Łukašenka pryznaŭ fakt palotu šviedaŭ. «Vinavatyja paniasuć adkaznaść»
«Maksimum u paniadziełak mnoju rašeńnie budzie pryniata, u tym liku i kadravyja rašeńni».
Alaksandr Łukašenka paćvierdziŭ fakt niezakonnaha ŭvarvańnia 4 lipienia ŭ pavietranuju prastoru krainy zamiežnaha lohkamatornaha samalota. Jon zajaviŭ, što słužbovyja asoby, jakija nie spynili hetu akcyju, pavinny panieści pakarańnie.
«Jak rastłumačyć pravakacyju ź lohkamatornym samalotam, jaki nie tolki pierasiok miažu, ale i biespakarana uvarvaŭsia na terytoryju Respubliki Biełaruś?»— pytaŭsia Łukašenka ŭ čaćvier na naradzie «pa pryviadzieńni Uzbrojenych sił i Dziaržpahrankamiteta ŭ adpaviednaść z sučasnymi patrabavańniami».
Łukašenka śćviardžaje, «hety samalot byŭ svoječasova vyjaŭleny, ale čamu načalniki nie spynili hety palot?». «Kaho škadavali?Heta hałavaciapstva kankretnych vykanaŭcaŭ ci pamyłka ŭ sistemie achovy dziaržaŭnaj miažy ŭ pavietranaj prastory?», — pytaŭsia Łukašenka.
Ekśpierty, adnak, nie vierać, što SPA Biełarusi bačyli samalot i nijak nie zreahavali. Stracili takuju mahčymaść adznačycca!
«Pry hetym ja chacieŭ by ščyra i adkryta skazać, chto cikavicca hetym pytańniem i prysutnym tut: mužyki, my ŭsie ludzi darosłyja, vinavatyja za heta pavinny adkazvać», — zajaviŭ jon.
«Z pryniaćciem rašeńniaŭ ja nie śpiašaŭsia pa vašaj prośbie. Vy chacieli hety vypadak rasśledavać daskanała. Na siońnia, jak ja baču, jon rasśledavany daskanała, i vinavatyja za heta pavinny panieści adkaznaść», — padkreśliŭ Łukašenka.
U hetaj suviazi, zajaviŭ Łukašenka, «maksimum u paniadziełak mnoju rašeńnie budzie pryniata, u tym liku i kadravyja rašeńni».
Lohki samalot marki Jodel ranicaj 4 lipienia pieralacieŭ
Aficyjny Minsk dahetul abviarhaŭ fakt parušeńnia miažy, adnak KDB 13 lipienia zaklučyŭ pad vartu fatohrafa Antona Surapina, jaki pieršym raźmiaściŭ u siabie fatazdymki miadźviedzikaŭ, i 6 lipienia — ryełtara Siarhieja Bašarymava, jaki zdavaŭ kvateru šviedam.Abodva prachodziać pa spravie ab parušeńni dziaržaŭnaj miažy hrupaj asobaŭ. KDB chod rasśledavańnia nijak da hetaha nie kamientavaŭ. Łukašenkaŭskija ideołahi, naprykład, hałoŭred «Biełaruskaj dumki» Vadzim Hihin, fakt palotu abo kateharyčna admaŭlali, abo nazyvali małaznačnym.
Minabarony Biełarusi doŭhi čas śćviardžała, što videa palotu šviedskich piłotaŭ nad Biełaruśsiu źjaŭlajecca mantažom i «hruba sfabrykavanaj pravakacyjaj».«Daśledujučy pradastaŭlenyja fota i videamateryjały, ekśpierty vyjavili hrubuju pracu z užyvańniem technałohij fotašopu i videamantažu, što śviedčyć ab vidavočna pravakacyjnym charaktary padadzienaj infarmacyi», — padkreślivali ŭ abaronnym viedamstvie.
Heta najbolšy skandał u SPA ad časoŭ palotu niemca Matyjasa Rusta.Jon pryziamliŭsia na Krasnaj płoščy ŭ Maskvie, što vyklikała čaradu adstavak u savieckim vajskovym viedamstvie. Biełaruskija ŭłady nie raz zajaŭlali, što nadziejna zakryvajuć pavietranuju prastoru na zachodnich rubiažach Rasii.
U dziejańniach hrupy šviedaŭ, skiravanych na padtrymku biełaruskaha ruchu za hramadzianskija pravy, była niemałaja ryzyka.Jašče pamiatnaja historyja, jak biełaruskaja SPA źbiła pavietrany šar, što vypadkova zalacieŭ na biełaruskuju terytoryju z Polščy. Pavietrapłaŭcy tady zahinuli.
Hetym razam zarehistravany ŭ Šviecyi samalot vylecieŭ z terytoryi susiedniaj Litvy. «Nie viedaju, ci zasiakli nas radary.
My lacieli na małoj vyšyni», — adznačaje piłot.Pieršapačatkova šviedy źbiralisia skinuć na Minsk ulotki, ale paśla spynilisia na cackach.
«Nam padabajecca ideja zmahańnia z dyktatarami z dapamohaj humaru. Najhoršaje dla dyktatara — kali ź jaho śmiajujuca», — skazali šviedy ŭ intervju haziecie Aftonbladet pierad vyletam.
Jany pryznavalisia, što bajacca, bo samalot mohuć źbić abo pasadzić. Ale «žurnalisty i dysidenty ŭ hetaj krainie žyvuć pry štodzionnaj ryzycy źniavoleńnia» i «my chacieli, kab śviet źviarnuŭ uvahu na hetych ludziej».
Alaksandr Łukašenka na naradzie ŭ čaćvier adznačyŭ, što «vynikam kompleksu mier pavinna stać paśladoŭnaje ŭmacavańnie sistemy nacyjanalnaj biaśpieki i zabieśpiačeńnie adekvatnaha apieratyŭnaha reahavańnia na lubyja vykliki i pahrozy, adkul by jany ni cychodzili», pieradaje BiełTA.
«Ja jašče moh sumniavacca ŭ sabie. Ale kali Maša takoje zrabiła!» Nieviadomyja fakty pra Viktara Babaryku raskazała jaho advakatka Natalla Mackievič77
Kamientary