Ideołah Łukašenki «raźvienčvaje mify pra miadźviedžy desant»

Hałoŭny redaktar časopisa «Biełaruskaja dumka» tłumačyć maŭčańnie łukašenkaŭskich ŚMI. Pieršyja abviaržeńni Ministerstva abarony pra «fatašop videamateryjałaŭ», śćviardžaje Hihin, niapravilna zrazumieli. Jon vykazvaje niedavier da pracy niezaležnych žurnalistaŭ: u Sucharavie miadźviedzikaŭ nichto nie znachodziŭ, u Iviancy «miadźviedziaŭ u palocie nichto nie bačyŭ». Hihin taksama pahražaje šviedam-miedźviedziroŭščykam strohim pakarańniem.

Prapanujem vašaj uvazie artykuł z sajta łukašenkaŭskaha ahienctva BiełTA ź nievialikimi skaračeńniami.

«Spačatku prahučała jak žart — nieviadomy šviedski samalot bambardziravaŭ cacačnymi miškami budynak Administracyi Prezidenta Respubliki Biełaruś. Potym infarmacyja stała dadavacca. Nibyta samalot byŭ, ale da Minska nie dalacieŭ. Paćviardžeńni i abviaržeńni. Narešcie, usio bolš i bolš dokazaŭ — pravakacyja!

Što možna śćviardžać ŭžo ciapier?

1. Pieršymi zmanili šviedskaja hazieta «Aftonbladet» i šviedski ž miedyja-resurs «The Local», apublikavaŭšy infarmacyju pra toje, što 4 lipienia, a 5-j ranicy šviedski samalot «vysadziŭ miadźviedžy desant» nad Administracyjaj Prezidenta Respubliki Biełaruś. Ničoha takoha nasamreč nie było. Cikava, šviedy hanaracca tym, što prytrymlivajucca mižnarodnych standartaŭ žurnalistyki i lubiać parazvažać pra žurnalisckuju etyku. Dobryja standarty! Dobraja etyka!

2. Niekatoryja mas-miedyja skazili pazicyju Ministerstva abarony Respubliki Biełaruś u adnosinach da hetaha incydentu. U pryvatnaści, karespandent rasijskaha Pieršaha telekanała ŭ efiry zajaviła: «Adnak Ministerstva abarony Biełarusi kateharyčna abviarhaje i źjaŭleńnie parašutaŭ, i miadźviedziaŭ, i sam fakt ŭvarvańnia ŭ pavietranuju prastoru krainy zamiežnaha samalota». A voś aryhinał paviedamleńnia pres-słužby vajennaha viedamstva: «U Ministerstvie abarony Respubliki Biełaruś pravodzicca pravierka infarmacyi, raźmieščanaj šeraham internet-krynic, pra byccam by mieŭšy miesca niesankcyjanavany palot nad terytoryjaj Biełarusi zamiežnaha avijacyjnaha srodka. Faktaŭ, jakija paćviardžajuć pierasiačeńnie Dziaržaŭnaj miažy Respubliki Biełaruś u pavietranaj prastory, niama. Daśledujučy pradastaŭlenyja fota i videamateryjały, ekśpierty vyjavili hrubuju pracu z vykarystańniem elemientaŭ vizualnaj falsifikacyi, što śviedčyć pra vidavočna pravakacyjny charaktar padadzienaj infarmacyi». Jak zvyčajna kažuć u takich vypadkach, adčujcie roźnicu!

3. U Internecie była niasłušna padadzienaja i pazicyja litoŭskich Uzbrojenych Sił — byccam by jany paćvierdzili fakt parušeńnia dziaržaŭnaj miažy. Nasamreč litoŭcy ničoha nie paćvierdzili i zrabili maksimalna aściarožnuju zajavu. Pres-ataše armii kapitan Skomantas Pavilenis padzialiŭsia nastupnaj inafrmacyjaj: «4 lipienia litoŭskaja armija zafiksavała parušeńnie praviłaŭ vykarystańnia pavietranaj prastory Litvy. U suviazi z hetym pravodzicca rasśledavańnie, vyśviatlajucca abstaviny zdareńnia. Skazać, ci źviazanaje parušeńnie praviłaŭ sa zhadanym ŚMI incydentam, my nie možam».

