A da aŭtaraŭ knihi prajavili cikavaść siłavyja struktury.
U internecie źjaviłasia infarmacyja pra toje, što z haradzienskich kniharniaŭ kanfiskoŭvajuć padručnik «Hrodnaznaŭstva. Historyja jeŭrapiejskaha horada». Toje samaje nam paviedamili našy čytačy z Hrodna.
Šykoŭnaje i hruntoŭnaje, ilustravanaje i navatarskaje pa formie padačy materyjału vydańnie sioleta było chitom biełaruskamoŭnych prodažaŭ u Hrodnie,adnak, pavodle čutak, trapiła pad zabaronu praz apošniuju hłavu abo jaje adsutnaść: historyja Hrodna ŭ knizie napisanaja da 1991 hoda, a paŭstańnie hramadzianskaj supolnaści apisana padrabiazna.
Pa infarmacyi, jakaja źjaviłasia ŭ haradzienskim błohus13 , da aŭtaraŭ knihi ŭžo prajavili cikavaść siłavyja struktury.Adnak sami aŭtary pakul situacyju nie kamientujuć.
«Naša Niva» źviarnułasia ŭ «Hrodnaknihu», dzie pra źniknieńnie «Hrodnaznaŭstva» «ničoha nie čuli», adnak pry hetym paraili źviarnucca ŭ minskuju «Biełknihu».«Usie inicyjatyvy nam spuskajuć adtul, jakuju knihu pradavać, jakuju prybrać z pryłaŭkaŭ. My tolki pasredniki», — patłumačyli «NN» u pryjomnaj dyrektara.
Što tyčycca «Biełknihi», to tam pra situacyju z «Hrodnaznaŭstvam» taksama «ničoha nie čuli».
Pa słovach našych čytačoŭ kniha źnikła i z navukovaj biblijateki Hrodzienskaha ŭniviersiteta. Biblijatekarka ŭniviersiteta imknułasia daviedacca, ad kaho mienavita prajšła takaja infarmacyja, a paśla paviedamiła, što kniha znachodzicca ŭ čytalnaj zale biblijateki. Na pytańnie, ci možna jaje ŭbačyć u volnym dostupie, jana adkazała, što «na dadzieny momant nie vałodaje situacyjaj».
Kali «Hrodnaznazŭstva» nasamreč skanfiskavali, to heta aznačaje, što viaroŭku na šyi biełaruskaj kultury ściahvajuć jašče macniej.U knizie niama ničoha, što aficyjnyja ŭłady mahli b ličyć «kramolnym», raniej takija vydańni nichto nie zabaraniaŭ.
Zrešty, raniej takija ciemrašalskija kroki najčaściej sychodzili nie ad vysokich čynoŭ, a ad drobnych (va ŭsich sensaŭ) načalničkaŭ u vykankamie ci KDB.Taki moža pabačyć vyjavu «Pahoni», jakoj ź biełaruskaj historyi nie vykinieš, i tut ža schapicca za pistalet.
Kamientary