭ vysłany ź Biełarusi ŭ adkaz na padtrymku jaho krainaj demakratyčnych siłaŭ (vyhnańnie zachodnich ambasadaraŭ źjaŭlajecca šmathadovaj taktykaj Łukašenki: ambasadara ZŠA ŭ Miensku niama z 2008 hodu). Ci Izrail, jaki šukaje padtrymki ŭ Eŭropie dla ŭzmacnieńnia žorstkaści sankcyj suprać Iranu, nie pavinien uzamien padtrymlivać eŭrapiejskich sajuźnikaŭ?

Na žal, zaŭvaha Šahała — nia prosta durnavataje vykazvańnie adnaho z dyplamataŭ, jano supadaje z palitykaj jaho šefa, ministra zamiežnych spravaŭ Avihdora Libermana. Eks-vykidała načnoha klubu ŭ Małdovie znajšoŭ supolnuju movu z aŭtarytarnymi liderami na terytoryi byłoha Savieckaha Sajuzu. U śniežni letaś padčas vizytu ŭ Maskvu, adrazu paśla niesumlennych parlamenckich vybaraŭ, Liberman pachvaliŭ ich, nazvaŭšy vybary svabodnymi i spraviadlivymi.

Zrazumieła, što Izrail — maleńkaja kraina, jakaja znachodzicca ŭ składanym rehijonie. Było b nierazumna čakać, što jaje zamiežnaja palityka zaŭsiody budzie čystaj i maralnaj, jak u Švecyi abo Narvehii, jakija zaŭsiody (prynamsi ŭ svaim adčuvańni) abaraniajuć pravy čałavieka, navat kali heta supiarečyć ich ekanamičnym abo stratehičnym intaresam. Ale Šahał moh by adkazać na pytańnie, skažam, bolš dyplamatyčna, takim čynam, kab nie paŭtarać prapahandy biełaruskaha režymu. (...)

Izrailcianie časta skardziacca, i słušna, što śviet nie spačuvaje im i nie padtrymlivaje ich u patrebie. Ale, mahčyma, pierš čym čarhovy raz asudzić štoraz bolšuju izalacyju svajoj krainy, Ministerstvu zamiežnych spravaŭ Izrailu varta było b pierahledzieć svaju aficyjnuju pazycyju, jakaja zaklučajecca ŭ tym, što Andreja Sańnikava nie isnuje».

• 0
• 0
• 0
• 0
• 0
• 0
• 0
• 0