4. Niejki samalot, jaki vonkava nahadvaje šviedskuju madel Jodel, sapraŭdy lotaŭ, prynamsi, na Iviancom. Heta paćviardžajecca i videakadrami, i pakazańniami vidavočcaŭ. Ale niama nivodnaha kadra, jaki b zafiksavaŭ pierasiačeńnie miažy.

5. Na niekalkich varyjantach videa vidać sklejki i mantaž, što adrazu vyklikaje padazreńni. Kadry, na jakich z ptušynaha palotu zafiksavanyja biełaruskija łandšafty, źniatyja asobna ad tych, dzie z kabiny samalota vykidvajuć niejkija čornyja pakiety niezrazumieła z čym.

6. Fotazdymak, na jakim źniatyja cacačnyja miadźviedzi na parašutach, jakija spuskalisia ź nieba, raspaŭsiudžany aftonbladet.se, źjaŭlajecca, najchutčej, padrobkaj. Pry toj mietodycy vykidańnia čornych pakietaŭ, jakaja pakazana na videa, miadźviedzi nikoli nie zmahli b pryziamlicca tak husta.

7. Śviedčańni vidavočcaŭ davoli błytanyja. U asnoŭnym, jany bačyli tolki samalot u niebie i niejkija čornyja pakiety, jakija vylatali ź jaho. Pra parašuciki i miadźviedziaŭ jany daviedalisia tolki ad žurnalistaŭ i milicyjantaŭ. Samich miadźviedziaŭ u palocie nichto nie bačyŭ. Akramia taho, niekatoryja ź vidavočcaŭ kažuć, što nie mahli razabrać tekst prymacavanych ulotak, pakolki jany byli na anhlijskaj, adnak na raspaŭsiudžanych arhanizatarami akcyi zdymkach vyrazna vidać, što tam byli taksama ŭlotki na rasiejskaj i navat biełaruskaj movach.

8. Śćviardžeńni pra toje, što miascovyja žychary kidalisia da miadźviedziaŭ, rvali ich, spadziejučysia, što tam hrošy ci, naadvarot, bajalisia, što jany atručanyja, źjaŭlajucca fantazijaj niejkich Aksany Rudovič i Taćciany Haŭrylčyk, jakija padrychtavali siužet dla sajta haziety «Naša Niva». Ni videakadrami, ni śviedčańniami vidavočcaŭ hetyja słovy nie paćviardžajucca.

9. Kali Per Kromveł, adzin z arhanizataraŭ pravakacyi, śćviardžaje, što minskija avijadyśpietčary mieli znosiny ź piłotami na rasiejskaj movie, to jon sam vykryvaje svaju chłuśniu. Pieršy zapyt borta moh iści na rasiejskaj tolki ŭ tym vypadku, kali ŭ dyśpietčara jon «vyśvietliŭsia» jak ŭnutrany. Ale paśla paŭtornaha zapytu usio roŭna idzie zvarot na anhlijskaj. Śpiecyjalizavanaja avijacyjnaja anhlijskaja ŭ dyśpietčaraŭ jak druhaja rodnaja.

10. Poŭnaj mistyfikacyjaj źjaŭlajucca dva miadźviedzi, nibyta znojdzienyja ananimnym žycharom Sucharava na dachu doma i ŭ dvary. Miarkujučy pa słovach samoha aŭtara «znachodki», jon vidavočna simpatyzuje akcyi. Što ž heta za šukalnik taki, jaki nie zalenavaŭsia abłazić dachi sucharaŭskich dzieviacipaviarchovak (a tam jość damy i vyšejšyja)? Dy jašče i znajšoŭ dva ekzemplary mišak-parašutystaŭ! Z takoj udačaj jamu ŭ łatarei hrać, a nie «latučych miadźviedziaŭ» šukać.

