Z usioj krainy

 Z usioj krainy

Miron nia śpić

U čaćvier kala Lozna na 30-metrovaj apory linii elektrapieradač napruhaj 35 tys. volt źjaviŭsia bieł-čyrvona-bieły ściah. Kali jaho źniali, znajšli cydułku nastupnaha źmiestu: “Dobry haspadar nikoli nie papaŭzie ŭraskaračku na ŭschod z praciahnutaj rukoj, a druhoha takoha złydnia, jak naš – prajdzi śviet, nia znojdzieš. Miron”.

B.T.

Smažyć

Padrychtoŭka da Vialikadnia idzie poŭnym chodam — prostyja hrama-dzianie aktyŭna honiać samahonku, a milicyja likviduje lišak hetaha napoju. Tak, za apošni tydzień 24 samahonščyki (ź ich 8 biespracoŭnych, 3 pensijanery) paciarpieli ad milicyjantaŭ, jakija źniščali śviatočnaje pitvo na miescy j davali štrafu: tym, chto honić, — ad 3 da 5 minimałak, tym, chto zachoŭvaje, — da 2-ch. Niespraviadliva.

Nia śmiešna

Dzień Humaru, 1 krasavika, staŭsia apošnim dla dvuch žycharoŭ Smurhonščyny, jakija, nie zhavorvajučysia, paviesilisia ŭ svaich kvaterach. Adnamu było 50 hod, druhomu — 47. Darečy, z pačatku stahodździa ŭ rajonie zasiliłasia 10 čałaviek.

Taciana Skarynkina, Smurhoni

Źvieraboj

U Škłoŭskim rajonie zatrymany 52-hadovy biespracoŭny, jaki zajmaŭsia brakańjerstvam. U jaho skanfiskavali 20 skurak zajcoŭ, niekalki lisinych, try niezarehistravanyja palaŭničyja strelby, patrony i pastki. Viadziecca śledztva.

Pavodle BiełaPAN

Zrabi sabie daśpiechi

14–15 krasavika ŭ Miensku adbudziecca navučalny seminar pa vyrabie rycarskich daśpiechaŭ.

Pytańni j zajavy na ŭdzieł prymajucca da 12 krasavika pa e-mail: [email protected], t. 232-00-08 (Miensk).

naviny za tydzień

Vajna performansaŭ

“Zubr” na minułym tydni abskakaŭ Małady Front u niehałosnaj vajnie performansaŭ — pieršym pravioŭ pikiet u abaronu NTV i sabraŭ na jaho 30 čałaviek. Na maładafrontaŭski praz 2 dni vyjšli tolki 20. Udzielniki pikietaŭ puskali zialonyja balončyki i burbałki, vyhukvali “Žyvie NTV” i, čamuści, “Žyvie Biełaruś”.

Trapiŭ u zasadu

31 sakavika ŭ Bieraści byŭ zatrymany pradstaŭnik ruchu «Zubr», jaki raskidaŭ ulotki ŭ teatry ŭ časie spektaklu «Blez i Mary». Zatrymali pradstaŭnika mocnaj ekalahičnaj arhanizacyi biletnicy, jakija j vyklikali milicyju. Imia rezystanta z peŭnych pryčynaŭ nie razhałošvajecca.

naviny haspadarskija

Miasa — Rasiei, vioscy — subotnik

Z pryčyny epidemii jaščuru ŭ Zachodniaj Eŭropie Rasieja maje namier pavialičyć ekspart śvininy, jałavičyny i ptuški ź Biełarusi. Adnak radavacca z nahody “viartańnia na ŭschod” nie vypadaje — havorka idzie pra tak zvanyja “centralizavanyja pastaŭki”, vialikaj karyści ad jakich niepasredna sielhasvytvorcam nie było nikoli. Niališnie ŭzhadać, što z-za štučnaha strymlivańnia cenaŭ jakraz žyviołahadoŭla prynosiła kałhasam i saŭhasam asnoŭnyja straty. Ciaham apošnich hod kiraŭniki haspadarak imknulisia pazbycca nierentabelnaj vytvorčaści, i zbolšaha im heta ŭdałosia. Zrešty, niahledziačy na prykmietnaje skaračeńnie statku, Rasieju nakormim. A voś ci zastaniecca što-niebudź dla biełaruskaha handlu — pytańnie ŭžo inšaje.

Na minułym tydni “imiem revalucyi” kamercyjnym bankam zahadali vydatkavać kredyty na pasiaŭnuju. Ale hetych srodkaŭ usio roŭna nia chopić, tamu amal va ŭsich rajonach Mienščyny na “prośbu pracoŭnych” było vyrašana pravieści subotniki abo pieraličyć sielskaj haspadarcy častku zarobku. Dzie-nidzie nastaŭnikam i medykam patłumačyli: nie daścio hrošaj dobraachvotna — nie pabačycie premii.

Jašče ŭ cikaviejšym stanoviščy apynulisia handlary Kamaroŭki. Mienharvykankam abvieściŭ ab čarhovaj rekanstrukcyi kirmašu, padčas jakoj pradprymalnikaŭ paprosiać “vyzvalić miescy”. Damovy na arendu ziamli, jakija bolšaść ułaśnikaŭ tutejšych kramaŭ majuć da 2007 h., planujecca skasavać biaz vypłaty kampensacyi.

U pramysłoŭcaŭ svaja niespadziavanka. Urad pastaviŭ umovu — nijakaha barteru. Za ŭsio daviadziecca raźličvacca “žyvymi hrašyma”, u tym liku i za enerhanośbity, što ŭžo pryviało da “nadzvyčajnych mieraŭ” z boku enerhietykaŭ. Adłučeńnie elektryčnaści chraničnym niepłacielščykam (u tym liku Biełaruskamu metalurhičnamu zavodu, mahiloŭskamu “Chimvałaknu”, Mienskamu padšypnikavamu zavodu i h.d.) pakul było časovym, ale, miarkujučy pa ŭsim, nie apošnim.

