Ź Biełarusi za subotu j niadzielu
Za Hančarychaj sočać
Zinaida Hančar źviarnułasia z adkrytym listom da staršyni KHB Uładzimiera Mackieviča. Jana piša, što apošni čas za jaje domam sočać nieviadomyja joj asoby. La padjezdu ŭvieś čas dziažurać aŭtamabili, a za naviednikami na paru hadzinaŭ čaplajecca «chvost». Hančarova žonka nazyvaje hetyja dziejańni nachabnymi i cyničnymi. Kali heta KHB takim zajmajecca, dyk hańba vam, piša jana. A 3 kastryčnika, kali sačyć nie pierastali, žančyna źviarnułasia ź listom u «Mižnarodnuju amnistyju» i da staršyni ABSE, ministra zamiežnych spravaŭ Narvehii Volebeka. Jana taksama krytykuje ŭ suviazi z hetym kiraŭnikoŭ Kansultacyjnaj hrupy ABSE, kaža, što jany nia vystupili navat z zajavaj pra źniknieńnie ludziej u Biełarusi dy dezinfarmujuć kiraŭnikoŭ Eŭropy, što tut nibyta ŭsio ŭ paradku, a 29 vieraśnia navat zapatrabavali ad apazycyi, kab jana źniała papiaredniaje patrabavańnie da Łukašenki vyzvalić palitviaźniaŭ.
Sojm piša Paźniaku
U niadzielu zasiadaŭ Sojm BNF. Krytykavali praviadzieńnie źjezdu KCHPBNF, šukali vyjścia z sytuacyi, bo bajacca, što ciapier Miniust i tych, i tych admovicca rehistravać. Napisali list da Paźniaka, u jakim prapanujuć, kab razam pryniali rašeńnie razhladać 4-y źjezd partyi BNF jak papiaredni da
6-ha źjezdu ruchu BNF.
Niaklajeŭ i «Kantynent»
U Varšavie emihrant Uładzimier Niaklajeŭ ledź nie sarvaŭ prezentacyju, pryśviečanuju 25-hodździu słynnaha rasiejskaha emihranckaha časopisa «Kontinient». Na joj prysutničali redaktary vydańnia, rasiejskaja dyjaspara ŭ Polščy j maskoŭskaja prafesarka-ekanamistka Pijašava. Pijašava kazała, što ŭsio ž režym Jelcyna — adzinaja nadzieja rasiejcaŭ na demakratyju. Na pytańnie publicysta Bukčyna: «Jaki ž jon demakratyčny, kali abjadnoŭvajecca z dyktataram Łukašenkam?» — rasiejcy zajavili, što ŭ hetaj intehracyi niama ničoha «hadkaha», što vyklikała burnuju reakcyju Niaklajeva j prysutnych biełarusaŭ. Zamiest prezentacyi ŭ vyniku 2 hadziny dyskutavali pra Biełaruś i kalanijalizm. Niaklajeŭ nazvaŭ «Kontinient» časopisam, prahnozy jakoha nikoli nie zbyvalisia.
Jak nam viadoma, sam Niaklajeŭ ciapier razdumvaje, ci zastavacca na emihracyi, ci viartacca ŭ Biełaruś.
Hieryjatry
U kožnym rajonie Biełarusi ŭłady chočuć da kanca hodu zavieści pa doktary-hieryjatry, a va ŭsich abłaściach — adkryć hierantalahičnyja centry, piša BiełaPAN. Tak adznačajuć hod prystarych ludziej, jakich u Biełarusi 2 miljony. Voś dzie tolki daktaroŭ voźmuć, kali j pedyjatraŭ paŭsiul brakuje?
Ciapier čytajuć
Na svoj dzień naradžeńnia Zialenski z Naŭrockim, Naŭsiedam i Cichanoŭskaj u Vilni ŭšanuje pamiać Kastusia Kalinoŭskaha2
Kamientary