Суд прызначаны на пятніцу, 13 ліпеня.
Пэрспэктыва закрыцьця навісла над чарговай грамадзкай арганізацыяй – Менскім гарадзкім грамадзкім аб’яднаньнем «Цэнтар Супольнасьць». Суд прызначаны на пятніцу, 13 ліпеня.
Старшыня Рады арганізацыі Сяргей Мацкевіч атрымаў з Менскага гарадзкога суду копію іскавай заявы гарадзкога ўпраўленьня юстыцыі, якое патрабуе прыняць рашэньне аб ліквідацыі «Цэнтру Супольнасьць». Паводле начальніка ўпраўленьня юстыцыі Мікалая Зялёнкі, які падпісаў заяву, арганізацыя не адказвала на лісты й папярэджаньні, мела ў складзе Рады чалавека, не прапісанага ў Менску, і «на протяжении длительного времени ... осуществляет действия, связанные с участием в деятельности незарегистрированных общественных организаций – Ассамблея неправительственных демократических организаций».
Сяргей Мацкевіч лічыць: «Сапраўдным матывам ёсьць не фармальная адсутнасьць адказаў на лісты, якія мы папраўдзе не атрымлівалі, а кірунак на ліквідацыю ўсіх дэмакратычных арганізацыяў і ціск супраць іхных актывістаў».
«Цэнтар Супольнасьць» заснаваны ў 1995 годзе з мэтаю спрыяць разьвіцьцю грамадзянскай супольнасьці ў нашай краіне. Сярод заснавальнікаў – такія грамадзка-культурныя й палітычныя дзеячы, як Вінцук Вячорка, Алесь Бяляцкі, Генадзь Сагановіч і іншыя. Арганізацыя правяла мноства асьветных, навуковых, маладзёвых, культурніцкіх праграмаў, а таксама ўдзельнічала ў вылучэньні назіральнікаў падчас выбарчых кампаніяў, паведаміў праваабарончы цэнтр «Вясна».
Цяпер чытаюць
Што азначае расследаванне Міжнароднага крымінальнага суда для Лукашэнкі і беларусаў? Тлумачыць Кацярына Дэйкала3
Каментары