Adnak hałoŭnaja padzieja — napieradzie. Rasieja ŭsio ž daść abiacanyja letaś pazyki. I, niby ŭ adkaz, “pałata” źbirajecca ratyfikavać pahadnieńnie ab adzinaj valucie 11 krasavika. “Starhavalisia”.

Siaržuk Ivanoŭski

spartovy tydzień

Banany dapamahli

Zbornaja Biełarusi pa tenisie vyjhrała ŭ kamandy Zymbabve.

Spravy zapachli tuchłymi bananami ŭ piatnicu, kali Vova Vaŭčkoŭ razvarušyŭ zastarełuju traŭmu plača dy nia zmoh praciahvać pačatuju hulniu – paviali zymbabvijcy 1:0. Maksim Mirny “svajho” afrykanca abstaviŭ. U parnaj sustrečy Mirny-Švec pieršy set vyjhrali, adnak paśla “źlili” zusim biełym zymbabvijcam try partyi. Učora spravy možna było vyratavać, tamu biełarusy intensiŭna siłkavalisia bananami, jakich było navalena ŭ ich na stolikach. I pieramahli: 3:2.

Chakieisty ŭ Miensku rychtujucca da niamieckaha čempijanatu śvietu, što pačniecca pry kancy krasavika. U paniadziełak dy aŭtorak chłopcy na mienskim lodzie razamnucca sparynhami z “Tarpeda” ź Nižniaha Noŭharadu — rasiejskim sieradniakom. Junackaja zbornaja praciahvaje śviatkavać svajo viartańnie ŭ elitu, aformlenaje tydzień tamu ŭ Ryzie.

U futbolnaj haspadarcy — čarhovaja zavarucha. Pryžučyli viadomaha arbitra Hienadzia Jakuboŭskaha, jaki, pavodle śledčych, zaciskaŭ padatki dy hrob “niapravilnyja” hrošy na transfernych spravach. A ŭ sieradu biare start nacyjanalny čempijanat — kolkaść udzielnikaŭ jakoha skaročanaja da 14-ci.

Bohuś Bijatlanionak

Paciarpiełyja za Biełaruś

Siabry KCHP-BNF Piatro Sarapienia, Jan Tałpyha, Rusłan Sałaŭjan dy Ihar Marozaŭ byli zatrymanyja ŭ noč na 1 krasavika za raspaŭsiudžvańnie ŭlotak “Abaronim Baćkaŭščynu ad rasiejskich akupantaŭ”. Siabar Maładoha Frontu Pavał Miahkoŭ byŭ zatrymany ŭ ciahniku ŭ Voršy, kali jechaŭ u Maskvu pratestavać suprać intehracyi Biełarusi j Rasiei — vidać, u Maładym Froncie adbyvajecca mnoha ŭciečak infarmacyi. U Viciebsku za praviadzieńnie niesankcyjanavanaha pikietu Siarhieju Aksimoviču dali štraf 150 min. zarobkaŭ. Alesia Bialackaha i Paŭła Sieviarynca pasadzili na 10 nočaŭ za Dzień Voli, Jurja Bieleńkaha — na 15 nočaŭ. 2 krasavika masava zatrymlivali ŭdzielnikaŭ zboru podpisaŭ za niezaležnaść Biełarusi, arhanizavanaha KCHP-BNF: paciarpieli Valancina Maroz, Taciana Ciaciorkina, Tamara Sakolčyk, Śviatłana Sačanka, Alaksiej Tarała, Śviatłana Bielskaja, Lidzija Piańkoŭskaja, Uładzimier Kučaraŭ, Uładzimier Jucho, Halina Tamčuk, Uładzimier Cimaševič. Alaksieja Šeina i Sieržuka Lisičonka zatrymali na hanku Dziarždumy ŭ Maskvie, dzie jany pratestavali suprać taho, što Rasieja kvapicca na Biełaruś. Staršyniu Kryčaŭskaj arhanizacyi BNF Anatola Biełaziercava dy aktyvista Valerja Parfimoviča pakarali štrafami na 3 dy 5 min. zarobkaŭ. U Barysavie Alaksandar Abramovič, Alesia Jasiuk, Maryna Statkievič, Aleś Baradula i Źmicier Fiadorčanka byli zatrymanyja za pakiet u padtrymku NTV. Pieršaha pasadzili na 10 nočaŭ. Skiny na junackaj tusoŭcy la “Makdonaldzu” ŭ Miensku pačali abražać junakoŭ, jakija mieli bieł-čyrvona-biełyja znački. Zaviazałasia bojka. U vyniku niekalkich siabroŭ Partyi Svabody zatrymaŭ AMAP. U noč na 5 krasavika byli zatrymanyja siabry “Zubra”: Alaksiej Šydłoŭski, Cimoch Drančuk, Źmicier Drapačka i Aleś Apranič. Pa fakcie pisańnia na ścienach zaviedzienaja kryminalnaja sprava pavodle artykuła 341 novaha kodeksu (“Apahańvańnie zbudavańniaŭ i paškodžańnie majomaści”). Paśla troch sutak aryštu ich vypuścili pad padpisku pra niavyjezd. 6 krasavika Aleha Miacielicu zasudzili za raspaŭsiud na Białynickim rynku hazety «Narodny Prezydent» dy nalepki «Zubr». Dali štraf 28500 rub.