Minkult: Prajektnych prapanovaŭ nakont bernardynaŭ niama

U Ministerstva kultury Biełarusi nie pastupali prajektnyja prapanovy ab rekanstrukcyi abjektaŭ byłoha manastyra biernardzincaŭ u Minsku. Ab hetym paviedamiŭ siońnia žurnalistam načalnik upraŭleńnia pa achovie historyka-kulturnaj spadčyny i restaŭracyi Ministerstva kultury Respubliki Biełaruś Vasil Abłamski.

Jon abvierhnuŭ infarmacyju ab tym, što budynak płanujecca prystasavać pad haściničny kompleks. Vydadzieny dazvoł na praviadzieńnie navukova-prajektnych rabot kamunalnamu unitarnamu pradpryjemstvu «Minskprajekt» pa budynkach na vulicy Kiryły i Miafodzija, 6 i 8, ale nijakich prajektnych, eskiznych materyjałaŭ nie pastupała. Kali takija źjaviacca, jany buduć razhledžany na pasiadžeńni Biełaruskaj respublikanskaj navukova-mietadyčnaj rady pry Ministerstvie kultury va ŭstanoŭlenym paradku. Ekśpiertami buduć acenieny ŭsie inicyjatyvy pa adnaŭleńniu i prystasavańniu abjektaŭ da sučasnych umoŭ, skazaŭ śpiecyjalist.

Vasil Abłamski ličyć infarmacyju ab płanach pierabudovy pomnika architektury XVII stahodździa, raspaŭsiudžanuju ŭ Internecie, pijaram. «Asabliva niezrazumieła, što i kaścioł śviatoha Iosifa siudy ŭklučajuć», - padzialiŭsia jon.

Voś jak kamentujuć słovy čynoŭnika aktyvisty ruchu abarony pomnikaŭ:

Staršynia Tavarystva biełaruskaj movy Aleh Trusaŭ: “Na dniach ja byŭ u Abłamskaha, sytuacyja nastupnaja. Instytutu prajektavańnia dali dazvoł na daśledavańni, ale jon nie ŭzhadniaŭ svoj prajekt ni z kim. A heta hrubaje parušeńnie zakanadaŭstva. I vielmi dobra, što hetyja dakumenty trapili ŭ presu. Ciapier usie zamiešanyja ŭ hetuju spravu adkaznyja asoby buduć admachvacca ad hetaj spravy, usie ŭmyvajuć ruki. A ŭ nas jość niebłahi šaniec pachavać hety prajekt. Tolki treba hetym šancam pravilna skarystacca”.

Staršynia Tavarystva achovy pomnikaŭ Źmicier Kaśpiarovič: “Toje, što ŭłady adchryščvajucca ad hetaha prajektu, aznačaje peŭny pośpiech hramadzianskaj akcyi pa abaronie chramavaha kompleksu. Ciapier treba roznymi sposabami cisnuć na ŭładu, kab dalej raźvivać hety pośpiech. Rabić heta treba aściarožna, bo varta pamiatać, što ŭłady nia raz užo nibyta sastupali, kab potym davieści zadumanaje da kanca”.

Architektar Uładzimier Dzianisaŭ: “Dziŭna. U mianie była peŭnaja infarmacyja, što “Mienskprajekt” padaŭ svaje dakumenty na razhlad kamisii Ministerstva kultury. 18 krasavika adbudziecca vyjaznaja sesija Biełaruskaj respublikanskaj navukova-metadyčnaj Rady pa achovie pomnikaŭ histaryčnaj spadčyny, padčas jakoj i razhledziać hety prajekt. Čamuści heta budzie nie ŭ Miensku, a ŭ Miry”.

My patelefanavali ŭ Ministerstva kultury, i nam tam paćvierdzili, što pa stanie na ranak 14 krasavika pytańnie ab uzhadnieńni eskiznaha prajektu ab rekanstrukcyi klaštaru bernardzinaŭ jašče stajała ŭ paradku dnia pasiedžańnia Respublikanskaj navukova-metadyčnaj rady pa pytańniach achovy spadčyny zaplanavanaha na 18 krasavika. Dziŭna, jak načalnik upraŭleńnia pa achovie historyka-kulturnaj spadčyny i restaŭracyi Ministerstva kultury hetaha nia viedaje.

Darečy, 18 krasavika — Suśvietny dzień achovy pomnikaŭ.

• 0
• 0
• 0
• 0
• 0
• 0
• 0
• 0