Nivodnaja achviara nia zdoleła źbiehčy
U 1992 h. u Kiemieraŭskaj, Ałtajskaj i Novasibirskaj vobłaściach pačali źnikać maładyja dziaŭčaty. Historyi, jakija raspaviadali ichnyja svajaki i znajomyja, byli padobnyja adna da adnoj. Zvyčajna dziaŭčyna atrymlivała ad nieznajomych maładzionaŭ vabnuju prapanovu papracavać u Novasibirsku, źjaždžała z domu, i nichto z svajakoŭ jaje bolej nia bačyŭ.
Pravaachoŭnyja orhany nie mahli vysačyć bandu dzieviać hadoŭ. Złačyncy vandravali pa ŭsioj Zachodniaj Sibiry, pieryjadyčna źmianiajučy pašparty, paśviedčańni, žytło. U adnym Novasibirsku jany źmianili kala 400 najmanych kvateraŭ. Zatrymać ich dapamoh vypadak. 12 lutaha 2001 h. aperatyŭniki atrymali infarmacyju, što ŭ Novasibirsku nieviadomyja trymajuć u zakładnikach maładuju dziaŭčynu. 13 lutaha złačyncy byli zatrymanyja supracoŭnikami UBOPu (Upraŭleńnia pa baraćbie z arhanizavanaj złačynnaściu).
Usie bandyty akzalisia biespracoŭnymi žycharami Novasibirsku. Ich vierchavodu – 27 hadoŭ, astatnija — krychu maładziejšyja. Była ŭ składzie bandy j dziaŭčyna, kachanka vierchavoda. Jaje zatrymali krychu paźniej u Ałtajskim krai.
Śledčyja vyśvietlili, što za 8 hadoŭ złačyncy vykrali bolš za 60 žančynaŭ u vieku ad 16 da 25 hod, los jakich dahetul nieviadomy. Skradzienych kabietaŭ prymušali zdymacca ŭ parnahrafičnych stužkach, u tym liku j sa scenami sadamazachizmu. Dyj sami złačyncy brali aktyŭny ŭdzieł u stvareńni filmaŭ – nia tolki jak režysery j aperatary, ale i jak aktory. Pornakasety pradavalisia ŭva ŭsioj Rasiei (pakupnikoŭ złačyncy najčaściej znachodzili praź Internet). Bandyckaj videaaparatury milicyja pakul nie znajšła.
“Cikava, što nivodnaja achviara nia zdoleła źbiehčy, – paviedamiła karespandentu “Haziety.Ru” pres-sakratar UBOPu Navasibirskaj vobłaści Alena Abramava. – Uciakačak zaŭsiody łavili j žorstka źbivali”.
Verbavali dziaŭčat pa-roznamu. Naprykład, zaprašali pracavać huvernantkaj albo siadziełkaj da padstaŭnoj asoby. Praz paru dzion prynosili dziaŭčynie tabletki, kab taja davała ich pić toj “starečy”. Padstaŭnaja asoba ŭ niejki momant imitavała śmierć. “Pracadaŭcy” vinavacili dziaŭčynu ŭ zabojstvie i pad pahrozaj “zdać” u milicyju prymušali rabić usio, što im było patrebna.
Kali achviara supraciŭlałasia, jaje zabivali. Zatrymanyja ŭžo ŭziali na siabie kala sta epizodaŭ razbojnych napadaŭ, rabavańniaŭ i zabojstvaŭ. U pryvatnaści, raspaviali śledčym pra adno z apošnich svaich zabojstvaŭ. Pad haražom, što naležaŭ adnamu z bandziukoŭ, milicyjanty znajšli trup 17-hadovaj žycharki Barnavułu Iryny Siarovaj, što ŭvosień prapała biaź viestak.
Siońnia śledčyja aktyŭna šukajuć achviaraŭ złačynnaj hrupoŭki.
Kamientary