Chakiej u Biełarusi nie adbiaruć

Niekalki hadzinami raniej staršynia Mižnarodnaj fiederacyi chakieja Renie Fazel zajaviŭ:

«Sport nie moža i nie pavinien vykarystoŭvacca ŭ jakaści palityčnaha instrumientu, — skazaŭ Faziel, adkryvajučy 18 maja pasiadžeńnie kanhresa. — Nie dumaju, što chtości z prysutnych tut prychilnik parušeńnia demakratyi i pravoŭ čałavieka. Naša arhanizacyja taksama prytrymlivajecca pryncypaŭ demakratyi: kožny maje prava ŭstać i skazać, što jon dumaje pa tym ci inšym pytańni. I tak budzie zaŭsiody. Ale ja ŭpeŭnieny, što spartyŭnyja arhanizacyi i sami spartsmieny nie pavinny pavodzić siabie jak palityki i zajmacca palityčnymi spravami. My nie pavinny być lalkami ŭ rukach palitykaŭ abo aktyvistaŭ.

Sport nie moža i nie pavinien vykarystoŭvacca ŭ jakaści palityčnaha instrumientu».

Na dumku kiraŭnika IIHF, sport, u adroźnieńnie ad palityki, pavinien dapamahać zhładžvać peŭnyja vuhły i kanflikty. U jakaści prykładu Faziel pryvioŭ niekatoryja padziei 70-ch hadoŭ XX stahodździa: matčy pa nastolnym tenisie pamiž ZŠA i Kitajem, a taksama słavutuju chakiejnuju supiersieryju pamiž Savieckim Sajuzam i Kanadaj, jakija, pavodle słoŭ Faziela, dapamahli «rastapić lod» u adnosinach pamiž hetymi krainami.

«Ja ŭpeŭnieny, što kali my praviadziem čempijanat śvietu ŭ Biełarusi, to, jak i ŭ zhadanych mnoj vypadkach, heta dapamoža palepšyć situacyju.

***

Jak raniej paviedamlałasia, 18 maja na kanhresie IIHF biełaruskaja delehacyja pavinna vystupić z dakładam ab padrychtoŭcy da čempijanatu śvietu 2014 hoda ŭ Minsku.

Pavodle słoŭ staršyni Biełaruskaj fiederacyi chakieja Jaŭhiena Vorsina, pytańnia ab pieranosie ČS-2014 ź Biełarusi ŭ inšuju krainu na paradku dnia kanhresa niama. «Usio cicha, spakojna. Paradak dnia zaćvierdžany. Pytańnia ab admienie čempijanatu śvietu ŭ Minsku ŭ im niama. Siońnia ŭ jaho taksama nie było ŭniesiena nijakich dadatkovych pytańniaŭ, jakija tyčylisia b našaj krainy. Viadoma, ja nie mahu harantavać, što zaŭtra na kanhresie jaki-niebudź dzivak ź miesca čahości nie skaža na hetu temu, ale ničoha abmiarkoŭvacca nie budzie: hetaha čałavieka, kali takoje adbudziecca, prosta pasadziać na miesca», — skazaŭ Vorsin u kamientaryi BiełaPAN 17 maja.

Zakliki ab nieabchodnaści pazbavić Biełaruś prava na praviadzieńnie ČS-2014 pačali źjaŭlacca nieŭzabavie paśla padziej 19 śniežnia 2010 hoda,

U lutym hetaha hoda šviedskija ŚMI paviedamili, što na majskim pasiadžeńni kanhresa miesca praviadzieńnia ČS-2014 moža być pierahledžana.

Z zaklikam pieranieści miesca praviadzieńnia spabornictvaŭ vystupiŭ Jeŭraparłamient, a jeŭradeputaty Marek Mihilski (Polšča) i słavuty ŭ minułym słavacki chakieist, člen Zały chakiejnaj słavy Pieter Šciasny arhanizavali internet-akcyi pa zbory podpisaŭ za admienu čempijanatu ŭ Biełarusi.

Ab nieabchodnaści pazbavić Biełaruś čempijanatu śvietu nieadnarazova zajaŭlaŭ i ministr sportu Finlandyi Paava Archinmiaki.

U pačatku hetaha tydnia 28 amierykanskich kanhresmienaŭ zaklikali prezidenta IIHF Renie Faziela nie pravodzić ČS-2014 u Minsku. U ich liście zaznačajecca: chacia palitźniavolenyja Andrej Sańnikaŭ i Dźmitryj Bandarenka vyzvaleny, mnohija inšyja apazicyjaniery praciahvajuć zastavacca ŭ turmach, a aktyvisty hramadzianskaj supolnaści pa-raniejšamu źviedvajuć aryšty i zapałochvańni.

«Represiŭny klimat u Biełarusi vymušaje ŭsumnicca ŭ dabrabycie, biaśpiecy i svabodzie pieramiaščeńnia dla hulcoŭ, aficyjnych asob, hledačoŭ i srodkaŭ masavaj infarmacyi i źjaŭlajecca surjoznaj pryčynaj dla sumnieńniaŭ u tym, što čempijanat moža pravodzicca ŭ Minsku ŭ 2014 hodzie», — skazana ŭ liście.

Amierykanskija kanhresmieny zaklikali kožnaha člena IIHF zapatrabavać ad uładaŭ Biełarusi vyzvaleńnia palitźniavolenych, kab nie pazbavicca prava prymać u siabie čempijanat.

U adkaz na takija zakliki prezident IIHF nieadnarazova zajaŭlaŭ, što pieršynstvo projdzie ŭ Minsku. «My znachodzimsia ŭ baku ad palityčnych dyskusij», — padkreślivaŭ Renie Faziel.

Miesca praviadzieńnia čempijanatu śvietu pa chakiei mianiałasia tolki adnojčy: paśla taho jak u 1968 hodzie Saviecki Sajuz akupiravaŭ Čechasłavakiju, viasnovy čempijanat śvietu 1969 hoda, jaki płanavaŭsia ŭ Prazie, byŭ pieraniesieny ŭ Stakholm.

• 0
• 0
• 0
• 0
• 0
• 0
• 0
• 0