Isnujuć i inšyja prablemy ź viersijaj parušeńnia miažy. Tak, pamiž Litvoj i Biełaruśsiu dziejničaje pahadnieńnie, pavodle jakoha pry pierasiačeńni miažy pavietranym bortam baki pavinny apaviaščać adzin adnaho. Ale ŭ dadzienym vypadku ničoha padobnaha nie adbyłosia. Tamu albo ŭ arhanizacyi pravakacyi ŭdzielničali pradstaŭniki NATA (a heta vielmi sumnieŭna), albo nijakaha pierasiačeńnia miažy paprostu nie było.

Niedavier da ahučanych scenaraŭ akcyi ŭzmacniŭsia i ŭ suviazi z reputacyjaj jaje niepasrednych arhanizataraŭ i saŭdzielnikaŭ. Šviedskaja hazieta «Aftonbladet», chacia i źjaŭlajecca najbujniejšaj u Skandynavii, viadomaja adkrytaj pravakacyjnaściu. U svoj čas jana razharnuła ckavańnie vialikaha režysiora Inhmara Bierhmana, jaki ŭ adkaz nazvaŭ «Aftonbladet» «śmiećcievaj žoŭtaj hazetkaj».

Dy i samo pijar-ahienctva «Total», jakoje stała vykanaŭcam ŭsioj hetaj pravakacyi, słavicca tym, što nie hrebuje nijakimi srodkami dla ŭłasnaj raskrutki. Što jany tolki nie vyrablali ŭ rodnaj Šviecyi! Navat hrošy publična palili.

Niestykovak, nievytłumačalnych faktaŭ, supiarečnaściaŭ zanadta šmat, kab pavieryć u historyju ź pierasiačeńniem miažy.

Navošta ž spatrebiłasia hetaja pravakacyja? Dyskredytavać biełaruskija Uzbrojenyja Siły, pasiejać niedavier da ich bajazdolnaści, dy da taho ž nanieści pramy ŭdar pa hienierałach, jakija nie raz dakazvali svaju addanaść Ajčynie.

Ale ničoha nie ŭdasca! I zamoŭcy hetaj pravakacyi, i haspadary Pačobuta (chutčej za ŭsio, heta adny i tyja ž asoby) vydatna viedajuć siłu i biełaruskaj armii, i našaj sistemy SPA. I asabista ja nikomu nie raju sprabavać pravieryć jaje na tryvałaść.

Jakaja ž vysnova? Moža, nie zaŭvažyć i ruchacca dalej? Nie! Pravakacyja była zadumana aŭtarami davoli licha: nie sabjuć samalot, tady skažam, što vajennyja prahapili, sabjuć — abvinavacim «kryvavuju dyktaturu» u čarhovym złačynstvie. Ci nie tamu tak napałochanyja, miarkujučy pa intervju, sami ŭdzielniki pravakacyi? Uśviadomili, narešcie, što ich mahło čakać. Darečy, pierasiakaŭ samalot miažu (što naŭrad ci) ci nie, ale toj ža Per Kromveł svaimi zajavami litaralna naprošvajecca na kryminalnuju spravu pa artykule 371 KK, pryčym adrazu pa treciaj jaje častcy — «Naŭmysnaje niezakonnaje pierasiačeńnie Dziaržaŭnaj miažy Respubliki Biełaruś, ździejśnienaje hrupaj asob», a tam śviecić ad troch da siami. Ale kali samoha parušeńnia miažy i nie było, to ŭsio roŭna šviedam nie paźbiehnuć niepryjemnaściaŭ ź biełaruskim zakonam. U Kryminalnym kodeksie jość artykuł 315 «Parušeńnie praviłaŭ mižnarodnych palotaŭ, niezachavańnie ukazanych u dazvole maršrutaŭ, miescaŭ pasadki, pavietranych varotaŭ, vyšyni palotu, albo inšaje parušeńnie praviłaŭ mižnarodnych palotaŭ». Tam pakarańnie miakčejšaje — štraf abo aryšt da šaści miesiacaŭ. U lubym vypadku, našy ŭłady pavinny patrabavać tłumačeńniaŭ ad šviedskaha ŭrada z nahody pravakacyjnych dziejańniaŭ paddanych Karaleŭstva, a ad ambasadara hetaj krainy prynieści aficyjnyja prabačeńni. Ci słabo, spadar Eryksan?»

• 0
• 0
• 0
• 0
• 0
• 0
• 0
• 0