Myta na naftu vyraście na 12%
Biełaruś 1 krasavika pavyšaje ekspartnyja pošliny na naftu i naftapradukty. Heta praduhledžana pastanovaj Savieta ministraŭ № 273 ad 27 sakavika, paviedamiła pres-słužba ŭrada.
Ekspartnaja pošlina na naftu 1 krasavika zhodna z dakumientam uzraście z $411,2 da $460,7 za tonu.
Adzinaja staŭka ekspartnaj pošliny na śvietłyja i ciomnyja naftapradukty (aprača bienzinu), jakaja 1 kastryčnika 2011 hoda ŭnifikavana na ŭzroŭni 66% ad pošliny na naftu, z 1 krasavika składzie $304 za tonu suprać $271,4 ŭ sakaviku.Takaja ž pošlina ŭstanoŭlena na bienzoł, tałuoł, ksiłoły.
Na tavarnyja bienziny i pramahonny bienzin staŭka vyvaznych mytnych pošlin, zychodziačy z kaeficyjentu 0,9, składzie $414,6 za tonu zamiest $370,1 ŭ sakaviku. Pošlina na prapan, butany, etylen, prapilen, butylen i butadyjen, inšyja zvadkavanyja hazy ŭstanoŭlena na ŭzroŭni $158,6 zamiest $157,3 za tonu.
Pastanovaj uniesieny źmianieńni ŭ pastanovu Savieta ministraŭ № 1932 ad 31 śniežnia 2010 hoda "Ab ustanaŭleńni stavak vyvaznych mytnych pošlin u dačynieńni da nafty syroj i asobnych katehoryj tavaraŭ, vypracavanych z nafty, i pryznańni straciŭšymi siłu niekatorych pastanoŭ Savieta ministraŭ Respubliki Biełaruś". Dakumient pryniaty ŭ adpaviednaści z ukazam № 716 ad 31 śniežnia 2010 hoda "Ab staŭkach vyvaznych mytnych pošlin".
Nahadajem, što z 1 kastryčnika 2011 hoda Biełaruś śledam za Rasijaj ažyćciaŭlaje raźlik ekspartnych pošlin na naftu i naftapradukty pa formule "60/66". Razmova idzie ab pradukcyi, što vyvozicca z terytoryi respubliki za miežy mytnaj terytoryi Mytnaha sajuza. Formuła raźliku padrazumiavaje, što
staŭka ekspartnych pošlin na śvietłyja i ciomnyja naftapradukty ŭnifikujecca i raźličvajecca z kaeficyjentam 0,66 (66%) ad staŭki pošliny na naftu.Adnačasova 1 kastryčnika ekspartnaja pošlina na naftu była źnižana šlacham skaračeńnia pracenta ad roźnicy pamiž canoj manitorynhu nafty i canoj adsiačeńnia z 65% da 60%. Pry hetym kaeficyjent raźliku staŭki pošliny na bienziny składaje 0,90 (90%).
Kamientary