Budučy susiedkaj Biełarusi, Litva nie moža ź joj nie razmaŭlać, a ź izalacyjaj nie zhodna ŭsia Jeŭropa, kaža staršy daradca prezidenta Litvy Dali Hrybaŭskajcie pa pytańniach źniešniaj palityki.
Ź inšaha boku, pa słovach Javity Nielupšenie, uvodziačy metavyja sankcyi, Jeŭropa šle vyrazny sihnał režymu Alaksandra Łukašenki, jaki parušaje fundamientalnyja pravy čałavieka.
«Nie mieć znosin, budučy susiedziami, niemahčyma. Majučy miažu praciahłaściu amal 700 km, ciesnyja i stałyja histaryčnyja, handlovyja i kulturnyja suviazi, abarvać ich nierealna.
Usia Jeŭropa pryznaje, što izalacyja nievyhadnaja i nie apraŭdvaje siabie», — skazała Nielupšenie BNS.
Pavodle jaje słoŭ, nielha admiežavacca ad rašeńnia mnostva ahulnačałaviečych, ekanamičnych, tranzitnych, pryrodaachoŭnych, kulturnych prablem, prablem biaśpieki i inš
«Akramia taho, nam nie stvaryć dobry prykład demakratyi nijak inakš, jak tolki stvaryŭšy dla prostych biełarusaŭ mahčymaść adčuć jaje na vulicach Vilni abo ŭjakoj-niebudź inšaj jeŭrapiejskaj stalicy. Heta vidavočna», — skazała daradca prezidenta.
«Asobnaje pytańnie — mieć kantakty i jakija mieć kantakty z palityčnym režymam.
Tut taksama vidavočna, što vyrazny znak režymu, što parušaje fundamientalnyja pravy čałavieka, pavinien być. U vypadku ź Biełaruśsiu hety znak — metavyja akcyi ŭ dačynieńni da kankretnych sponsaraŭ režymu — zabarona na vizy i prypynieńnie ekanamičnych suviaziaŭ», — skazała Nielupšenie.
Daradca prezidenta padkreśliła, što
«ŭ sensie nacyjanalnaj biaśpieki lepš, kali Biełaruś źjaŭlajecca niezaležnaj dziaržavaj, jakaja sama prymaje hałoŭnyja rašeńni».
«Łahičny vyvad z hetaha ŭsiaho — palityka «dvuchbakovaj darohi», jakoj prytrymlivajucca i Litva, i ŭvieś Jeŭrasajuz (ES).
Bolš efiektyŭnaj palityki, jakaja dazvoliła b znajści bałans pamiž pavahaj da demakratyi i pravoŭ čałavieka i racyjanalnymi prahmatyčnymi intaresami, pakul niama», — skazała daradca.
Ciapier čytajuć
Piać pytańniaŭ, jakija zastajucca paśla śmierci eks-vykładčyka BNTU Ščukina, što ŭciakaŭ ad milicyi5
Kamientary